Umukuru w'igisirikare cya Sudani yasezeranyije 'kurandura ubutegetsi' bwa Omar al-Bashir

Uyoboye by'inzibacyuho akanama ka gisirikare muri Sudani yasezeranyije "kurandura ubutegetsi" bwa Omar al-Bashir nyuma y'iminsi ibiri uyu ahiritswe ku butegetsi yari amazeho imyaka hafi 30.

Ubwo yavugiraga kuri televiziyo y'igihugu, Liyetona Jenerali Abdel Fattah Abdelrahman Burhan yavuze ko hagiye kuvugururwa inzego za leta, igihe cy'umukwabu wa nijoro kikavaho ndetse abafungiwe ibitekerezo bya politiki bagafungurwa.

Imyigaragambyo yarakomeje nubwo bwose igisirikare cyahiritse Bwana Bashir ku wa kane w'iki cyumweru.

Abigaragambya basabye ko ubutegetsi buhabwa abasivile ndetse basezeranya ko bazaguma mu mihanda.

Jenerali Burhan, wasimbuye uwayoboye ihirikwa ku butegetsi rya Bwana Bashir nyuma yaho yeguriye ku wa gatanu, yanaseshe abahagarariye ubutegetsi mu ntara za Sudani ndetse asezeranya ko azubahiza uburenganzira bwa muntu.

Yavuze ko igisirikare cya Sudani "kizabumbatira amahoro, ituze n'umutekano" mu gihugu hose mu gihe cy'inzibacyuho cyamaze gutangira giteganyijwe kumara imyaka ibiri, kigakurikirwa n'amatora, ubundi ubutegetsi bugashyirwa mu maboko y'abasivile.

Mu ijambo ryumvikanyemo imvugo irushijeho koroshya, Jenerali Burhan yanasabye abatavuga rumwe n'ubutegetsi "kudufasha mu kugarura ubuzima busanzwe" ndetse asezeranya ko abishe abigaragambya bazacirwa imanza, anavuga ko azahashya ruswa.

Ihirikwa ku butegetsi rya Bwana Bashir ryaje rikurikira imyigaragambyo imaze amezi, yatangiye mu kwezi kwa cumi na kabiri k'umwaka ushize wa 2018, abigaragambya binubira izamuka ry'ibiciro birimo n'iry'ibicuruzwa by'ibanze nkenerwa mu buzima, nk'igiciro cy'umugati n'icy'ibikomoka kuri peteroli.