Ukraine: EU yatangaje ko ku mpera za 2022 izaba yahagaritse kugura ibitoro byose bya Russia

Perezida wa komisiyo y'Ubumwe bw'Uburayi (EU) madamu Ursula von der Leyen yatangaje ibirambuye ku bihano bishya by'ubwoko butandatu uwo muryango w'ibihugu wafatiye ubukungu, igisirikare, n'itangazamakuru by'Uburusiya.

Ursula yavuze ko Perezida Vladimir Putin yashakaga gusiba Ukraine ku ikarita y'isi ariko atazabigeraho ahubwo igihugu cye aricyo kirimo kurohama.

Ati: "Tuzakora ku buryo tugenda duhagarika ibitoro by'Uburusiya mu buryo twe n'abafatanyabikorwa bacu tuzabona ahandi tubivana, ari nako tubikora tugabanya ingaruka zabyo ku isoko ry'isi."

Ibiciro by'ibitoro byarazamutse kubera intambara y'Uburusiya na Ukraine ndetse ingaruka zikomeye zabyo zimaze kwigaragaza no mu bihugu byo mu karere.

Ursula yavuze ko kugurira Uburusiya ibitoro bidatunganyije bigomba guhagarara mu mezi atandatu, bikanagenda gutyo ku bitoro bitunganyije n'ibibikomokaho bitarenze impera za 2022.

Nubwo Ursula yizeza ko bizakorwa mu buryo butazahungabanya isoko ry'isi, abahanga mu bukungu bavuga ko ingaruka z'ibi zishobora kuba nini ku biciro by'ibicuruzwa ku isi.

Ursula yagize ati: "Turashaka ko Ukraine itsinda iyi ntambara".

Avuga ko bagomba no gufasha kubaka Ukraine, mu gihe ubukungu bwayo bwitezwe kugwa ku kigero gishobora kugera kuri 50% mu 2022, avuga ko mu kwiyubaka ikeneye nibura miliyari €5 buri kwezi, ati: "Tugomba gutanga uruhare rwacu."

Ibihano yavuze ni ibihe?

Izindi nkuru wasoma:

Kutumvikana muri EU

Mu gihe Ursula avuga ko bagiye guhagarika kugura ibitoro by'Uburusiya, ibihugu 27 bigize EU ntacyo byumvikanye ku guhagarika kugura gas y'Uburusiya.

Hungary na Slovakia byo byanze kwemeza umwanzuro wo guhagarika kugura ibitoro by'Uburusiya kuko ariho bigura igice kinini cy'ibyo bikenera.

Ibi bihugu byombi byemerewe gukomeza kugura ibitoro by'Uburusiya kugeza mu 2023 hashingiwe ku masezerano asanzweho, nk'uko bivugwa n'ibiro ntaramakuru Reuters bivuga ko bibikesha umwe mu bategetsi.

Kuri gas y'Uburusiya kandi ibihugu bigize EU ntabwo byumvikanye ku guhagarika kuyigura - ndetse yo ntiribasirwa n'ibihano bya EU.

Ubudage bugura mu Burusiya igice kinini cya gas bukoresha, ibindi bihugu bitandukanye by'i Burayi nabwo bigura urugero runaka rwa gas y'Uburusiya.

Ayandi makuru ku ntambara

Imirwano ikomeye yiganjemo iraswa ry'ibisasu by'abarusiya yakomeje kumvikana mu bice by'uburasirazuba bwa Ukraine.

Abandi bantu baravanwa i Mariupol

Abandi basivile uyu munsi baravanwa mu mujyi wa Mariupol, nk'uko guverineri w'ako gace yabitangaje.

Pavlo Kyrylenko yanditse kuri Telegram ko ibyo bikorwa ku bufatanye na ONU hamwe na Croix Rouge.

Yavuze ko hari bisi zamaze guhaguruka muri uyu mujyi none kuwa gatatu, abo barajyanwa mu mujyi wa Zaporizhzhia ahagenzurwa n'ingabo za Ukraine.

Kugeza ubu ariko ntibiramenyekana neza niba abo ari abari bihishe mu ruganda rw'ibyuma rwa Azovstal - aho ku cyumweru havanywe abasivile ba mbere.

Ukraine ivuga ko yasubije inyuma ibitero 12 muri Donetsk na Luhansk

Ingabo za Ukraine zatangaje ko mu masaha 24 ashize zasubije inyuma ibitero 12 by'ingabo z'Uburusiya mu duce twa Donetsk na Luhansk.

Ibi bitero byaguyemo abasivile 21, nk'uko izi ngabo zibivuga.

Mu itangazo kuri Facebook, ibiro bikuru by'ingabo za Ukraine bivuga ko imirwano ikomeje mu gace ka Popasna aho ingabo z'abarusiya zateye.

Izi ngabo zivuga kandi ko Uburusiya bukomeje kurasa ibisasu ku birindiro byabo ku ruganda rw'ibyuma rwa Azovstal i Mariupol.

BBC ntiyashoboye kugenzura mu buryo bwigenga ibivugwa n'ingabo za Ukraine.