Somalia: Abantu benshi biciwe mu gitero cya Al Shabab kuri Hoteli i Mogadishu
Ahavuye isanamu, EPA
Perezida wa Somalia yatangaje akababaro yetewe n'urupfu rwa jenerali Mohamed Nur Galal, umwe wa mu baguye mu gitero cy'umutwe Al Shabab kuri hoteli iri mu murwa mukuru Mogadishu.
Umubare mushya w'abapfuye ni abantu 10 biciwe muri icyo gitero cy'ibiturika cyakurikiwe no kurasana, cyabaye ejo ku cyumweru nimugoroba, nk'uko byatangajwe n'umuvugizi w'igipolisi.
Umunyamakuru wa BBC i Mogadishu avuga ko humvikanye guturika gukomeye kw'ibintu byinshi kuri iyi hoteli iri hafi y'ikibuga cy'indege mpuzamahanga cya Mogadishu.
Umutwe wa Al Shabab wahise wigamba ko ari wo wakoze icyo gitero cyifashishije imodoka itwaye ibintu biturika ikinjira ku ngufu muri hoteli mbere yo guturika.
Abarwayi bayo bamwe bahise bafata iyi hoteli ingabo zerekezayo kurwana nabo.
Mohamed Farmaajo yatangaje ko mu bapfuye harimo umugabo wahoze ari jenerali mu ngabo za Somalia.
Mu butumwa yashyize kuri Twitter agira ati: "Imana igirire impuhwe abanyasomaliya baguye muri iki gitero cya kinyamaswa, ndihanganisha abababajwe n'urupfu rwa jenerali Mohamed Nur Galal, wahoze mu ngabo za Somalia".
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Kuwa mbere muri iki gitondo, ingabo za leta zatsinze abarwanyi ba Al Shabab bari bahise bigarurira iyi hoteli, nk'uko ibiro ntaramakuru Reuters bibivuga.
Umuvugizi w'igipolisi Sadik Ali yagize ati: "Kurwanya abagabye igitero byarangiye. Abantu icyenda bapfuye harimo bane bari mu bagabye igitero, n'abasiviri 10 barakomereka."
Hoteli yatewe izwiho kuba ari ahantu hakunze guhurira abantu bo mu butegetsi bwa Somalia.
Al Shabab irwanya ubutegetsi, ikunze gukora ibikorwa nk'ibi by'ubwiyahuzi mu gutera no kwica abo mu butegetsi bw'igihugu.
