ထင်ပေါ်ကျော်ကြားသူတွေရဲ့ လှပဆန်းပြားတဲ့ ဝတ်စုံတွေ

နှစ်စဉ်ကျင်းပလေ့ရှိတဲ့ The Met Gala လို့ ခေါ်တဲ့ ၂၀၁၉ ခုနှစ် ဝတ်စုံပြပွဲပြိုင်ပွဲကို နယူးယောက်မြို့ မက်ထရိုပိုလီတန် အနုပညာပြတိုက်မှာ ပြုလုပ်ခဲ့ပါတယ်။

Met Gala ကို ကမ္ဘာမှာ အကြီးကျယ်ဆုံး ဖက်ရှင်ပွဲကြီး တခု အဖြစ်လည်း သတ်မှတ်ကြပါတယ်။

နှစ်စဉ် အကြောင်းအရာ ခေါင်းစီးတစ်ခုနဲ့ ကျင်းပလေ့ရှိတဲ့ ဒီပွဲကို အထူးသီးသန့် ဧည့်သည်တော်တွေကို ဖိတ်ကြားလေ့ရှိပြီး ဝင်ခွင့်လက်မှတ်တွေက စျေးအရမ်းကြီးပါတယ်။

ဒီပွဲကို ရုပ်ရှင်မင်းသမီး မင်းသား ၊ အဆိုတော်တွေ စတဲ့ ထင်ရှားလူသိများတဲ့ အထူးဧည့်သည်တော်တွေဟာ ခေါင်းစီးအကြောင်းအရာနဲ့ လိုက်ဖက်အောင် အလွန်အကျွံဆန်းဆန်းပြားပြားဖက်ရှင်ထွင် ဝတ်ဆင် တက်ရောက် လာကြပါတယ်။

ဒီနှစ်အတွက် ခေါင်းစီးအကြောင်းအရာက ၁၉၆၄ ခုနှစ်က အမေရိကန် စာရေးဆရာမလည်းဖြစ် နိုင်ငံရေးလှုပ်ရှားသူလည်းဖြစ်တဲ့ Susan Sontagရဲ့ Notes on Camp စာတမ်းတိုကို အခြေခံပြီး Camp; Notes on Fashion လို့ သတ်မှတ်ခဲ့ကြပါတယ်။ Camp ကို ဟန်အမူအယာ၊ ဇာတ်ဟန်၊လိင်တူချစ်သူတွေရဲ့ ဟန် စသဖြင့် ဖက်ရှင် ဒီဇိုင်းနာတွေက အဓိပ္ပါယ်ဖွင့်ဆိုကြပါတယ်။

ဒါကြောင့် ဒီနှစ် ဝတ်ဆင်ကြတဲ့ ဝတ်စုံတွေဟာ ဖက်ရှင် တီထွင်သူတွေရဲ့ ကိုယ့်ဘာသာကိုယ် အဓိပ္ပါယ်ဖွင့်ဆိုချက်အပေါ် အခြေခံ ပြီး ရယ်စရာ၊ သရော်စရာ၊ ပန်းချီ ဂီတ ပုံစံ စတာတွေနဲ့ အလွန်အကျွံ အဆန်းထွင် ချုပ်လုပ်ထားတာတွေဖြစ်ပါတယ်။

ဒီပြပွဲညကို အဆိုတော်ကြီးလေဒီဂါဂါဟာ အောက်ခြေကားကား ကြီးမားတဲ့ ပန်းရောင်ဝတ်စုံပွပွကြီး ကို ဝတ်ဆင်ပြီး ရောက်ရှိလာခဲ့ပါတယ်။