ဒေတာကုန်ကျမှုလျှော့ချနိုင်ရန်အတွက် ယခုဝက်ဘ်ဆိုက်မှ စာမျက်နှာများကို ရုပ်ပုံမပါ စာသားဖြင့်သာတင်ဆက်ပေးထားပါသည်။ ရုပ်ပုံ ဗီဒီယိုများနှင့် ကြည့်လိုလျှင် မူလစာမျက်နှာတွင်ကြည့်နိုင်ပါသည်။
ယီမင် အယ်လ်ခိုင်ဒါ ခေါင်းဆောင် အမေရိကန် လေကြောင်းတိုက်မှုကြောင့် သေဆုံး
ယီမင်နိုင်ငံက အယ်လ်ခိုင်ဒါအဖွဲ့ (AQAP) ရဲ့ ခေါင်းဆောင်ကို အမေရိကန်က သုတ်သင်ရှင်းလင်းလိုက်ပြီလို့ သမ္မတ ဒေါ်နယ်ထရမ့်က ပြောပါတယ်။
အမေရိကန်က သတ်ဖြတ်လိုက်တဲ့ ကာဆင် အယ်လ်ရေမီဟာ ဂျီဟတ် အုပ်စုကို ၂၀၁၅ ကတည်းက ဦးဆောင်ခဲ့သူ ဖြစ်ပြီး သူ့ကို အမေရိကန်ရဲ့ ယီမင်က စစ်ဆင်ရေး တစ်ခုမှာ သတ်ဖြတ်လိုက်တာလို့ အိမ်ဖြူတော်က ပြောပါတယ်။
အဲဒီ ဂျီဟတ် ဘာသာရေး အစွန်းရောက်အဖွဲ့ ခေါင်းဆောင်ဟာ အနောက်နိုင်ငံတွေနဲ့ သက်ဆိုင်တဲ့နေရာတွေကို တိုက်ခိုက်မှုတွေ လုပ်ခဲ့သူဖြစ်ပြီး အဲဒီတိုက်ခိုက်မှုတွေနဲ့ ၂၀၀၀ ပြည့်နှစ်တွေကတည်းက ဆက်စပ် ပတ်သက်နေသူ ဖြစ်ပါတယ်။
အမေရိကန်တွေရဲ့ ဒရုန်းတိုက်ခိုက်မှုကြောင့် ဒီအဖွဲ့ရဲ့ အရင်ခေါင်းဆောင် သေဆုံးသွားပြီးနောက် သူက အဖွဲ့ကို ဆက်လက် ဦးဆောင်ခဲ့တာ ဖြစ်ပါတယ်။
AQAP ကို ၂၀၀၉ မှာ တည်ထောင်ခဲ့ပြီး အမေရိကန် ကျောထောက်နောက်ခံပေးတဲ့ ဒေသတွင်းက အစိုးရတွေကို ပြိုလဲအောင်နဲ့ ဒေသတွင်းမှာ အနောက်နိုင်ငံတွေ လွှမ်းမိုးမှု ဖယ်ရှားဖို့တို့အတွက် သူတို့အဖွဲ့က ရည်ရွယ်တာ ဖြစ်ပါတယ်။
ရေမီ သေဆုံးပြီဆိုတဲ့သတင်းက ဇန်နဝါရီလကတည်းက စထွက်နေခဲ့တာပါ။ အဲဒါတွေကို တုံ့ပြန်တဲ့အနေနဲ့ သူ့အသံဖိုင်တစ်ခုကို AQAP က ဖေဖော်ဝါရီ ၂ ရက်မှာ ထုတ်ခဲ့ပါတယ်။ အဲဒီထဲမှာတော့ အမေရိကန် ဖလော်ရီဒါက ရေတပ် စခန်းမှာ လူသေဆုံးခဲ့တဲ့ ပစ်ခတ်မှုမှာ AQAP က နောက်ကွယ်က ကြိုးကိုင်ခဲ့တယ်ဆိုပြီး သူက ပြောထားပါတယ်။
ဒီပစ်ခတ်မှုက ဒီဇင်ဘာလမှာ ဖြစ်ခဲ့တာ ဖြစ်လို့ AQAP က ထုတ်လိုက်တဲ့ အသံမက်ဆေ့ချ်က ကြိုသွင်းထားတဲ့ အသံဖိုင် ဖြစ်နိုင်ပါတယ်။
အိမ်ဖြူတော်ထုတ်ပြန်ချက်မှာ ရေမီ သေဆုံးတာကို အတည်ပြုပေမဲ့ ဘယ်နေ့မှာ သေဆုံးတယ်ဆိုတာတော့ မပြောပါဘူး။
ရေမီဟာ အာဖဂန်နစ္စတန်က အယ်လ်ခိုင်ဒါ စခန်းတစ်ခုမှာ ၁၉၉၀ ပြည့်နှစ်တွေကတည်းက သင်တန်းပေးနေသူပါ။ ယီမင်ကို ၂၀၀၄ မှာ သူရောက်လာပါတယ်။ ပြီးတော့ ယီမင်မြို့တော် ဆာနားက နိုင်ငံခြား သံရုံးငါးခုကို ကြိုတင်ကြံစည် တိုက်ခိုက်မှုတွေအတွက် ယီမင်မှာပဲ ထောင်ငါးနှစ်ကျခဲ့ပါတယ်။
AQAP ဟာ ပါကစ္စတန်နဲ့ အာဖဂန်နစ္စတန် တို့ ပြင်ပမှာဆိုရင် အယ်လ်ခိုင်ဒါရဲ့ လှုပ်ရှားမှု အများဆုံး အဖွဲ့တစ်ဖွဲ့လို့ အမေရိကန် ဘက်က ထုတ်ပြောထားတဲ့ အဖွဲ့ဖြစ်ပါတယ်။
