တရုတ်ပြည်တွင်းက ဗိုင်းရပ်စ်ကူးတာမရှိတဲ့နေ့ ၊ ပြန်အသက်ဝင်လာတဲ့ ဝူဟန်

တရုတ် နိုင်ငံမှာ ပြည်တွင်းနေအချင်းချင်းက ကူးစက်တဲ့ ဗိုင်းရပ်စ်လူနာ မတွေ့ရတဲ့ ပထမဆုံးနေ့ ဖြစ်ခဲ့ပါတယ်။

ဗိုင်းရပ်စ်ရောဂါ စတင်ပေါ်ထွက်လာခဲ့တဲ့ ဒီဇင်ဘာလကုန်ပိုင်းက စပြီး ဒါပထမဆုံးအကြိမ် ဖြစ်ပါတယ်။

အသစ်တွေ့တဲ့ လူနာ ၃၄ ယောက်စလုံးက နိုင်ငံခြားက ပြန်လာတဲ့သူတွေ ဖြစ်ကြပါတယ်။

ရောဂါစဖြစ်တဲ့ ဝူဟန်မှာ ရောဂါရှင် မရှိတော့ဘူးလို့လည်း တရုတ် နိုင်ငံတော် ကျန်းမာရေး ကော်မရှင်က ကြေညာခဲ့ပါတယ်။

ဝူဟန်မှာ တလခွဲလောက် အပိတ်ခံထားရတဲ့ မြို့သူမြို့သားတွေလည်း အုပ်စုဖွဲ့ သွားလာတာ မဟုတ်ရင် ပြန်ထွက်ခွင့် ရလာပြီ ဖြစ်ပါတယ်။

တချို့ စီးပွားရေး လုပ်ငန်းတွေလည်း ပြန်စခွင့် ပြုခဲ့ပါတယ်။

ဝူဟန်က တချို့ခရိုင်တွေမှာ ကပ်ဘေးကင်းပြီလို့ ကြေညာထားပြီး စျေးငယ်တွေနဲ့ သက်သာဆိုင်တွေ ပြန်ဖွင့်နေပြီ ဖြစ်ပါတယ်။

နိုင်ငံခြားက ဝင်လာတဲ့ ကူးစက်မှုက ကာကွယ်ဖို့အတွက် ဆားစ်ရောဂါ လူနာတွေကို ကုခဲ့တဲ့ ဆေးရုံတရုံကို ဘေဂျင်းမှာ ပြန်ဖွင့်ထားပါတယ်။

မသင်္ကာတဲ့ လူနာတွေကို အဲဒီမှာ ထားဖို့ ဖြစ်ပါတယ်။

ဟောင်ကောင်မှာတော့ ဝင်လာသူတွေရဲ့ သွားလာလှုပ်ရှားမှုကို သိနိုင်ဖို့ လျှပ်စစ် လက်ပတ်တွေ တပ်ပေးမှာ ဖြစ်ပါတယ်။

တရုတ်ပြည်မှာ သေဆုံးသူ အရေအတွက် ၃၂၄၅ နဲ့ ရပ်နေပေမယ့် ဒီကိန်းဂဏန်းကို ဘယ်လောက် ယုံရမလဲ မေးခွန်းတွေ ထွက်နေပါတယ်။

တရုတ်၊ ဂျပန်၊ တောင်ကိုရီးယားနဲ့ စင်္ကာပူ နိုင်ငံတွေမှာ ပြည်တွင်း ကူးစက်မှုကို ထိန်းချုပ်နိုင်လာပေမယ့် တခြားက ကူးတာတွေ ပြန်ဖြစ်လာမှာကိုလည်း ပူပန်နေကြပါတယ်။