Venezuela: ONU iravuga ko inzego z'umutekano "zishe ababarirwa mu magana"

Icyegeranyo gishya cyasohowe n'umuryango w'abibumbye kiravuga ko inzego z'umutekano muri Venezuela "zishe abantu babarirwa mu magana" bazira ubusa zikihisha inyuma yo kuvuga ko ari mu rwego rwo kurwanya ibyaha by'urugomo.

Ishami rya ONU ryita ku burenganzira bwa muntu riravuga ko rifite amakuru yizewe yuko abakora mu nzego z'umutekano muri Venezuela biraye mu duce dutuwe n'abakene bakica abasore, akenshi bakabicira mu nzu zabo.

Zeid Ra'ad Al Hussein, umuyobozi w'ishami rya ONU ryita ku burenganzira bwa muntu, yavuze ko urebye nta gukurikiza amategeko biba muri Venezuela.

Mu gihe cyashize, Venezuela yagiye yamagana ibirego bya ONU byo guhonyora uburenganzira bwa muntu, ikavuga ko ari "ibinyoma".

Venezuela yibasiwe n'amakuba mu bya politiki n'ubukungu.

Umwaka ushize, abigaragambyaga batavuga rumwe na leta bishwe barashwe.

Ubu Venezuela yugarijwe kandi no guta agaciro bikabije cyane kw'ifaranga ryayo ndetse n'ibura ry'ibiribwa.

Mu kwezi kwa gatanu, Perezida Nicolas Maduro wa Venezuela yongeye gutorerwa kuyobora iki gihugu, nyuma yaho abatavuga rumwe na leta banze kwitabira amatora.

Abaturage ba Venezuela babarirwa mu bihumbi amagana bamaze guhunga amakuba yugarije igihugu cyabo berekeza mu mahanga.