5 bashinjwa kugerageza kwica Abiy Ahmed, minisitiri w'intebe wa Ethiopia

Abashinjacyaha bo muri Ethiopia bashinje iterabwoba abantu batanu bacyekwaho kugerageza kwica Abiy Ahmed, minisitiri w'intebe w'iki gihugu, mu gitero cya gerenade cyagabwe muri mitingi yarimo mu kwezi kwa gatandatu uyu mwaka.

Ni igitero cyabereye mu murwa mukuru Addis-Abeba. Cyahitanye abantu babiri abandi barenga 100 barakomereka. Ariko Bwana Abiy icyo gihe ntacyo yabaye.

Abashinjwa ntacyo batangaje.

Umunyamakuru wa BBC Kalkidan Yibeltal wo mu ishami ritangaza amakuru mu rurimi rwa Amharic, yavuze ko uko ari batanu, aba bashinjwa baragaye nk'abari gutekereza byinshi ubwo bagezwaga mu rukiko ku wa gatanu.

Batangajwe ko ari Getu Girma, Birhanu Jafar, Tilahun Getachew, Bahiru Tollosa na Desalegn Teafaye.

Abashinjacyaha bavuze ko aba bashinjwa bumvaga ko Bwana Abiy atazabungabunga inyungu z'ubwoko bwa banyamwinshi muri iki gihugu bwa Oromo - nubwo bwose na we ari uwo mu bwoko bwa Oromo.

Kuva yaba minisitiri w'intebe mu kwezi kwa kane uyu mwaka, Bwana Abiy yatangije urukurikirane rw'impinduka muri politiki, mu bukungu no mu mibanire n'ibindi bihugu - ibintu byashimwe na benshi muri rusange ku isi.

Icyo gitero cya gerenade cyabaye ku itariki ya 23 y'ukwezi kwa gatandatu ubwo abantu babarirwa mu bihumbi amacumi bari bitabiriye mitingi yo kumushyigikira mu gice kizwi nka Meskel mu murwa mukuru Addis-Abeba.

Minisitiri w'intebe yahise akurwa igitaraganya aho cyabereye.

Icyo gihe yavuze ko icyo gitero ari "uburyo butahiriwe bw'abadashaka kubona Ethiopia ishyize hamwe."