Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Coronavirus: Icyemezo cyo guca ingendo ziva i Burayi zijya muri Amerika cyatangiye gukurikizwa
Icyemezo cya Perezida Donald Trump wa Leta Zunze Ubumwe z'Amerika cyo kubuza kugera muri Amerika abantu bo mu bihugu 26 by'i Burayi, nk'ingamba yo guhangana n'icyorezo cya coronavirus, cyatangiye gukurikizwa uyu munsi.
Icyo cyemezo kireba ibihugu bihuriye mu karere k'umupaka ufunguye ka Schengen, ariko hatarimo Ubwongereza, Repulika ya Ireland n'abaturage b'Amerika basubira iwabo.
Ibyo bihugu ni Autriche (Austria), Ububiligi, Czech Republic, Denmark, Estonia, Finland, Ubufaransa, Ubudage, Ubugereki, Hongrie (Hungary), Iceland, Ubutaliyani, Latvia, Liechtenstein, Lithuania, Luxembourg, Malta, Ubuholandi, Norvège (Norway), Pologne (Poland), Portugal, Slovakia, Slovenia, Espanye, Suède (Sweden) n'Ubusuwisi.
Bwana Trump yanatangaje ko igihugu kiri mu bihe bidasanzwe ndetse atanga miliyari zigera kuri 50 z'amadolari y'Amerika zo kwifashishwa mu guhangana na coronavirus.
Muri Amerika ubu habarirwa abantu bagera hafi ku 2,000 bemejwe ko banduye Covid-19 - indwara y'ifata mu myanya y'ubuhumekero iterwa n'ubu bwoko bushya bwa coronavirus. 43 imaze kubica.
Ubutegetsi bwa Bwana Trump bumaze igihe bunengwa kunanirwa guha abaturage b'Amerika ibikoresho bihagije byo kuyipima.
Mu yandi makuru yo kuri uyu wa gatandatu:
- Mu gihugu cya New Zealand, Minisitiri w'intebe Jacinda Ardern yavuze ko umuntu uwo ari we wese uzinjira muri icyo gihugu guhera saa sita z'ijoro ejo ku cyumweru agomba kwishyira mu kato mu gihe cy'iminsi 14; abantu bava mu birwa bito byo mu majyepfo y'inyanja ya Pasifika bazasonerwa
- Muri Australia, umubare w'abemejwe ko bayanduye wazamutse bagera kuri 200, n'abandi batatu yishe
- Mu Bushinwa, abategetsi batangaje ko abantu 13 yabishe naho abandi 11 bashya barayandura
- Koreya y'epfo yatangaje abantu benshi bayorohewe (abantu 204) kuruta abayanduye bashya - ibintu bibaye ku munsi wa kabiri wikurikiranya
- Colombia yatangaje ko iza gufunga umupaka uyihuza na Venezuela ku isaha ya saa kumi n'imwe za mu gitonso zaho (ni ukuvuga saa sita z'amanywa zo mu Rwanda no mu Burundi) ndetse ikabuza kuyinjiramo buri mugenzi wese uherutse i Burayi cyangwa ku mugabane w'Aziya
- Mu Bwongereza, inama zihuza abantu mu kivunge cyangwa ibindi bihuza abantu mu kivunge bishobora guhagarikwa guhera mu ntangiriro y'icyumweru gitaha, nkuko amakuru atangwa na bamwe mu bategetsi bo muri leta y'Ubwongereza abivuga
Nanone kandi, ejo ku wa gatanu Amerika yahamagaje ambasaderi w'Ubushinwa muri Amerika mu kwamagana amagambo yavuzwe n'umutegetsi w'Ubushinwa wo mu rwego rw'ububanyi n'amahanga (diplomat) avuga ko Amerika ari yo yateje coronavirus mu Bushinwa.
Ubu bwoko bushya bwa coronavirus bwatangiriye mu ntara ya Hubei mu Bushinwa mu mpera y'umwaka ushize.
Ariko umubare w'abayandura buri munsi mu Bushinwa ukomeje kugenda ugabanuka, Uburayi bukaba ari ryo "zingiro" rishya ry'iki cyorezo.
Ejo ku wa gatanu, Ubutaliyani bwagize umubare munini wa mbere w'abo yishe - abantu 250 mu gihe cy'amasaha 24, bituma umubare w'abo imaze kwica muri icyo gihugu bagera ku 1,266 n'abandi 17,660 bamaze kuyandura.
Mu rwego rwo guhuza neza uburyo byo kurwanya coronavirus, abategetsi bo mu bihugu 7 bikize kurusha ibindi ku isi - bihuriye mu itsinda rizwi nka G7 - bazakora inama y'igitaraganya ku wa mbere, inama bazakora mu buryo bw'amashusho bategeranye imbona nkubone (videoconference).
