Eritrea ishinja ubutasi bw'Amerika bwa CIA gushaka guhirika ubutegetsi

Eritrea ivuga ko yatahuye ibimenyetso by'umugambi wa Leta Zunze Ubumwe z'Amerika wo mu mwaka wa 2011 wari ugamije guhirika ubutegetsi bw'iki gihugu.

Itangazo ryasohowe ku munsi w'ejo ku wa gatanu na minisiteri y'itangazamakuru ya Eritrea, rinashinja Israel gufasha mu guhindanya isura ya Eritrea mu mahanga.

Ntibigaragara icyatumye habaho uku kwikoma kutari gusanzwe kwa Eritrea, ariko leta ivuga ko yabonye "inyandiko z'ibanga" zakoreshejwe n'abacuze uwo mugambi.

Eritrea ishinja urwego rw'ubutasi bwo hanze rw'Amerika rwa CIA gucura umugambi wo kugumura ngo habeho kwigomeka ku "butegetsi n'imyigaragambyo" nkuko byagenze mu mpinduramatwara yo mu bihugu bimwe by'Abarabu yamenyekanye ku izina rya 'Arab Spring'.

Iryo tangazo rya leta ya Eritrea - ryasohowe mu rurimi rwa Tigrinya - rivuga ko bamwe mu bakozi b'ibiro by'ububanyi n'amahanga by'Amerika, batangajwe amazina, bakoze "inama mu ibanga" mu murwa mukuru Nairobi wa Kenya.

Rinavuga ko "maneko" zanatekereje ku gukoresha ingufu za gisirikare zimeze nk'izakoreshejwe mu guhirika Muammar Gaddafi wahoze ategeka Libya.

Eritrea kandi ishinja urwego rw'ubutasi rwa Israel ruzwi nka 'Mossad' gukwirakwiza amakuru atari ukuri avuga ko Eritrea ifatanya n'imitwe y'iterabwoba ikorera mu karere k'uburasirazuba bwo hagati.

Nta gihamya ihari yuko hari hariho uwo mugambi, kandi leta ya Eritrea nta nyandiko yatangaje zo guhamya ibyo ivuga.

Amerika imaze igihe yamagana icyo ivuga ko ari ihonyorwa ry'uburenganzira bwa muntu muri Eritrea.

Ivuga ko icyo gihugu - gitegekwa na Perezida Isaias Afwerki kuva cyabona ubwigenge mu mwaka wa 1993 - kirangwamo "ubutegetsi bw'ikandamiza".