China: Imbyaro zagabanutse ku kigero kitabayeho mu myaka 70 ishize

Ikigero cyo kubyara mu Bushinwa cyagabanutse ku kigero kitigeze kibaho mu myaka 70 ishize kuva hashingwa Repubulika ya Rubanda y'Ubushinwa, nubwo iki gihugu cyaretse politiki y'umwana umwe.

Kubyara byageze ku gipimo cya 10,48 ku baturage igihumbi mu 2019 - nicyo kiri hasi kurusha ibindi bipimo byose uhereye mu 1949 nk'uko bivugwa n'ikigo cya leta yaho cy'ibarurishamibare.

Abana miliyoni 14,6 nibo bavutse mu Bushinwa mu 2019, ni umubare wagabanutseho abana 580,000 ugereranyije n'ubushize, mugihe mu 2017 hari havutse abana miliyoni 17,8.

Imibare y'abana bavuka mu bushinwa yakomeje kugenda igabanuka mu myaka ishize, ibintu bitera impungenge ubukungu bw'iki gihugu.

Mu gihe imbyaro ziri kugabanuka, impfu nazo ziragabanuka ibi byatumye abaturage b'Ubushinwa mu 2019 bari miliyari 1,4 bavuye kuri miliyari 1,39 umwaka ushize.

Kugabanuka kw'imbyaro bitera impungenge z'uko bigera aho umubare muto w'abari mu myaka yo gukora batunga umubare munini w'abari mu kirihuko cy'izabukuru.

Igipimo cyo kubyara mu Bushinwa ubu kiri hasi ugereranyije n'icya Leta zunze ubumwe za Amerika kiri kuri 12 ku baturage igihumbi mu 2017 (imibare iheruka).

Gusa kiri hejuru y'Ubuyapani aho bari ku 8/1000.

Mu Rwanda, iki gipimo gihagaze kuri 33 ku baturage 1,000 ni ibiri mu bushakashatsi buheruka (2015) bw'ikigo cya leta cy'ibarurishamibare.

Iki gipimo muri rusange ku isi gihagaze kuri 18,85 ku baturage 1,000 mu 2017, ibi bivugwa na Banki y'isi.

Mu 1979, leta y'Ubushinwa yatangije gahunda yiswe "politiki y'umwana umwe" yari igamije kugabanya umubare w'abaturage.

Abarengaga kuri iri tegeko bacibwaga amande nko kwirukanwa kukazi. Imiryango myinshi yakoraga ibishoboka -harimo no gukuramo inda - ngo ibyare abahungu.

Iyi politiki yanenzwe gutera ubusumbane bw'ibitsina aho ubu igitsina gabo mu bushinwa kiruta igitsina gore ho miliyoni 30 ku mibare ya 2019.

Mu 2015 nibwo leta yahagaritse iyi politiki bemerera imiryango kuba yabyara abana babiri.

Gusa izi mpinduka ntabwo zashoboye kubuza igabanuka ry'imbyaro nubwo hari icyari cyazamutseho mu myaka ibiri yakurikiye 2015.

Inzobere zivuga ko izo mpinduka zitazanye na gahunda zo korohereza imiryango gutunga no kurera abana, bavuga ko imiryango myinshi itabashije gutunga umwana urenze umwe.