Inkubi y'umuyaga Idai yahitanye ababarirwa mu macumi muri Zimbabwe na Mozambique

Abategetsi bavuga ko inkubi y'umuyaga udasanzwe uvanze n'imvura wagurukanye amateme n'ingo mu burasirazuba bwa Zimbabwe, wica abantu bagera kuri 24.

Uyu muyaga wiswe Idai watumye umuriro w'amashanyarazi ubura ndetse n'itumanaho rirahagarara mu bice bimwe byo mu ntara ya Manicaland ihana imbibi n'iguhugu cya Mozambique. Abantu bagera kuri 40 baburiwe irengero.

Abantu bataye ingo zabo bahungira mu bice bihanamye by'umusozi bategereje kurokorwa, ariko imiyaga ikaze yakomye mu nkokora ingendo z'indege nto za kajugujugu ziri kwifashishwa mu butabazi.

Ubwo uyu muyaga watangiraga guhuha muri Mozambique ku wa kane w'iki cyumweru, wahitanye abantu bagera kuri 19.

Mbere yuko utangira, imyuzure yibasiye ibice bitandukanye by'icyo gihugu yari yamaze guhitana abandi bagera hafi kuri 70.

Minisiteri y'itangazamakuru ya Zimbabwe yatangaje ko umujyi wa Chimanimani mu ntara ya Manicaland uri mu icuraburindi. Iyi minisiteri yongeyeho ko igisirikare cy'iki gihugu ari cyo kiyoboye ibikorwa by'ubutabazi.

Biteganyijwe ko umubare w'abahitanywe n'iyi nkubi y'umuyaga ushobora kwiyongera, mu gihe abategetsi bakomeje kugenzura ibyo yangije.

Jacob Mafume, umuvugizi w'ishyaka ritavuga rumwe n'ubutegetsi bwa Zimbabwe rya Democratic Change, yavuze ko "amakuba akomeye yadutse" mu burasirazuba bw'iki gihugu.

Iyi nkubi y'umuyaga yanibasiye Mozambique aho imiyaga yahuhaga ku muvuduko w'ibirometero 177 ku isaha. Ishyira mu icuraburindi ingo z'abaturage barenga ibihumbi 500 bo mu mujyi wa Beira ukora ku cyambu, ukaba ari umwe mu mijyi minini cyane y'iki gihugu.

Imihanda yaho yarengewe n'imyuzure ndetse n'ikibuga cy'indege kirafungwa.

Mu bihe byashize, Mozambique yibasiwe n'inkubi z'imiyaga ikomeye, harimo uwiswe Eline wo mu mwaka wa 2000 wahitanye abantu 350 naho abandi ibihumbi 650 bagata izabo.

Uyu mujyi wa Beira akenshi wakunze gushegeshwa n'imiyaga. Wari warashyizeho ibikorwa-remezo bitandukanye byo kubuza ko amazi azamuka bitewe n'imihindagurikire y'ikirere.