DR Congo: Thomas Lubanga umuntu wa mbere wakatiwe na ICC yarekuwe arangije igifungo

Thomas Lubanga wahoze ari umuyobozi w'ishyaka Union de Patriotes Congolais (UPC) yarekuwe, yasohotse muri gereza nkuru ya Makala i Kinshasa nyuma y'igifungo cy'imyaka 14.

Bwana Lubanga yahamwe n'ibyaha byo gushyira abana mu nyeshyamba no kubakoresha ibikorwa by'ubwicanyi mu gace ka Ituri mu burasirazuba bwa DR Congo hagati ya (1999-2002).

Thomas Lubanga niwe muntu wa mbere wafashwe agakatirwa n'urukiko mpuzamahanga mpanabyaha rw'i La Haye, urubanza rwe rwatangiye tariki 26/01/2009.

Yari ayoboye inyshyamba z'abo mu bwoko bw'aba - Hema zivugwaho ubwicanyi bukomeye mu makimbirane y'aba Hema n'aba Lendu.

Tariki 10/07/2012 yahamijwe ibyaha akatirwa gufungwa imyaka 14, gusa we yaburanye ahakana ibyaha aregwa.

Bosco Ntaganda, umwe mu bo bo Lubanga yari ayoboye mu nyeshyamba muri Ituri, mu kwezi kwa 11/2019 yakatiwe gufungwa imyaka 30 ku byaha birimo bimwe bisa n'ibyo Lubanga yarezwe.

Igice cya mbere cy'igifungo Lubanga yakimaze i La Haye, mukwa 12/2015 nibwo yimuriwe muri gereza ya Makala i Kinshasa.

Abantu amagana bo mu ishyaka UPC yari yarashinze bamushyigikiye baje kumusanganira asohoka muri gereza, yahise aboneza ajya mu misa ari kumwe n'umuryango we.

Yabwiye BBC ati: "Nsubiye iwanjye n'umutima ubohotse ngo mbashe kureba icyakubaka umuryango rusange".

Nubwo Lubanga akivuga ko yarenganye, abagizweho ingaruka n'intambara muri Ituri baracyasaba indishyi.

Mu rubanza rw'indishyi, urukiko rwamuciye miliyoni $10, amafaranga umwunganizi we mu mategeko yavuze ko Lubanga asashobora kuzabona.