Mali: Ibrahim Boubacar Keïta wahiritswe ku butegetsi 'ari mu bitaro'

Ibrahim Boubacar Keïta wahiritswe ku butegetsi muri Mali ubu ari mu bitaro mu murwa mukuru Bamako, nkuko bitangazwa n'ibiro ntaramakuru Associated Press.

Associated Press isubiramo amagambo y'abantu babiri batatangajwe umwirondoro bari ku ivuriro bivugwa ko uyu wahoze ari perezida wa Mali ari ryo ari kuvurirwamo.

Mamadou Camara wahoze akuriye ibiro by'uyu wahoze ari perezida wa Mali, yabwiye ishami rya BBC Afrique ritangaza ibiganiro mu Gifaransa ko Bwana Keïta yashyizwe mu bitaro ejo ku wa kabiri nimugoroba mu ivuriro ry'i Bamako kwivuza bisanzwe.

Yagize ati: "Perezida yashyizwe mu bitaro kwisuzumisha yakagombye kuba yarakoze mu kwezi gushize".

Yongeyeho ko gushyirwa mu bitaro kwe kwasabwe na muganga umwitaho kandi ko byitezwe ko Bwana Keïta asezererwa mu bitaro uyu munsi ku wa gatatu.

Undi muntu uri hafi y'uwo wahoze ari perezida yabwiye umunyamakuru wa BBC Abdoul Karim Ba uri i Bamako ko nyuma y'uko gusuzumwa, byitezwe ko Bwana Keïta ava muri Mali agakomereza kuvurirwa mu mahanga, ariko nta gahunda nk'iyo iremezwa kugeza ubu.

Bwana Keïta w'imyaka 75, yafunzwe iminsi 10 n'agatsiko k'abasirikare kamuhiritse.

Mu ijoro ryo ku munsi yafashwemo mu kwezi gushize kwa munani, yatangarije kuri televiziyo y'igihugu ko yeguye.

Nyuma yaje kurekurwa ku gitutu cy'amahanga, agumishwa iwe mu rugo.

Mu gihe cy'ibiganiro by'ubuhuza hagati y'intumwa z'umuryango w'ubukungu w'ibihugu byo mu burengerazuba bw'Afurika (CEDEAO/ECOWAS) n'agatsiko k'abasirikare, amagambo ye yasubiwemo mu itangazamakuru avuga ko adashishikajwe no kuba perezida.

Mbere yuko ahirikwa, abatavuga rumwe n'ubutegetsi bari bamaze amezi basaba ko yegura, bamushinja kuba intandaro yo kuzamba k'ubukungu, ruswa no kunanirwa guhashya intagondwa zigendera ku mahame akaze ya kisilamu.