Abaturage bagera kuri miliyoni 4 mu Buhinde bafite ibyago byo gutakaza ubwenegihugu

Ubuhinde bwatangaje urutonde rugamije kwaka ubwenegihugu abaturage bagera kuri miliyoni enye bo muri leta ya Assam - imwe muri leta 29 zigize Ubuhinde - iri mu majyaruguru ashyira uburasirazuba bw'iki gihugu.

Ibarura ry'igihugu ry'abaturage, ni urutonde rw'abantu bashobora kugaragaza ko bageze muri iyi leta ya Assam ku itariki ya 24 y'ukwezi kwa gatatu mu mwaka wa 1971, ubwo igihugu cya Bangladesh cyavukaga.

Ubuhinde buravuga ko iki gikorwa kigamije kwirukana abimukira benshi bo muri Bangladesh baba mu Buhinde mu buryo butemewe n'amategeko.

Ariko cyateje ubwoba ko cyaba kigamije kwibasira abaturage ba nyamucye batuye muri leta ya Assam.

Abategetsi - mu gutinya ko hashobora kubaho ibikorwa by'urugomo - baravuga ko nta muntu n'umwe uzahita uhambirizwa ako kanya.

Ariko abategetsi baravuga ko hazabaho igihe kirekire cyo kujurira kuri bose - nubwo bwose ibi bivuze ko imiryango ibarirwa muri za miliyoni izaba iri mu gihirahiro kugeza imenye umwanzuro wa nyuma uvuye mu bujurire.

Ariko ibyo byose ntibihumuriza Hasitun Nissa, wavuganye n'umunyamakuru wa BBC Joe Miller, mbere yuko urutonde rutangazwa. Nta handi hantu yita iwabo yigeze amenya ubuzima bwe bwose hatari mu mirambi ikunze kwibasirwa n'imyuzure yo muri leta ya Assam.

Niho uyu mwarimukazi w'imyaka 47 y'amavuko yakuriye, niho yigiye, niho yashyingiriwe, ni naho yabyariye abana be bane.

Ariko yavuze ko yiteguye kuzasanga atari ku rutonde rw'abafite ubwenegihugu bw'Ubuhinde. Yavuze ko afite ubwoba ko yahita yamburwa isambu ye, ndetse uburenganzira bwe bwo gutora no kwishyira akizana kwe bikaba byahura n'akaga.

Ntabwo ari we wenyine. Abo mu bwoko bw'Ababengali barenga gato miliyoni enye - Ikibengali ni rwo rurimi ruvugwa na bacye muri leta ya Assam - na bo bisanze kuri iki cyiciro.

Ubuhinde butuwe n'abaturage barenga miliyari 1 na miliyoni 300.