Imibare y'ibanga ibarirwa muri za miliyoni y'abakoresha Facebook yamenywe n''ibihumbi' by'abakozi bayo

Amakuru avuga ko imibare y'ibanga (passwords) ibarirwa muri za miliyoni y'abakoresha urubuga nkoranyambaga rwa Facebook yagiye ku karubanda ikabonwa n'abakozi ibihumbi 20 b'iyi kompanyi y'ikoranabuhanga yo muri Leta Zunze Ubumwe z'Amerika.

Brian Krebs, umushakashatsi ku mutekano wo ku mbuga za interineti, ni we watangaje bwa mbere ayo makuru yo kunanirwa kurinda iyo mibare y'ibanga, bigatuma igera kuri miliyoni 600 igaragara yanditse mu buryo bosomeka neza.

Avuga ko iyo mibare y'ibanga yagiye ku karubanda ishobora kuba ari iyo guhera mu mwaka wa 2012.

Mu itangazo bwasohoye, ubuyobozi bwa Facebook buvuga ko ubu noneho bwacyemuye "ikibazo gito cyari cyavutse" kigatuma imibare y'ibanga ibikwa ku mashini isanzwe ikoresha mu kazi kayo gasanzwe ko mu biro byayo.

Mu nyandiko irambuye, Bwana Krebs avuga ko umuntu ukora muri kompanyi ya Facebook yamubwiye ku "kunanirwa gucunga umutekano" w'imibare y'ibanga.

Avuga ko ibyo byatumye bamwe mu bakozi ba Facebook bashobora gukora porogaramu (apps) zituma bamenya imibare y'ibanga bakanayibika batabanje kuyishyira mu buryo bw'ibanga.

Ibibazo ku kurinda amakuru y'abayikoresha

Ubuyobozi bwa Facebook buvuga ko bwari bwaratahuye icyo kibazo mu kwezi kwa mbere k'uyu mwaka, mu igenzura ry'umutekano busanzwe bukora.

Aya makuru aje mu gihe Facebook imaze igihe ihatwa ibibazo ku kuntu irinda amakuru y'abayikoresha.

Mu kwezi kwa cyenda mu mwaka ushize wa 2018, Facebook yatangaje ko amakuru y'abayikoresha bagera kuri miliyoni 50 yagiye ku karubanda kubera ikibazo cy'umutekano yagize.

Mbere yaho muri uwo mwaka wa 2018, yahishuye ko amakuru y'abayikoresha babarirwa muri za miliyoni yageze mu maboko ya kompanyi Cambridge Analytica yakoraga ubushakashatsi ku makuru yo kuri interineti.