Turukiya yaguye iperereza ku munyamakuru Jamal Khashoggi wabuze, isaka ishyamba

Amakuru avuga ko polisi ya Turukiya ikora iperereza ku cyibazwa ko ari iyicwa ry'umunyamakuru Jamal Khashoggi, ubu noneho yongereye aho iri gukoraho iperereza.

Abategetsi ba Turukiya batatangajwe amazina bavuga ko umurambo we ushobora kuba warajugunywe mu ishyamba riri hafi aho cyangwa mu murima.

Bwana Khashoggi yaburiwe irengero nyuma yo kwinjira mu nyubako y'ibiro by'uhagarariye Arabie Saoudite muri Turukiya biri i Istanbul, hari ku itariki ya kabiri y'uku kwezi kwa cumi.

Abategetsi ba Turukiya bashinja Arabie Saoudite kuba ari ho yamwiciye. Arabie Saoudite irabikana, ikavuga ko itazi icyabaye kuri uwo munyamakuru.

Ibimenyetso byafatiwe muri iyo ambasade ndetse n'ibyafatiwe mu rugo rw'ambasaderi mu isaka ryakozwe muri iki cyumweru, biri gupimwa ngo harebwe niba bihura n'ingirabuzima-fatizo cyangwa DNA ya Bwana Khashoggi.

Mu yandi makuru, Mike Pompeo, umunyamabanga wa leta y'Amerika, yahakanye akomeje avuga ko atumvise amajwi Turukiya ivuga ko ari ikimenyetso cy'iyicwa rya Bwana Khashoggi.

Yagize ati:

"Nta gaseti [y'amajwi] mfite, [kandi] nta nyandiko-mvugo [yayo] nabonye."

Bwana Pompeo yananenze akomeje igitangazamakuru ABC News, mbere cyari cyasubiyemo amagambo y'umutegetsi wo hejuru wo muri Turukiya avuga ko Bwana Pompeo yumvise ayo majwi.

Yagize ati:

"Ibi ni ibintu bibi ku mukunzi wa Khashoggi. Iki ni ikibazo gikomeye cyane turi gukurikirana twigengesereye, rero gutangaza inkuru zitari ukuri ntawe bifasha."

Mbere Turukiya yari yatangaje ko ifite ibimenyetso by'amajwi n'amashusho ivuga ko bigaragaza iyicwa rya Bwana Khashoggi, ariko ibi bimenyetso ntibiratangazwa ku mugaragaro.

Kuburirwa irengero kwa Bwana Khashoggi kwasize icyasha gikomeye umubano hagati ya Arabie Saoudite n'ibihugu by'ishuti zayo byo muri Amerika n'i Burayi.

Steven Mnuchin, umunyamabanga wa leta y'Amerika mu by'imari, ndetse na Liam Fox, umunyamabanga wa leta y'Ubwongereza mu bucuruzi mpuzamahanga, bombi bakaba biyongereye ku bandi bategetsi bavuze ko batazitabira inama ku ishoramari ikomeye iteganyijwe kubera muri Arabie Saoudite mu cyumweru gitaha.