Inama y'abakuru b'ibihugu bigize AU irakomeje i Addis Abeba

Inama y'abakuru b'ibihugu bigize umuryango w'ibihugu bya Afurika yunze Ubumwe, ibera Addis Abeba muri Ethiopia, iragenda yegera umusozo.

Mu byigwa harimo ruswa, ikibazo cy'abimukira ndetse n'intambwara muri Sudani y'Amajyepfo no muri Repubulika Iharanira Demokarasi ya Congo.

Iyi nama ariko iranagaruka ku biganiro by'ubuhahirane hagati y'ibihugu bya Afurika n'ubwisanzure bw'abantu mu ngendo.

Ubusanzwe Insanganyamatsiko y'inama y'uyu mwaka yari iyo kurwanya ruswa.

Ariko imvururu zimaze imyaka 4 muri Sudani Yepfo kugeza ubu nizo zikomeje kwibandwaho mu nama.

Umukuru w'akanama k'umuryango wa Afrika Yunze Ubumwe yamaganye bikomeye impande zihanganye avuga ko hageze ko Umuryango w'Abibumbye ndetse n'Umugabane wa Afrika bafatira ibyemezo n'ibihano bikarishye abica amasezerano y'amahoro.

Abayobozi banaganiriye kandi n'Umunyamabanga Mukuru wa Onu - Antonio Guterres - ku buryo bahangana n'ikibazo cy'ubuhunzi no gutanga ibitekerezo kubyo bise kutihanganira abanyafurika bahunga ibihugu byabo.

Uyu munsi mu masaha ya nimugoroba, inama iratangira gufata ibyemezo kubijyanye no gushyiraho agace k'ubucuruzi butagira amahoro kazahuza ibihugu 55 byose bigize uwo muryango, aho umusararuro w'imbere muri ibyo bihugu ukomatanyije urenga tiririyoni ibihumbi bitatu by'amadolari.