Muri Ghana barimo gutora perezida n'abadepite

Ibiro by'amatora byafunguye muri Ghana aho barimo gutora perezida mushya n'abadepite 275.

Perezida Nana Akufo-Addo arimo gushaka gutorerwa manda ya kabiri. Mu bakandida 11 bahatanye, uhabwa amahirwe menshi yo kumuhigika ni John Mahama wigeze kuba Perezida.

Aya ni amatora abaye ku nshuro ya munani kuva mu mwaka wa 1992 ubwo muri Ghana hasubiragaho demokarasi ishingiye ku mashyaka menshi.

Ibiro by'itora byafunguye saa moya za mu gitondo ku isaha yaho, byitezwe ko bifunga saa kumi n'imwe z'umugoroba zaho.

Mbere yaho, akanama k'amatora kasabye ko habaho amahoro muri aya matora na nyuma yayo.

Abanya-Ghana barenga miliyoni 17 ni bo bemerewe gutora muri aya matora.

Ingamba zo kwirinda Covid-19 zirimo gukurikizwa bikomeye. Abatambaye udupfukamunwa ntibemererwa gutora. Abantu banagiriwe inama yo guhita basubira mu ngo zabo nyuma yo gutora.

Kuva mu mwaka wa 1992, Ghana imaze gutegekwa n'abaperezida batanu no guhererekanya ubutegetsi inshuro eshatu. Ifatwa nka kimwe mu bihugu birangwamo demokarasi cyane muri Afurika y'uburengerazuba.