Zanzibar: Barihanizwa ku kwibasira abakerarugendo bambaye udusamamagara

Minisitiri wo ku kirwa cya Zanzibar yaburiye abatuye icyo kirwa ku gutuka no gusagarira abakerarugendo bambaye utwenda duto cyane.

Simai Mohammed ushinzwe ubukerarugendo muri Zanzibar yabwiye BBC ko leta izafatira ingingo abaturage basagarira abakerarugendo,nyamara ari abantu b'ingenzi ku bukungu bw'iki kirwa.

Yavuze ko we ubwe yagira inama abakerarugendo "batambaye bikwiye" kandi ko "babifata neza ndetse bagakosora ikidakwiye".

Asobanura ko bimaze gukabya, yagize ati: "Iyi ngeso yo gutuka abanyamahanga ikwiye guhagarara".

Ati: "Mu duce tumwe twa Stone Town kuri Kenyatta Road, ibi bikorwa bimaze kuba byinshi cyane. Umuntu wese utuka abakerarugendo cyangwa ubabwira ngo 'subira iwanyu', nzarebana nawe bikomeye".

Umwaka ushize uwari minisitiri w'ubukerarugendo Lela Muhamed Mussa yabwiye BBC ko bamwe mu bakerarugendo baba bagenda n'amaguru mu mihanda muri Zanzibar "ari nkaho bambaye ubusa".

Icyo gihe Lela yatangaje ko abakerarugendo bambaye gutyo bazajya bacibwa amande atari munsi y'amadolari 700 y'Amerika.

Abaturage ba Zanzibar benshi batsimbaraye ku bya cyera kandi benshi ni abasilamu.

Iki kirwa gisurwa cyane n'abakerarugendo bavuye mu bice binyuranye by'isi, gusa ibikorwa byibasira abambaye utwambaro tw'imbere gusa cyangwa utugufi byakomeje kwiyongera.

Ubukerarugendo ni igice gikomeye mu byo iki kriwa kivanamo imari kandi nibwo gisata kinini kurusha ibindi gikuramo amadevize.

Mu 2020, ubukerarugendo bwinjije 28% ku musaruro mbumbe wa Zanzibar na 82% by'amadevize yinjiye kuri iki kirwa.

Zanzibar ifite leta yayo n'ubwigenge bugereranyije ku gihugu cya Tanzania.