Perezida Bouteflika w'Algeria yaburiye ko haba 'akaduruvayo' mbere y'imyigaragambyo imwamagana

Inyandiko gusa
Kuri ubu, Bwana Bouteflika uri ku butegetsi guhera mu mwaka wa 1999, asigaye abonwa gacye cyane mu ruhame

Ahavuye isanamu, Getty Images

Insiguro y'isanamu, Kuri ubu, Bwana Bouteflika uri ku butegetsi guhera mu mwaka wa 1999, asigaye abonwa gacye cyane mu ruhame

Perezida Abdelaziz Bouteflika w'Algeria yaburiye ko hari ibyago byuko haba "akaduruvayo", mu gihe hakomeje imyigaragambyo yitabirwa n'imbaga yo kwamagana umugambi we wo kongera kwiyamamaza.

Mu ibaruwa yatangajwe n'ibiro ntaramakuru APS bya leta y'Algeria, Bwana Bouteflika w'imyaka 82 y'amavuko yashimagije abigaragambya kubera "kugaragaza ibitekerezo byabo mu mahoro".

Ariko yasabye ko habaho kugira "ubushishozi" ku gishobora kubaho muri iyo myigaragambyo cyo gucengerwamo n'imbaraga "zo mu gihugu n'izo mu mahanga".

Mu kwezi gushize kwa kabiri, Bwana Bouteflika yatangaje ko aziyamamariza manda ya gatanu mu matora ya perezida ateganyijwe kuba mu kwezi gutaha kwa kane.

Amaze imyaka 20 ategeka Algeria, ariko asigaye aboneka gacye cyane mu ruhame kuva yarwara indwara y'imitsi yo mu bwonko mu mwaka wa 2013.

Mu kwezi gushize kwa kabiri, yatangaje ko azongera kwiyamamaza, biteza imyigaragambyo mu mijyi y'iki gihugu yitabiriwe n'abantu batandukanye barimo abanyeshuri, abacamanza n'abanyamakuru.

Biteganyijwe ko kuri uyu wa gatanu haba indi myigaragambyo.

Mu yindi baruwa, Bwana Bouteflika yavuze ko yongeye gutorwa yakwegura mbere y'igihe, ariko imyigaragambyo yarakomeje.

Skip Ibisomwa cane and continue reading
Ibisomwa cane

End of Ibisomwa cane

Ku wa kane w'iki cyumweru, abacamanza bigaragambya bigabije imihanda yo mu murwa mukuru Alger

Ahavuye isanamu, Getty Images

Insiguro y'isanamu, Ku wa kane w'iki cyumweru, abacamanza bigaragambya bigabije imihanda yo mu murwa mukuru Alger

Perezida Bouteflika yoherejwe mu bitaro byo mu Busuwisi ku itariki ya 24 y'ukwezi kwa kabiri uyu mwaka, abashinzwe ibikorwa byo kumwamamaza bakaba baravuze ko yagiyeyo gutanga ibizamini byo kwa muganga "bisanzwe".

Ukuriye ibikorwa byo kumwamamaza ku wa kane yabwiye ikinyamakuru El Khabar cyo muri Algeria ko ubuzima bwe "nta mpungenge" buteje.

Umuvugizi w'ibitaro bya kaminuza by'i Genève mu Busuwisi aho Bwana Bouteflika ari kwivuriza, yavuze ko ku wa kabiri w'iki cyumweru ibi bitaro byahamagawe inshuro 1500 n'abantu bashaka kumenya uko Perezida Bouteflika amerewe.

Ni nyuma yaho aho ari kwivuriza hahishuriwe n'ikiganiro Quotidien cya televiziyo yo mu Bufaransa, nkuko bitangazwa na bimwe mu bitangazamakuru bitangaza amakuru mu rurimi rw'Igifaransa.

Nubwo amakuru avuga ko nyinshi muri telefone z'abahamagaye bashakaga kumenya uko perezida amerewe, hari zimwe muri videwo zatangajwe ku mbuga nkoranyambaga zerekana guhamagara mu buryo bwa baringa kwa bamwe mu Banya-Algeria.