Covid-19: U Rwanda, DR Congo, Kenya nabyo byagezweho n'inkingo za Covax

Inyandiko gusa
Urukingo rwa AstraZaneca

Ahavuye isanamu, AFP

Insiguro y'isanamu, Urukingo rwa AstraZeneca ruri gutangwa rwatubuwe n'ikigo The Serum Institute of India

Indege itwaye doze 240,000 z'urukingo rwa AstraZeneca muri gahunda ya Covax yageze i Kigali mu gitondo kuri uyu wa gatatu, nk'uko bivugwa na minisiteri y'ubuzima.

Muri iyo gahunda kandi mu ijoro ryacyeye, Kenya yakiriye doze miliyoni 1.02 z'uru rukingo rwa AstraZeneca, na DR Congo yakira doze miliyoni 1.7 z'urwo rukingo.

Uyu munsi nimugoroba u Rwanda rurakira izindi doze 102,960 z'urukingo rwa Pfizer, nk'uko bivugwa na minisiteri y'ubuzima mu itangazo yasohoye.

Iyi minisiteri yatangaje ko izo doze zose zizaterwa abantu 171, 480 bashyizwe mu cyiciro cy'abafite ibyago byinshi, mu gihe gukingira bitangira ku wa gatanu w'iki cyumweru.

Tambuka X ubutumwa
Uremeye ibiri kuri X?

Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.

Uragaba: Ibitangwa n'izindi mbuga bishobora kubamwo gutangaza

Impera ya X ubutumwa

Perezida Paul Kagame ku rubuga rwa Twitter yavuze ko ari inkuru nziza kuba inkingo za Covid-19 zigeze muri Africa, zihereye muri Ghana uyu munsi zikaba zageze no ku Rwanda.

Ati: "Kwari ugutegereza cyane, bamwe biteguye kurusha abandi.... tutanavuze 'abaruta abandi kurushaho' nyamara twese turukeneye cyane."

Gukingira muri ibi bihugu biteganyijwe ko bihera ku bakozi bo mu nzego z'ubuzima, n'abakozi b'inzego zihutirwa hamwe n'abafite ibyago byinshi byo kwibasirwa n'iki cyorezo.

Muri gahunda ya Covax, izi ni doze z'inkingo za AstraZeneca ibihugu byo mu karere bizakira, ku rutonde rw'agateganyo rwatangajwe na WHO/OMS mu kwezi gushize:

Skip Ibisomwa cane and continue reading
Ibisomwa cane

End of Ibisomwa cane

  • DR Congo: 6,948,000
  • Kenya: 4,176,000
  • Rwanda: 1,098,960 (AstraZeneca na Pfizer)
  • South Sudan: 864,000
  • Uganda: 3,552,000

Mu kwezi gushize, u Rwanda rwakingiye abantu rukoresheje inkingo bivugwa ko ari iza Pfizer, zari "doze nkeya rwabonye mu bufatanye mpuzamahanga", nk'uko byavuzwe na minisiteri y'ubuzima.

Inkingo za Covax zakirwa i Kigali mu gitondo ku wa gatatu

Ahavuye isanamu, RBA

Insiguro y'isanamu, Inkingo za Covax zakirwa i Kigali mu gitondo ku wa gatatu

Mu Rwanda hamaze gutangazwa abantu barenga 19,000 banduye Covid-19 na 265 imaze kwica.

Mu itangazo, Minisitiri w'ubuzima Dr Daniel Ngamije yavuze ko bafite "intego yo gukingira 30% by'abaturage b'u Rwanda kugera mu mpera ya 2021, na 60% kugera ku mpera ya 2022".

Covax ni gahunda ishyigikiwe na UN/ONU yahurije hamwe ibihugu bikagura inkingo ku nganda zazikoze hagamijwe cyane cyane kuzigeza ku bihugu bidafite amikoro yo kuzigurira ku isoko.

Iyi gahunda iteganya gutanga doze miliyari ebyiri ku bihugu 190 mu gihe kitarenze umwaka.