"Coronavirus iri kwerekana ko twese turi kimwe" - Patrick Nyamitari

Muri iki gihe cy'icyorezo cya coronavirus umuhanzi wo mu Rwanda Patrick Nyamitari yasohoye indirimbo yise "Love", akavuga ko iki cyorezo gikwiye gusiga isomo ry'urukundo.

Mu ndirimbo yasohoye uyu munsi kuwa gatanu, Patrick Nyamitari ntabwo aririmba uburyo bwo kwirinda no kwitwararika iki cyorezo.

Yabwiye BBC ati: "Ubwo ni ubutumwa abantu benshi bamaze kumva bihagije kandi nanjye nkomeza kubutanga, ariko numvaga hakenewe n'ubundi butumwa".

Abantu barenga miliyoni imwe bamaze kuyandura ku isi, abahanga bavuga ko aba ari abayibonye babapimye, ko bishoboka ko hari benshi bayifite batarasuzumwa.

Nyamitari avuga ko icyo abona gikenewe cyane ubu ari urukundo n'ubufatanye bw'abantu bose muri ibi bihe iyi ndwara yugarije isi.

Uburyo iyi ndwara yagiye ikwirakwira vuba ari nako yica abantu ku isi, Nyamitari avuga ko aribyo byamuteye kujya mu nganzo akavanayo iki gihangano.

Ati: "Iki cyorezo ntikiri kurobanura, ntiwavuga ngo mfite amafaranga ntikizamfata, ntiwavuga ngo uri umwera cyangwa umwirabura, nabonye rero ko ari icyorezo kizadusigira isomo ryo gukundana no kurenga ibidutanya.

"Coronavirus iri kwerekana ko twese turi kimwe, bityo twese dukwiye gukundana kandi tugafatanya".

Yagize amahirwe imusanga iwabo

Nyamitari amaze hafi imyaka ine aba akanakorera i Nairobi muri Kenya, ariko iyi ndwara yasanze ari iwabo mu Rwanda bituma agumayo.

Ati: "Nagize amahirwe iki cyorezo kiza ndi iwacu, kwakundi uvuga ngo ngiye mu Rwanda ndaza gusubira i Nairobi, ariko byageze aho bigaragara ko ntafata urugendo ngo nsubire muri Kenya".

Mu Rwanda hashize ibyumweru bibiri ubuzima busanzwe buhagaritswe mu gihugu (lockdown), hagakorwa ibintu bya ngombwa cyane gusa, ibi avuga ko ari umuti nubwo bitoroshye.

Ati: "Ingamba igihugu cyacu cyafashe ni ingamba nziza, ariko wumve ko ku rundi ari umukoro ukomeye cyane, kwicara munzu udashobora no kujya ku muhanda, ariko ni ku neza y'umuntu, ni ku neza yanjye cyangwa ya mugenzi wanjye".

Nyamitari avuga ko amajwi n'amashusho by'iyi ndirimbo byafashwe mbere gato y'uko 'lockdown' itangazwa mu Rwanda.