Turukiya – Syria: Trump ati: 'Si umupaka wacu. Ntabwo dukwiye kuhapfira'

Perezida Donald Trump wa Leta Zunze Ubumwe z'Amerika yavuze ko ibitero bya Turukiya muri Syria "atari umupaka wacu [wo kurwanaho]", anavuga ko abarwanyi b'aba-Kurdes bahoze ari inshuti z'Amerika "atari abamalayika".

Amerika iri kotswa igitutu bikomeye kubera gukura ingabo zayo muri Syria, bamwe bavuga ko byahaye uruhushya Turukiya rwo kugaba ibitero hakurya y'umupaka muri Syria ku barwanyi b'aba-Kurdes.

Bwana Trump yabwiye abanyamakuru mu biro bye bya White House ko Amerika "atari umupolisi" w'isi.

Ati: "Igihe kirageze ngo dusubire mu rugo".

"Bafite ikibazo ku mupaka. Ntabwo ari umupaka wacu. Ntabwo dukwiye kuhapfira".

Yavuze ko ibiri kubera ku mupaka wa Turukiya na Syria ari "byiza mu guteganya kw'igihe kiri imbere" kuri Amerika.

Ati: "Abasirikare bacu ntabwo bari yo. Abasirikare bacu bari amahoro cyane. [Na bo] Bagomba kwirwariza. Wenda bashobora kubigeraho batarinze kurwana".

"Turi kubikurikirana kandi turi mu biganiro byo kugerageza gutuma Turukiya ikora igikwiye, kuko nubwo bimeze gutyo twakwifuje guhosha intambara".

Perezida Recep Tayyip Erdogan wa Turukiya yanze ubusabe bw'Amerika bwo gutanga agahenge.

Igitutu cy'inteko

Inteko ishingamategeko umutwe w'abadepite yatoye ku bwiganze yamagana icyemezo cya Perezida Trump cyo gukura ingabo z'Amerika muri Syria.

Abo mu ishyaka ry'abademokarate n'abo mu ishyaka ry'abarepubulikani rya Bwana Trump bamaganye icyo cyemezo.

Nancy Pelosi, umukuru w'inteko umutwe w'abadepite, nyuma yaho yabwiye abanyamakuru ko Trump "yituye hasi" ubwo yari mu nama n'abakuru b'inteko inshingamategeko yiga kuri Syria.

Yavuze ko iyo nama abanyapolitike bo mu ishyaka ry'abademokarate bagezeho bakayivamo itarangiye.

Bivugwa ko bayivuyemo nyuma yaho Bwana Trump yise Madamu Pelosi "umunyapolitike wo ku rwego rwo hasi", nkuko bivugwa na senateri Chuck Schumer wo mu ishyaka ry'abademokarate.

Ku ruhande rwe, Bwana Trump na we yashinje Madamu Pelosi nk'ibyo.

Ariko abakuru bo mu ishyaka ry'abarepubulikani bavuze ko Madamu Pelosi yagize imyitwarire "idakwiye", ndetse bamunenga ko "yivumbuye akava mu nama".

Mu cyumweru gishize ni bwo Turukiya yatangiye kugaba ibitero mu majyaruguru ya Syria ivuga ko ishaka kwirukana abarwanyi b'aba-Kurdes bo muri Syria ngo ishyireho "akarere gatekanye" ku mupaka.

Ivuga ko ibyo byatuma ishobora gusubiza iwabo impunzi z'Abanya-Syria zigera kuri miliyoni ebyiri, kuri ubu ziba muri Turukiya.

Ibitero bya Turukiya muri Syria byatangiye ku wa gatatu y'icyumweru gishize Amerika imaze gukura ingabo zayo mu majyaruguru ya Syria.

Abarwanyi b'aba-Kurdes bagize uruhare rukomeye mu gufasha Amerika mu rugamba rwo kurwanya umutwe wiyita leta ya kisilamu (IS) muri Syria.

Bashinja Amerika "kubatererana" mu gukura ingabo zayo muri ako karere ko muri Syria.

Kuri ubu hari ubwoba ko umutekano mucye muri aka karere ushobora gutuma umutwe wa IS wongera kwisuganya.