Mali: Abigaragambya bavuga ko basabwe gutanga umukandida waba Minisitiri w'intebe

Itsinda rikomeye ryo muri Mali rizwi nka M5 RFP ryateguye imyigaragambyo yo mu mwaka ushize yagejeje ku ihirikwa rya perezida wari uriho icyo gihe, ryavuze ko ryasabwe gutanga umukandida ku mwanya wa minisitiri w'intebe.

Soya Djigue wo muri iryo tsinda, yavuganye na BBC ku wa kabiri mu kiganiro cyo kuri radio cya Focus on Africa, nyuma yuko ku wa mbere Perezida Bah Ndaw na Minisitiri w'intebe Moctar Ouane bo muri leta y'inzibacyuho (cyangwa y'imfatakibanza mu Kirundi) bafunzwe n'igisirikare.

Bwana Djigue yavuze ko ihirikwa ry'abategetsi b'inzibacyuho nta kintu cyari kuribuza kubaho kubera ko abo bategetsi bananiwe kugisha inama igisirikare ku mpinduka muri guverinoma.

Yongeyeho ko ubufatanye ari ikintu cy'ingenzi mu biri mu masezerano yashyizweho umukono azageza ku gusubiza ubutegetsi mu maboko y'abasivile.

Bwana Djigue yavuze ko kuba Perezida na Minisitiri w'intebe b'inzibacyuho barananiwe gucyemura ikibazo cy'imyigaragambyo ikomeje, na byo byatumye ibintu bikomera kuri bo.

Ifungwa ryabo mu kigo cya gisirikare cya Kati hafi y'umurwa mukuru Bamako, ryamaganwe n'amahanga n'umuryango w'abibumbye (ONU/UN).

Perezida Emmanuel Macron w'Ubufaransa - bwahoze bukoloniza Mali - yavuze ko ibyabaye ari "ihirikwa ry'ubutegetsi ritakwihanganirwa ryakorewe mu rindi hirikwa ry'ubutegetsi".

Bwana Macron yakangishije ko abantu bari inyuma y'ifungwa rya Perezida na Minisitiri w'intebe ba Mali b'inzibacyuho bazafatirwa ibihano n'umuryango w'Ubumwe bw'Uburayi (EU/UE).

Aganira n'abanyamakuru ku musozo w'inama ya EU ku wa kabiri, Bwana Macron yagize ati: "Mu masaha ari imbere, twiteguye gufata ibihano bigambiriye ababigizemo uruhare".