ယူကရိန်း လေယာဉ်ကို အီရန်မှားပစ်ချလိုက်တာလို့ US မီဒီယာပြော
ဓာတ်ပုံ ရင်းမြစ်, AFP
အီရန်မြို့တော် တီဟီရန်ကနေ ဒီဇင်ဘာ ၈ ရက် ဗုဒ္ဓဟူးနေ့က ပျံတက်ခါစမှာ ပျက်ကျခဲ့တဲ့ ယူကရိန်းလေယာဉ်ဟာ အီရန်ရဲ့ မှားယွင်း ပစ်ချခံရတာလို့ အမေရိကန် မီဒီယာ တစ်ခုက ပြောပါတယ်။
ယူကရိန်း နိုင်ငံတကာ လေကြောင်းလိုင်းက ဘိုးအင်း 737-800 လေယာဉ်ဟာ ဒုံးကျည်ထိမှန်ခဲ့တာလို့ ယူဆရတယ်ဆိုပြီး အမေရိကန် တာဝန်ရှိသူတွေက ပြောတဲ့အကြောင်း CBS သတင်းဌာနက ပြောပါတယ်။
ပထမပိုင်းမှာ ဒီလေယာဉ်ဟာ ဒုံးကျည်နဲ့ ပစ်ချခံရတာလို့ ယူကရိန်းက ပြောပေမဲ့ အီရန်က ဒါကို ငြင်းထားပါတယ်။
အီရန်က အီရတ်ဘက်မှာရှိတဲ့ အမေရိကန် စစ်စခန်းတွေကို ဒုံးကျည်နဲ့ တိုက်ခိုက်အပြီး နာရီပိုင်းအကြာမှာ ဒီလေယာဉ်ပျက်ကျမှု ဖြစ်ခဲ့တာပါ။
အမေရိကန်ဘက်ကသတင်းတွေကို CBS က ကိုးကားပြောရာမှာ ဒုံးကျည်နှစ်ခု ပစ်လိုက်တဲ့ အနီအောက်ရောင်ခြည် ပုံရိပ် အစက်အပျောက်ကို ဂြိုဟ်တုကနေ တွေ့ရှိခဲ့တယ်၊ အဲဒီနောက်မှာ ပေါက်ကွဲမှုပုံရိပ် အစက်အပျောက်ကို တွေ့ခဲ့တယ်လို့ ပြောပါတယ်။
ဓာတ်ပုံ ရင်းမြစ်, Getty Images
Newsweek မဂ္ဂဇင်း ကတော့ အမေရိကန် ပန်တဂွန် စစ်ဌာနချုပ်နဲ့ အမေရိကန် အကြီးတန်း ထောက်လှမ်းရေး တာဝန်ရှိသူတွေကို ကိုးကားပြီး ဒီယူကရိန်းလေယာဉ်ဟာ ရှရှားလုပ် ဒုံးကျည်နဲ့ ပစ်ချခံရတာလို့ အီရတ် အစိုးရဘက်က ယူဆတယ်ဆိုပြီး ပြောပါတယ်။
အမေရိကန် သမ္မထရမ့်ကလည်း ဒီလေယာဉ်ကိစ္စမှာ တစ်ယောက်ယောက်ကတော့ အမှားလုပ်မိပြီလို့ သံသယရှိတဲ့အကြောင်း ကြာသပတေးနေ့က ပြောပါတယ်။
အီရန် ဗိုလ်ချုပ်ကြီးကို အမေရိကန်တို့က လေကြောင်းက တိုက်ခတ်သတ်ဖြတ်ခဲ့လို့ အခြေအနေတွေ တင်းမာနေချိန်မှာပဲ အခု ပျက်ကျတဲ့ လေယာဉ်ရဲ့ ပျံသန်းမှု ဆိုင်ရာမှတ်တမ်းတွေကို ခြေရာခံကြည့်နိုင်မယ့် Black Box ကို လေယာဉ်ထုတ်လုပ်တဲ့ ဘိုးအင်း လေယာဉ်ကုမ္ပဏီ ဖြစ်ဖြစ် အမေရိကန်ဘက်ကို ဖြစ်ဖြစ် ပြန်ပေးမှာ မဟုတ်ဘူးလို့ အီရန်က ပြောခဲ့ပါတယ်။
နိုင်ငံတကာ လေကြောင်း စည်းမျဉ်းစည်းကမ်းတွေအရ လေယာဉ်ပျက်ကျမှုကို အီရန်အနေနဲ့ ဦးဆောင် စုံစမ်းစစ်ဆေးနိုင်ပါတယ်။ ဒါပေမဲ့ ပုံမှန်အားဖြင့် လေယာဉ်ထုတ်လုပ်သူတွေလည်း ဒီစုံစမ်းစစ်ဆေးမှုမှာ ပါဝင်ကြပါတယ်။
