Abategetsi ba Pakistani bavuga ko abagabye igitero kuri hoteli Pearl-Continental bishwe

Abategetsi ba Pakistani bavuga ko abagabo batatu bitwaje imbunda bagabye igitero kuri hoteli iri mu cyiciro cy'inyenyeri eshanu yo mu ntara ya Balochistani ku munsi w'ejo ku wa gatandatu bakica umuntu umwe ucunga umutekano, bishwe barashwe n'inzego z'umutekano z'iki gihugu.

Icyo gitero cyagabwe kuri hoteli Zaver Pearl-Continental yo mu mujyi wa Gwadar uri ku cyambu, cyamaze amasaha menshi.

Umuvugizi w'iyi hoteli yavuze ko nta bashyitsi bari bayirimo kandi ko hari abakozi bacye kubera iki gihe cy'ukwezi kwa Ramadani ku bayisilamu. Ariko mbere yaho, hari amakuru yavugaga ko abari muri hoteli bahungishijwe ntawugize ikibazo.

Intagondwa zo mu mutwe uvuga ko uharanira ubwigenge bw'intara ya Balochistani zavuze ko ari zo zagabye icyo gitero.

Balochistani ni yo icyennye cyane ndetse yasigaye inyuma cyane mu iterambere kurusha izindi ntara za Pakistani.

Uyu mutwe wavuze ko iyi hoteli, ibonwa nk'ikimeyetso cy'ishoramari ry'Ubushinwa muri iki gihugu ribarirwa muri za miliyari z'amadolari y'Amerika, yagabweho igitero hagambiriwe Abashinwa n'abandi bashoramari.

Intagondwa zo muri uyu mutwe zamagana ishoramari rikorwa n'Ubushinwa muri iki gihugu, zikavuga ko abaturage baribonamo inyungu nke.

Ku rubuga nkoranyambaga rwa Twitter, ibiro by'uhagarariye Ubushinwa muri Pakistani byamaganye icyo gitero, kibaye hashize ibyumweru abandi bagabo bitwaje imbunda bishe abantu 14, barimo n'abasirikare 11, muri ako karere.

Byagenze gute muri icyo gitero?

Abagabo bitwaje imbunda bateye iyo hoteli, ikunze kugira abakiliya b'abanyamahanga ndetse n'abategetsi bakuru bo muri leta, nyuma gato ya saa kumi n'iminota 50 ku mugoroba, bica ushinzwe gucunga umutekano wageragezaga kubahagarika ku muryango.

Nuko nyuma abashinzwe umutekano binjira muri iyo hoteli batangira kurasana n'izo ntagondwa, mbere yuko, nkuko abategetsi babivuga, aba bashinzwe mutekano bazikubira ku madarage yerekeza ku igorofa rya nyuma ry'iyo hoteli.