| Bu'r criw yn ffilmio o gwmpas Merthyr i gyd. Ffilmion nhw Ti a Fi y Gyrnos ble mae Melanie yn arweinydd a ffilmion nhw Melanie King arweinydd Ti a Fi Cefn Coed yn rhoi cyngor a syniadau i'r ddysgwraig brwd. Cafodd Melanie ei ffilmio yn mynychu ei sesiwn Weight Watchers wythnosol, mae hi wedi colli 2 a hanner stôn erbyn hyn! Aeth Melanie â'r criw ar drip ar Reilffordd Aberhonddu gyda'i phlant a'u ffrindiau. Galwodd y criw i mewn i fore coffi yn y Ganolfan Gymraeg a hefyd i weld criw o ddysgwyr sydd yn cwrdd bob nos Fercher yng Ngwesty'r Imp ym Mhontmorlais. Cafodd trigolion Cymraeg Merthyr syrpreis mawr i weld Nia Parry sydd yn enwog am gyflwyno'r rhaglenni Welsh in a Week a Cariad@iaith. Mae Melanie yn dod o Essex yn wreiddiol ac mae hi bellach yn byw ym Merthyr. Mae hi'n gweithio mewn archfarchnad yn y dref ac mae ei phlant, Thomas a Mollie yn mynychu Ysgol Gymraeg Santes Tudful. Dechreuodd Melanie ddysgu Cymraeg mewn dosbarthiadau nos yn Ysgol Santes Tudful. Mae hi wedi bod yn dysgu ers dwy flynedd. Daeth Melanie mewn i ymweld â mi heddiw i siarad am ei phrofiad o ffilmio'r rhaglen. Gofynnais i pam benderfynodd hi gymryd rhan yn y rhaglen. Atebodd hi gan ddweud,"Pryd symudais i i Gymru yn gyntaf, tair blynedd yn ôl, welais i Welsh in a Week ar S4C. Roeddwn i'n trio dysgu Cymraeg ar fy mhen fy hun yn y tŷ ar y pryd a roedd hi'n anodd iawn. Penderfynais i i ymuno â dosbarth Cymraeg i Oedolion a dywedais byddai i ar Welsh in a Week un diwrnod! Pan welais i hysbyseb ar ddiwedd cyfres o raglenni Welsh in a Week penderfynais drio amdani." Gofynnais i beth oedd ei hoff beth am gymryd rhan. Dywedodd hi "Fy hoff agwedd o gymryd rhan oedd clywed pobl yn siarad ac yn chwerthin yn Gymraeg yn naturiol, roedd hwn yn ddylanwadol iwwn." "Roedd trio dysgu'r gân 'Mynd ar y Ceffyl' i Nia Parry yn ddoniol iawn. Hefyd pan ddaeth y criw i ffilmio fi yn gwerthu pysgod yn Tesco's a hedfanodd brithyll mas o fy llaw a glaniodd e ar y llawr o flaen pawb! Gofynnais i oedd unrhyw beth hoffai hi anghofio am y ffilmio. Atebodd hi "Pryd aethon ni i'r Imp i ffilmio gyda dysgwyr ces i sawl glasiad o win gan fod Nia yn prynu nhw un ar ôl y llall. Pryd es i adref ar ddiwedd y noson ffilmiais i fy hun ar ddyddiadur fidio. Roeddwn i wedi meddwi a does dim syniad gyda fi beth ddywedais i. Dwi'n gobeithio bydden nhw ddim yn dangos hwn ar y rhaglen!" Gofynnais i os oedd cynwyd rhan yn y rhaglen wedi ei sbarduno hi i gario mlaen gyda Dysgu Cymraeg. Atebodd Melanie yn frwd -"Yn bendant! Cefais gymaint o hwyl, mae'n rhaid i mi gario ymlaen. Fy mwriad yw i ddysgu Cymraeg i bobl eraill un diwrnod." Ga'i ddiolch i Melanie am rannu ei phrofiadau gyda ni a dymuno pob hwyl iddi wrth ddysgu'r iaith Gymraeg - dalia ati Mel!! Darlledwyd rhaglen Melanie nos Sul 10fed o Hydref am 5 o'r gloch ar S4C. Mae boreau coffi pob dydd Mawrth yn y Ganolfan Gymraeg o 11.30 tan 12.30 Mae dysgwyr yn cwrdd yng Ngwesty'r Imp ym Mhontmorlais pob nos Fercher am 9 o'r gloch. Mae croeso cynnes wythnosol i bawb sydd yn dysgu neu yn defnyddio'r Gymraeg. Gan: Lisbeth McLean
 | 
