တိုက်ရိုက်ထုတ်လွှင့်မှု, ကပစ ၁၆ ကို AA နဲ့ ပူးပေါင်းတပ်ဖွဲ့တွေ အနီးကပ်တိုက်ခိုက်

တိုက်ရိုက် ထုတ်လွှင့်ချက်

1. လွန်ခဲ့သော ၁၂ မိနစ် ကမြန်မာစစ်တပ်ကို ဒဏ်ခတ်ပိတ်ဆို့မှုတွေပါတဲ့ BRAVE Burma Act မူကြမ်း ကန် အထက်လွှတ်တော်ရောက်ပြီ

   

   ဓာတ်ပုံ ရင်းမြစ်, Getty Images

   မြန်မာစစ်တပ်ကို ကန့်သတ်ပိတ်ဆို့မှုတွေပါဝင်တဲ့ BRAVE Burma အက်ဥပဒေကို ဝါရင့်အထက်လွှတ်တော် အမတ်တွေက လွှတ်တော်ကို တင်သွင်းတယ်လို့ ဝါရင့်အထက်လွှတ်တော်အမတ် မစ်ချ် မက်ကော်နယ်က လူမှုကွန်ရက်မှာ ရေးထားပါတယ်။

   မြန်မာစစ်တပ်ရဲ့အတုအယောင် ရွေးကောက်ပွဲတွေကနေ ဩဇာလွှမ်းမိုးဖို့ ခြိမ်းခြောက်လာတဲ့ အခြေအနေမှာ အခုအက်ဥပဒေက အထူးအရေးပါတယ်လို့ သူက ရေးသားထားပါတယ်။

   “ကျွန်တော့်အလုပ်တစ်လျှောက်လုံးမှာ မြန်မာပြည်သူတွေရဲ့ ဒီမိုကရေစီ ရည်မှန်းချက်ကို ထောက်ခံခွင့်ရတာကို ဂုဏ်ယူတယ်”လို့ မစ်ချ်မက်ကော်နယ်က အထက်လွှတ်တော်ကို ဒီဥပဒေမူကြမ်းရောက်တာနဲ့ပတ်သက်ပြီး ပြောထားပါတယ်။

   စစ်တပ်ရဲ့ဖိနှိပ်မှုတွေကို အချိန်ကြာမြင့်အောင် သည်းခံနေရတဲ့ မြန်မာပြည်သူတွေနဲ့အတူ အမေရိကန်အစိုးရက ရပ်တည်ဖို့ အရေးကြီးတယ်လို့လည်း ဆိုပါတယ်။

   BRAVE Burma Act ဥပဒေဟာ မြန်မာစစ်တပ်ကို ထောက်ပံ့နေတဲ့အဖွဲ့အစည်းတွေကို ပိတ်ဆို့ထားပြီး တရုတ်နဲ့ ရုရှားတို့ရဲ့ ဩဇာလွှမ်းမိုးမှုကို တွန်းလှန်နိုင်မှာဖြစ်တယ်လို့လည်း ဝါရင့်အထက်လွှတ်တော်အမတ် မစ်ချ်မက်ကော်နယ်က ပြောထားပါတယ်။

   ဒီအက်ဥပဒေမူကြမ်းကို ၂၀၂၅ ခုနှစ် ဇူလိုင်ကစလို့ အောက်လွှတ်တော်မှာ ဆွေးနွေးခဲ့ပြီး ၆ လအကျော်မှာ ပုံပေါ်လာတာပါ။

   ဥပဒေမူကြမ်းကို အမေရိကန်အောက်လွှတ်တော်မှာ ဖေဖော်ဝါရီ ၉ ရက်က အတည်ပြုခဲ့တာလည်း ဖြစ်ပါတယ်။

   BRAVE မြန်မာအက်ဥပဒေ (Bringing Real Accountability Via Enforcement in Burma Act) က စစ်ကော်မရှင်နဲ့ ဆက်စပ်တဲ့ နိုင်ငံပိုင်လုပ်ငန်းတွေ၊ မြန်မာ့စီးပွားရေးဘဏ်နဲ့ လေယာဉ်ဆီထောက်ပံ့တဲ့ နိုင်ငံခြားကုမ္ပဏီတွေကို ပိတ်ဆို့မှုတွေ တိုးမြှင့်ဖို့ ရည်ရွယ်ခဲ့တယ်လို့ အဲဒီဥပဒေကို မူကြမ်းအဆင့်ဆွေးနွေးချိန်က အောက်လွှတ်တော်အမတ်တွေက ပြောထားပါတယ်။

   ဒီဥပဒေကို အောက်လွှတ်တော်မှာ ရီပတ်ဘလီကန်နဲ့ ဒီမိုကရက် နှစ်ပါတီလုံးက အမတ်တွေ ပူးတွဲပြီး လွှတ်တော်ကို တင်ထားတာဖြစ်ပါတယ်။

   ဘားမားအက်- ကန်အစိုးရ ရဲ့ မြန်မာ့အရေးအကူအညီ ဘယ်လိုဆက်လာမလဲ

2. လွန်ခဲ့သော တစ်နာရီ ကကပစ ၁၆ ကို AA နဲ့ ပူးပေါင်းတပ်ဖွဲ့တွေ အနီးကပ်တိုက်ခိုက်

   

   ဓာတ်ပုံ ရင်းမြစ်, AA Info Desk

   ပဲခူးတိုင်း၊ ပန်းတောင်းမြို့နယ်မှာရှိတဲ့ စစ်ကော်မရှင်တပ်ရဲ့အမှတ် ၁၆ ကာကွယ်ရေးပစ္စည်းစက်ရုံကို အာရက္ခတပ်တော်(အေအေ)နဲ့ ပူးပေါင်းအဖွဲ့တွေက အနီးကပ်တိုက်ခိုက်နေပြီလို့ အေအေနဲ့ နီးစပ်သူက ပြောပါတယ်။

   ကပစ ၁၆ နဲ့ တစ်မိုင်ဝန်းကျင်နားကို မနေ့ကစလို့ အေအေနဲ့ ပူးပေါင်းအဖွဲ့တွေ ရောက်နေပြီး စက်ရုံဝင်းအတွင်းထဲကို လက်နက်ကြီးတွေနဲ့ ပစ်ခတ်တိုက်ခိုက်တာတွေ ရှိနေတယ်လို့ ပြောပါတယ်။

   အဓိက ကာကင်းဖြစ်တဲ့ ပွိုင့် ၆၆၆ ကို ပြီးခဲ့တဲ့ ဇန်နဝါရီလ ပထမအပတ်ထဲမှာ အေအေက ဒုတိယအကြိမ်သိမ်းပိုက်လိုက်ပြီးနောက်ပိုင်း အခုဖေဖော်ဝါရီလအတွင်းမှာပဲ အဲဒီစက်ရုံအနီးက စခန်း ၇ ခုအထိ ဆက်တိုက်သိမ်းပိုက်နိုင်ခဲ့တာလို့ အေအေနဲ့ စစ်ရေးနီးစပ်သူတွေက ပြောပါတယ်။

   ကာကင်းစခန်းတွေ သိမ်းပိုက်နိုင်ခဲ့ပြီးနောက် ကပစ ၁၆ နားကို ပိုနီးကပ်လာတာဖြစ်ပါတယ်။

   စစ်ကော်မရှင်ဘက်ကလည်း ကပစ ၁၆ မကျရေးအတွက် ဒရုန်းတွေသုံးပြီး တိုက်ခိုက်နေတယ်လို့သိရပါတယ်။

   ကပစ ၁၆ တိုက်ပွဲထဲကနေ ထွက်ပြေးလာတဲ့ စစ်ကော်မရှင်တပ်ဖွဲ့ဝင် ၅ ယောက်ကိုလည်း ဖမ်းဆီးရမိထားတယ်လို့ အေအေနဲ့ နီးစပ်သူက ပြောပါတယ်။

   ကပစ ၁၆ ဟာ ဥသျှစ်ပင်မြို့နဲ့ အနောက်တောင်ဘက် ၁၃ မိုင်ခန့်အကွာမှာ ရှိပါတယ်။ ဒီစက်ရုံဟာ စစ်တပ်ရဲ့လက်နက်ခဲယမ်းတွေမှာ အသုံးပြုရဲ့ ယမ်းတွေ ထုတ်လုပ်ရာမှာ အဓိကအသုံးပြုရတဲ့အက်စစ်ကို ထုတ်လုပ်ရတဲ့ စက်ရုံအမျိုးအစားဖြစ်တယ်လို့ သိရပါတယ်။

   အေအေနဲ့ပူးပေါင်းအဖွဲ့တွေဟာ ကပစက ၁၆ ကို ပစ်မှတ်ထားတဲ့တိုက်ခိုက်မှုတွေကို ၂၀၂၅ ခုနှစ်နှောင်းပိုင်းကတည်းက ပြုလုပ်နေတာဖြစ်ပြီး အဲဒီနောက်ပိုင်းမှာ စက်ရုံကို ဦးတည်တဲ့ကာကင်းစခန်းတွေကို ဆက်တိုက်သိမ်းယူခဲ့သလို စစ်တပ်ကလည်း ပြန်လည် ထိုးစစ်ဆင်တာတွေရှိခဲ့ပါတယ်။

   ဒီတိုက်ပွဲတွေကြောင့်ပဲ ကပစ ၁၆ မှာ ထုတ်လုပ်ရေးလုပ်ငန်းတွေ ရပ်နားလိုက်တာ အခုနှစ်ဆန်းပိုင်းကတည်းကဖြစ်တယ်လို့ သတင်းရင်းမြစ်တွေက ပြောပါတယ်။

   စစ်တပ်ကတော့ ပန်းတောင်းမြို့နယ်ထဲက စစ်ရေးအခြေအနေတွေကို သတင်းမထုတ်ပြန်သေးပါဘူး။

   အေအေ ထိုးစစ် ရခိုင်ကို ကျော်လွန်လာမလား

   မရဏစက်ရုံ - တရုတ်အကူအညီနဲ့ လည်ပတ်နေတဲ့မြန်မာစစ်တပ်ရဲ့ ကပစ ၂၁

   ကပစတွေရဲ့အချုပ် ကပစ-၄ က စစ်တပ်အတွက် ဘယ်လိုအရေးပါလဲ

3. လွန်ခဲ့သော တစ်နာရီ က

   မင်္ဂလာပါ။

   မတ် ၅ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။