Leta ya Ethiopia irarega iterabwoba abatavuga rumwe nayo

Abakomeye mu batavuga rumwe na leta ya Ethiopia bari ku rutonde rw'abantu 24 iyi leta irega iterabwoba.

Ibyo birego bijyanye n'imidugararo ishingiye ku moko yakurikiye iyicwa ry'umuhanzi Hachalu Hundessa wari ukunzwe cyane wo mu bwoko bwa Oromo - bwa nyamwinshi mu gihugu - yatumye abantu barenga 150 bicwa mu mpera y'ukwezi kwa gatandatu.

Umushinjacyaha mukuru wa Ethiopia yavuze ko iryo tsinda rizagezwa mu rukiko ku wa mbere.

Abanenga Minisitiri w'intebe Abiy Ahmed bamushinja gufunga abatavuga rumwe na leta ye.

Jawar Mohammed - umuherwe ufite ibitangazamakuru wahindutse umunyapolitike utavuga rumwe na leta akaba akunzwe cyane mu rubyiruko rw'abo mu bwoko bwa Oromo - ni umwe muri abo baregwa iterabwoba.

Yatawe muri yombi mu kwezi kwa karindwi, mu bikorwa by'ihutaza byakozwe n'inzego z'umutekano za Ethiopia.

Umwunganizi we mu mategeko yavuze ko ibyo birego byatangajwe na leta ku mukiliya we ejo ku wa gatandatu nta shingiro bifite.

Bwana Jawar wahoze ari inshuti ya Bwana Abiy, anenga uyu wahawe igihembo cya Nobel cy'amahoro mu mwaka wa 2019 kuba atarakoze ibihagije ngo acyemura ibibazo bimaze igihe by'abo mu bwoko bwa Oromo, bombi bakomokamo.

Mu nkuru y'igitekerezo cye bwite yanditse mu kinyamakuru The Economist cyo mu Bwongereza muri iki cyumweru, Bwana Abiy yavuze ko abanenga amavugurura ye barimo gusarura imbuto z'ivangura rishingiye ku moko no ku madini ndetse no ku rwangano.

Abandi bamwe mu bamunenga, bamwe batari muri Ethiopia, na bo batangajwe ko bari mu itsinda ry'abacyekwaho iterabwoba.

Nkuko bikubiye mu itangazo ryatangajwe ku mbuga nkoranyambaga n'umushinjacyaha mukuru wa Ethiopia, abo na bo barezwe hashingiwe ku mategeko ahana uburiganya mu itumanaho no ku mategeko ajyanye no gutunga intwaro.

Imiryango iharanira uburenganzira bwa muntu yanenze ukuntu byafashe ibyumweru byinshi ngo leta itangaze ibyo ibarega.

Abantu batari munsi ya 166 ni bo bapfuye mu minsi yakurikiye urupfu rw'umuhanzi Hachalu mu kwezi kwa gatandatu, wishwe arashwe atwaye imodoka ye mu murwa mukuru Addis-Abeba. Yari afite imyaka 34.

Uyu muhanzi wari wubatse, yafatwaga nk'intwari mu karere ka Oromia avukamo.

Indirimbo ze zibandaga ku burenganzira bw'abo mu bwoko bwe bwa Oromo, ndetse zagiye ziririmbwa cyane mu myigaragambyo yagejeje ku kwegura kwa Minisitiri w'intebe Hailemariam Desalegn mu mwaka wa 2018.

Impamvu yatumye yicwa na n'ubu ntiramenyekana. Umuhanzi Hachalu yari yaravuze ko yagiye akangishwa ko azicwa.