Abategetsi b'Afurika bitabiriye gusezera bwa nyuma kuri Robert Mugabe

Abakuru b'ibihugu bo muri Afurika bateraniye i Harare mu murwa mukuru wa Zimbabwe gusezera ku murambo wa Robert Mugabe wahoze ari Perezida.

Mu kibuga cy'umupira gikuru cy'igihugu aho uyu muhango wabereye, umurambo we watambukijwe uherekejwe n'itsinda rya muzika rya gisirikare.

Iki kibuga gifite ubushobozi bwo kwakira abantu 60,000, ariko kimwe cya kane cyacyo cyonyine ni cyo cyari cyuzuye.

Mugabe afatwa nk'intwari, gusa hari Abanya-Zimbabwe benshi bari bavuze ko batitabira uyu muhango mu kwigaragambiriza ibikorwa by'ikandamiza byaranze imyaka ya nyuma y'ubutegetsi bwe.

Abakuru n'abahoze ari abakuru b'ibihugu barenga icumi bitabiriye uyu muhango.

Barimo nka Perezida Cyril Ramaphosa w'Afurika y'Epfo, Perezida Uhuru Kenyatta wa Kenya na Perezida Theodore Obiang Nguema Mbasogo wa Equatorial Guinea.

Uyu muhango uje ukurikira ubushyamirane bwari bwabayeho hagati ya leta ya Zimbabwe n'umuryango wa Bwana Mugabe ku hantu azashyingurwa.

Ku munsi w'ejo ku wa gatanu nibwo impande zombi zumvikanye ko azashyingurwa mu irimbi ry'intwari.

Bwana Obiang, wageze ku butegetsi mu mwaka wa 1979 ubu akaba amaze kurenza imyaka 37 Bwana Mugabe we yamaze ku butegetsi, yavuze ko "yari umutegetsi ntagereranywa ku mugabane w'Afurika" ndetse ashimagiza gahunda ye itavugwaho rumwe yo kwigarurira amasambu ya banyamucye b'abazungu.

Ati: "Abaturage ba Zimbabwe bazahora iteka bishimira ko yambuye ubutaka abazungu akabuha abaturage be".

Cyo kimwe na Bwana Obiang, abaturage benshi ba Zimbabwe barimo guhitamo kumwibukira ku byo yagezeho, birengagiza ibikorwa by'urugomo muri politike n'akavuyo mu bukungu karanze kugundira ubutegetsi kwe, nkuko bivugwa n'umunyamakuru wa BBC Andrew Harding.

'Igihugu cyacu kiri mu marira'

Uwamusimbuye, Perezida Emmerson Mnangagwa - wari wicaye inyuma gato ho imyanya ibiri uvuye kuri Grace Mugabe, umupfakazi wa Bwana Mugabe, yavuze ko "yari umuntu ureba kure".

Yongeyeho ati: "Igihugu cyacu kiri mu marira".

Ariko hari benshi i Harare batitabiriye uyu muhango, mu gihe ibiciro by'ibya nkenerwa by'ibanze mu buzima bikomeje kwiyongera ndetse n'ibura ry'akazi mu gihugu.

Umwe mu bahatuye yabwiye ibiro ntaramakuru AFP ati: "Ubu turishimye kurushaho kuko atagihari. Ni iki cyatuma njya kumusezeraho? Nta lisansi [essence] mfite".

Ati: "Nta kintu kijyanye na we tugishaka kumva. Ni we waduteye ibibazo dufite".

Mugabe azashyingurwa hehe? Ryari?

Bwana Mugabe azashyingurwa mu irimbi ry'intwari z'igihugu riri i Harare, nkuko bivugwa n'umuryango we, nyuma y'ukutumvikana hagati yawo na leta kwari kwabayeho ku hantu azashyingurwa.

Leo Mugabe, mwishywa we akaba n'umuvugizi w'umuryango, yavuze ko ibyo bikwiye kuba mu gihe kigera hafi ku kwezi kumwe kuri imbere, nyuma yo kuzura kw'ahantu hashya hagenewe Mugabe muri iri rimbi ry'intwari.

Ibyateganyagwa mbere byo kumushyingura ejo ku cyumweru bisa nk'ibyaburijwemo.

Bwana Mugabe yapfuye ku itariki ya 6 y'uku kwezi kwa cyenda afite imyaka 95 y'amavuko, apfira mu bitaro byo muri Singapour aho yari amaze amezi yivuriza.

Umurambo we ubu uri ku kibuga cy'umupira cya Rufaro i Harare aho usezerwaho kuri uyu wa gatandatu.