Coronavirus: U Rwanda mu bihugu 14 'byizewe' Uburayi bwemeye abashyitsi babyo
Umuryango w'ubumwe bw'Uburayi (EU/UE) umaze kwemeza ibihugu 14 bitari muri uwo muryango ababituye kuva ejo tariki 01/07/2020 bemerewe kuhagenda.
Urutondo rw'ibi bihugu ngo ruzajya ruvugururwa buri byumweru bibiri.
EU ivuga ko abaturage babyo "badateje akaga" nubwo hakiri icyorezo cya Covid-19, Abanyarwanda bari mu bemerewe, Amerika, Brazil n'Ubushinwa ntibemerewe.
Abadipolomate ba EU bavuga ko biteguye kongera Ubushinwa kuri urwo rutonde mu gihe nabwo bukoze nk'ibyo ku baturage b'ibihugu bigize umuryango w'Ubumwe bw'Uburayi.
Abongereza na bo bemerewe kujya mu bihugu bigize EU kuko bagifatwa nk'abaturage ba EU kugeza inzira yo kuwusohokamo irangiye neza tariki 31/12/2020.
Ibihugu EU ivuga ko abaturage babyo ubu bemerewe kwinjira mu bihugu bigize uwo muryango ni; Algeria, Australia, Canada, Georgia, Ubuyapani, Montenegro, Maroc, New Zealand, u Rwanda, Serbia, Koreya y'Epfo, Thailand, Tunisia na Uruguay.
Mu byashingiweho hakorwa uru rutonde, EU ivuga ko harimo uko icyorezo cyifashe n'ingamba zo kukirwanya muri ibyo bihugu, ndetse n'ibigendanye n'imibereho n'ubukungu.
Ku bigendanye n'uko icyorezo cyifashe, EU ivuga ko ibyashingiweho harimo;
- Umubare w'ubwandu bushya bwa Covid-19 ku baturage 100,000, mu minsi 14 ishize
- Igipimo cy'abandura kigereranyije cyangwa kiri kumanuka mu minsi 14 ishize.
- Umuhate mu kurwanya Covid-19 hashingiwe ku makuru atangwa, gupima, gukurikirana abahuye n'abanduye, kuvura, gutanga amakuru, no kwizerwa kw'amakuru yatanzwe.
EU ivuga ko inashingira ku makuru atangwa n'intumwa zayo mu bihugu.
Mu Rwanda, kuva tariki 14 z'uku kwezi kwa gatandatu minisiteri y'ubuzima igaragaza ko hafashwe ibipimo byose hamwe 52,593 muri byo habonetse abanduye 460.
