Mozambique: Benshi bapfuye nyuma y'uko abarwanyi bateye umujyi wa Palma

Abantu babarirwa muri mirongo bapfuye nyuma y'igitero mu mujyi wa Palam mu majyaruguru ashyira uburasirazuba bwa Mozambique, nk'uko umuvugizi wo muri minisiteri y'ingabo yabivuze.

Hari abantu barindwi bishwe bari kugerageza guhunga hotel yari yafashwe n'abo barwanyi, nk'uko Omar Saranga abivuga.

Hari abandi bantu amagana, abanyamahanga n'abaturage ba hano, bivugwa ko barokowe.

Kuva kuwa gatatu ushize, aka gace katewe n'abarwanyi bishingikirije idini ya Islam.

Abantu bagiye batanga ubuhamya bari mu bwihisho bategereje ubwato bwo kubarokora, nabwo bunyura ku mwaro uriho imibiri yaciwe imitwe.

Urubuga rutangaza amakuru y'amato ya gisirikare rwerekanya amafoto y'amato menshi ku mwaro n'icyambu cya Palma, abantu bagerageza guhunga mu buryo bwose n'amato yose ashoboka.

Ni iki tuzi ku kurokora abantu?

Umwe mu bakozi ba hotel yabwiye BBC ko benshi babashije gucika kuwa gatanu nijoro bihishahisha bakagera ku mwaro aho batwawe n'ubwato kuwa gatandatu mu gitondo.

Avuga ko hari abandi benshi nabo barokowe nyuma ye, ubwo amato yasubiragayo ku cyumweru kurokora abandi babashije gucika bava muri Palma.

Avuga ko abasivili n'abandi bantu baba muri ako gace aribo bari gukora ibikorwa byo gutabara abantu.

Yagize ati: "abacuruzi na za kompanyi zaho, nibo ntwari z'ibi bikorwa. Mu masaha y'igicuku babashije kugera ku bantu ku mwaro babashyira mu mato barabakiza."

Umunya-Africa y'Epfo Adrian Nel yishwe ari kugerageza guhunga, nk'uko nyina Meryl Knox yabibwiye BBC.

Gusa umugabo we, Gregory, yabashije kuva muri Palma - nubwo Knox yabwiye ibiro ntaramakuru AFP ko yacitse atwaye umurambo w'umwana wabo w'umuhungu. Undi muhungu wabo nawe yarokotse.

Madamu Knox avuga ko igihe abo bahungaga, nta ngabo zibarinda zari zihari "byari ukwiruka buri wese akiza amagara ye."

Umwe mu batabawe yabwiye AFP ko ubwato yahungiyemo bwarimo abantu bagera ku 1,400 bwageze ku cyambu cya Pemba, kiri muri 250Km mu majyepfo ya Palma, ku cyumweru nimugoroba.

Ibigo by'ubutabazi bivuga ko andi mato menshi yuzuye abantu bahunga yari ari mu nzira agana Pemba aho ashobora kugera kuwa mbere mu gitondo.

Muri Palma ubu byifashe bite?

Umubare nyawo w'abantu bishwe ntabwo uzwi neza, muri uyu mujyi wo mu ntara ya Cabo Delgado utuwe n'abantu bagera ku 75,000.

Mu mujyi no ku nyanja habonetse imibiri myinshi "yaciwe imitwe", nk'uko bivugwa na Col Lionel Dyke, ufite ikigo cyigenga, Dyck Advisory Group, cyahawe akazi na polisi ya Mozambique muri aka gace.

Umutwe witwaje intwaro bivugwa ko wafashe umujyi wa Palma, ariko ibyo biragoye kugenzura no kwemeza kuko itumanaho ryakuweho.

Ubwo abo barwanyi bateraga kuwa gatatu, bibasiye inzu z'ubucuruzi, banki n'ibigo bya gisirikare.

Abantu amagana bahunze imirwano, birukira mu mashyamba no mu bice by'icyaro. Palma iri hafi y'umushinga munini wo gucukura gas ukorwa n'ikigo cy'Abafaransa Total.

Abakozi barenga 100 bahungiye muri hotel yo muri uyu mujyi yitwa Amarula Palma Hotel.

Kuwa gatanu, bamwe bagerageje kuva muri iyo hotel bari mu modoka nyinshi bagana ku mwaro uri hafi. Bamwe babigezeho abandi bafatwa n'abo barwanyi.

Kuva mu 2017, Mozambique yazahajwe n'ubwigomeke bw'inyeshyamba.

Imitwe ishamikiye kuri Islamic State (IS) niyo iri inyuma y'imirwano muri ako gace gatuwe cyane n'abasilamu ka Cabo Delgado. Aha hamaze gupfa abantu barenga 2,500 mu gihe 700,000 bavuye mu byabo.