David Luiz wa Arsenal ejo azaza mu Rwanda

David Luiz Moreira Marinho myugariro w'ikipe ya Arsenal FC yo mu Bwongereza ejo kuwa kane azaza mu Rwanda nk'uko umuyobozi ushinzwe itumanaho wa Arsenal yabibwiye BBC.

David Luiz w'imyaka 32, azaba ari mu Rwanda kugeza ku cyumweru aje gusura ingagi ari kumwe na nyina hamwe n'umukunzi we.

Ikigo cy'u Rwanda gishinzwe iterambere kivuga ko azanasura ibikorwa by'umupira w'amaguru mu bana.

Arsenal FC ifitanye amasezerano na leta y'u Rwanda yo kwamamaza, mu mugambi wa leta y'u Rwanda wo guteza imbere ubukerarugendo.

Abatavuga rumwe n'ubutegetsi mu Rwanda bavuga ko amasezerano ya Arsenal n'u Rwanda yagizwe ibanga kuko ashobora kuba yaratanzweho amafaranga y'umurengera kuruta ibizayavamo.

Leta y'u Rwanda yo yatangaje ko kwamamaza n'ikipe ikomeye ku isi nka Arsenal ari ishoramari rizaha inyungu nini ubukungu bw'u Rwanda biciye mu bukerarugendo.

David Luiz yageze muri Arsenal muri uyu mwaka avuye muri Chelsea, agiye kuza mu Rwanda mu gihe shampiyona z'i Burayi ziri mu karuhuko kubera imikino mpuzamahanga y'amakipe y'ibihugu.

Ikipe ye ya Arsenal ubu iri ku mwanya wa gatatu ku rutonde rwa shampiyona y'Ubwongereza imaze gukinwa imikino umunani(8).

Didier Drogba wahoze akina muri Chelsea nawe azaba ari mu Rwanda mu gikorwa cya Youth Connect nk'uko abagitegura babitangaje, iki gikorwa cyatangiye uyu munsi kugeza tariki 11 z'uku kwezi i Kigali.