Umukozi wa kompanyi Zomato ishyira abakiliya amafunguro kuri moto mu Buhinde yafashwe ayaryaho

Kompanyi Zomato yo mu Buhinde ikora akazi ko kugeza amafunguro ku baba bayatumije ikayabashyikiriza ahantu hatandukanye baba baherereye iyatwaye kuri moto, yasabye imbabazi nyuma yaho videwo igaragaje umwe mu bakozi bayo arya ku mafunguro yari ashyiriye abakiliya.

Iyo videwo yafatiwe ahitwa Madurai mu majyepfo y'Ubuhinde, igaragaza umugabo wambaye umupira w'amaboko magufi wambarwa n'abakozi ba kompanyi Zomato yicaye kuri moto arya ku mafunguro yari akuye muri amwe yari ashyiriye abakiliya bari bayatumije kuri komande (commande).

Nuko nyuma akagaragara yongera kuyapfundikira akayasubiza mu cyo yari atwayemo n'andi ashyiriye abandi bakiliya.

Iyo videwo imaze kurebwa inshuro zibarirwa mu bihumbi ku mbuga nkoranyambaga.

Kompanyi Zomato yatangaje ko ifite "gahunda y'imikorere yo kutihanganira na busa" kuvogera amafunguro y'abakiliya kandi ko yamaze kwirukana uwo wari umukozi wayo wagaragaye muri iyo videwo.

Mu itangazo kompanyi Zomato yasohoye, yemeye ko iyo videwo igaragaza ko uwo mugabo yari ari kurya ku mafunguro agenewe abakiliya.

Iryo tangazo rigira riti: "Twavuganye na we birambuye kandi nubwo twumva ko byatewe n'ikosa rya kimuntu ryo kudashyira mu gaciro, twamukuye mu bakozi bacu".

Kompanyi Zomato yongeyeho ko vuba aha izashyiraho "uburyo bwo kurinda ko amafunguro avogerwa" ndetse no "guhugura abakozi bayo" nk'indi ngamba yo kurinda ko amafunguro avogerwa.