U Rwanda na Uganda byaba bongeye gushyamirana mu binyamakuru?

Abahagarariye ibihugu byombi hashize ibyumweru bibiri bumvikanye guhagarika 'gusebanya' mu itangazamakuru na social media, ubu hari ubwoba ko ibi byaba bishobora kongera.

I Kigali, inama ya mbere yahuje abahagarariye ibihugu byombi - nyuma y'amasezerano y'i Luanda muri Angola -abategetsi bumvikanye ko impande zombi zihagarika 'propaganda mbi' mu itangazamakuru n'imbuga nkoranyambaga.

Kuwa gatandatu, ikinyamakuru New Vision kibogamiye kuri Leta ya Uganda cyatangaje ko Perezida Paul Kagame w'u Rwanda aho yari ari mu nama i New York yabonanye na Kizza Besigye.

Bwana Besigye na Bwana Kagame bombi babaye abasirikare b'inyeshyamba za NRM zayoborwaga na Yoweri Museveni zaje gufata ubutegetsi muri Uganda mu 1986.

Bwana Besigye ubu ni umunyapolitiki ufatwa nk'uza ku isonga mu batavuga rumwe n'ubutegetsi bwa Perezida Yoweri Museveni.

New Vision yanditse ko Bwana Besigye na Bwana Kagame bakoze inama yihariye mu gihe cy'amasaha abiri, iruhande rw'inama rusange y'umuryango w'abibumbye yaberaga i New York.

Iki kinyamakuru kivuga ko cyahawe amakuru n'abo ku ruhande rwa Bwana Besigye batifuje gutangazwa, ko iyi yari inama ya gatatu ihuje aba bagabo bombi mu gihe cy'imyaka ibiri.

Mu nkuru ya New Vision, umuvugizi wa guverinoma ya Uganda yavuze ko 'Besigye ni umuntu ufite ubwisanzure bwo kujya aho ashaka no kuvugana n'uwo ashaka na Bwana Kagame abonana n'uwo ashaka'.

Minisitiri w'ubutabera w'u Rwanda Johnston Busingye yabwiye ikinyamakuru The New Times, kibogamiye ku butegetsi bw'u Rwanda, ko inkuru ya New Vision atari ukuri.

Bwana Busingye avuga ko iyo nkuru, ibangamiye amasezerano y'ubwumvikane y'i Luanda n'ayayakurikiye y'i Kigali yo ku itariki 16 z'uku kwezi.

BBC yagerageje kuvugana n'ikinyamakuru New Vision kuri iyi nkuru, kugeza ubu ntibirashoboka.

Mu makimbirane ya politiki amaze igihe hagati y'u Rwanda na Uganda, ibitangazamakuru bibogamiye kuri leta zombi, n'imbuga nkoranyambaga byarifashishijwe mu 'gusebya' no kuvuga nabi urundi ruhande.

Amakimbirane ya politiki y'impande zombi yagize ingaruka mbi ku bukungu n'imibereho by'abaturage b'ibihugu byombi.