Wakwemera kuba utanze telefone yawe igendanwa ngo uhabwe ifunguro ry'ubuntu?
Ahavuye isanamu, Getty Images
Kuba abagize umuryango baba bafashije hasi gato telefone zabo zigendanwa n'ibindi byuma by'ikoranabuhanga nka tablets ngo baganire, bishobora kuba bigoye, ariko hari resitora ifite amashami abarirwa mu magana iri kugerageza kubibashishikariza.
Mu buryo bw'igerageza, ababyeyi bashaka kuba batanze ibyo bikoresho byabo by'ikoranabuhanga ngo abakozi ba resitora babe babibafashije mu gihe bari ku meza, abana babo bazajya bahabwa amafunguro y'ubuntu.
Iyi resitora Frankie & Benny's ikorera mu Bwongereza, yatangaje ko yakuye icyo gitekerezo ku mibare igaragaza ko abana bashaka ko ababyeyi babo bamara igihe gito kuri telefone zabo zigendanwa, bakamara igihe kinini babaganiriza.
Iyi resitora itangaza ko iyo mibare igaragaza ko 10% by'abana bagerageza guhisha ibikoresho by'ikoranabuhanga nka telefone zigendanwa by'ababyeyi babo kugira ngo babiteho babaganiriza.
Kandi ngo abari ku kigero gikubye hafi kabiri icy'abo bana, bavuze ko bisa nkaho ababyeyi babo bishimira gukoresha telefone zigendanwa zabo aho kubaganiriza.
Ababyeyi barenga kimwe cya kane bemeye ko koko baba bahugiye kuri telefone zabo zigendanwa mu gihe cyo gufata amafunguro, mu gihe ababyeyi bari ku kigero cya 23% bemeye ko bari bahugiye kuri telefone zigendanwa zabo mu gihe abana babo babaga bababwira inkuru zuko umunsi wabagendecyeye.
Iri kusanyabikerezo, ryakozwe ku busabe bw'iyi resitora, ryabajije ababyeyi 1500 n'abana.
Mu gihe iyi resitora yise icyo kudabagiza abakiliya cyiswe "agace katarimo telefone" cyatangiye ku itariki ya 29 y'uku kwezi kwa cumi na kumwe kugera ku ya 7 y'ukwezi gutaha kwa cumi na kabiri, resitora Frankie & Benny's izajya iha abagize umuryango agasanduku ko kuba bashyizemo telefone zabo.
Ubuyobozi bw'iyi resitora bwashimangiye ko ntawuzahatirwa kubikora, ariko ko abakozi bayo "bazashishikarizwa cyane" gukangurira abayigana kubikurikiza.
Iyi resitora Frankie & Benny's ifite amashami 250, yanatangaje ko iri gerageza nirigenda neza, izatekereza ku kuba yahamishaho iyo gahunda mu buryo buhoraho.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa, 1
Bamwe mu bakoresha urubuga nkoranyambaga rwa Twitter, bishimiye iyo gahunda y'igerageza y'iyi resitora, mu gihe abandi bagaragaje impungenge zabo.
Uwitwa Alexis Martin yagize ati:
"Ntawandangira aho iyi resitora y'agatangaza iherereye n'uburyo nahagera?"
Naho Sue Lamming we yagize ati:
"Mbega igitekerezo cyiza, ariko se imiryango izamenya icyo iganira?"
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa, 2
Ariko Steve Dresser, umusesenguzi mu bucuruzi nk'ubu bwa resitora, yibajije niba yaba atari amayeri yo kuba iyi resitora yaba icececyesheje ho gato abinubira serivisi bakoresheje imbuga nkoranyambaga.
Umuvugizi w'iyi resitora yasubije agira ati:
"Twatekereje ku buryo butandukanye dushobora kuba twashishikariza abantu kuganira kurushaho igihe bari ku meza bafungura".
"Nuko dusanga guha imiryango amahirwe yo kuba baretse gukoresha ibikoresho by'ikoranabuhanga [nka telefone zigendanwa] mu gihe cy'amasaha nk'abiri gusa, ari uburyo bwiza cyane bwo kubahuza bakaryoherwa no kuba hamwe nk'umuryango".
