Perezida Putin w'Uburusiya yavuze ko abacyekwa n'Ubwongereza kuroga uwahoze ari intasi "ari abasivile, atari abanyabyaha"

Perezida Vladimir Putin w'Uburusiya yavuze ko "nta kintu na kimwe cy'icyaha" gihari kijyanye n'abagabo batangajwe n'abategetsi b'Ubwongereza ko bacyekwaho kuroga uwahoze ari maneko w'Uburusiya Sergei Skripal n'umukobwa we baba mu Bwongereza.

Abategetsi b'Ubwongereza bavuze ko abo bagabo babiri bacyekwa ari Alexander Petrov na Ruslan Boshirov, byibazwa ko bakorera ikigo cy'ubutasi bwa gisirikare cy'Uburusiya.

Ariko Bwana Putin yavuze ko abo bagabo ari abasivile kandi ko bazagira akanya mu gihe cya vuba ko kubara iyo nkuru.

Bwana Skripal n'umukobwa we Yulia barogewe mu mujyi wa Salisbury mu Bwongereza mu kwezi kwa gatatu.

Ubwo yari mu mujyi wa Vladivostok mu burasirazuba bw'Uburusiya, Bwana Putin yagize ati:

"Tuzi abo [bagabo] ari abo, twarababonye."

Yongeyeho ati:

"Nizeye ko bazigaragaza ubwabo bakavuga buri kintu cyose. Ibi bizaba byiza cyane kuri buri wese. Nta kintu kidasanzwe gihari, nta kintu na kimwe cy'icyaha, ndabibizeje. Tuzabibona mu gihe cya vuba kiri imbere."