Tanzania: Tundu Lissu w'ishyaka CHADEMA avuga ko ibiro byaryo 'byatwitswe n'igisasu'

Tundu Lissu, umukuru w'ishyaka Chama cha Demokrasia na Maendeleo (CHADEMA) ritavuga rumwe n'ubutegetsi, avuga ko ibiro byaryo mu mujyi wa Arusha mu majyaruguru ashyira uburasirazuba bw'igihugu "byatwitswe n'igisasu".

Bwana Lissu w'imyaka 52, avuga ko byatswitse ejo ku wa kane, habura umunsi umwe ngo agirire uruzinduko muri uwo mujyi kuri uyu wa gatanu.

Yavuze ko ibyabaye ari "iterabwoba".

Uyu munyapolitike yavuze ko uruzinduko rwe yari yateganyije n'ubundi arukomeza uyu munsi nubwo habayeho icyo gitero.

Yatangaje kuri Twitter amafoto avuga ko agaragaza ibyo biro byashenywe.

Mu kwezi gushize kwa karindwi ni bwo Bwana Lissu yasubiye muri Tanzania nyuma yo kurokoka igitero cyari kigambiriye kumuhitana mu mwaka wa 2017, akajya kwivuriza muri Kenya no mu Bubiligi.

Ni we wagenwe n'ishyaka rye nk'uzarihagararira mu matora rusange yo mu kwezi kwa cumi uyu mwaka, aho azahatana na Perezida John Pombe Magufuli w'ishyaka CCM.

Ariko Bwana Lissu yavuze ko nta cyizere afitiye akanama k'amatora ko hazabaho amatora yigenga kandi anyuze mu mucyo.