ဒေတာကုန်ကျမှုလျှော့ချနိုင်ရန်အတွက် ယခုဝက်ဘ်ဆိုက်မှ စာမျက်နှာများကို ရုပ်ပုံမပါ စာသားဖြင့်သာတင်ဆက်ပေးထားပါသည်။ ရုပ်ပုံ ဗီဒီယိုများနှင့် ကြည့်လိုလျှင် မူလစာမျက်နှာတွင်ကြည့်နိုင်ပါသည်။
မဟတ္တမဂန္ဒီကိုသတ်တဲ့ လူသတ်သမားရဲ့ နောက်ကွယ်က ပဟေဠိ
၁၉၄၈ ခုနှစ် ဇန်နဝါရီလ ၃၀ ရက်နေ့ ညနေခင်းမှာ နာသူရမ်ဗီနာယက်ဂိုဒီစ်ဟာ မြို့တော် ဒေလီမြို့တော်မှာလုပ်တဲ့ ဆုတောင်းပွဲတစ်ခုကနေ ထွက်လာတဲ့ အိန္ဒိယနိုင်ငံရဲ့ ရိုသေလေးစား အထွတ်အမြတ်ထားသူ ခေါင်းဆောင်ကြီး မဟတ္တမဂန္ဒီကို သေနတ်နဲ့ ပစ်ခတ် လုပ်ကြံခဲ့ပါတယ်။
ဂန္ဒီကိုသတ်ခဲ့တဲ့ အသက် ၃၈ နှစ်အရွယ် အစွန်းရောက်သမားက လက်ယာယိမ်း ဟိန္ဒူမဟာစဗ္ဗပါတီ ဝင်တစ်ဦးပါ။
မွတ်ဆလင်လိုလားလွန်းပြီး ပါကစ္စတန်နိုင်ငံအပေါ် သဘောထား ပျော့ပျောင်းလွန်းသလို ဟိန္ဒူတွေကို သစ္စာဖောက်တယ်ဆိုတဲ့ စွပ်စွဲချက်နဲ့ သူက ဂန္ဒီကို သတ်ခဲ့တာပါ။
အိန္ဒိယနဲ့ ပါကစ္စတန်နိုင်ငံတို့ဟာ ၁၉၄၇ ခုနှစ် ဗြိတိန်ထံကနေ လွတ်လပ်ရေးရပြီးနောက်ပိုင်း ခွဲထွက်မှုတွေဖြစ်လာပြီး သွေးထွက်သံယိုဖြစ်လာတာတွေနဲ့ ပတ်သက်ပြီးတော့လည်း ဂန္ဒီကို အပြစ်တင်တာတွေ ရှိခဲ့ပါတယ်။
ဂန္ဒီ လုပ်ကြံခံရပြီး တစ်နှစ်အကြာ ဂိုဒီစ်ကို တရားရုံးက သေဒဏ်ပေးခဲ့ပါ တယ်။ အဲ့ဒီစီရင်ချက်ကို အထက်တရားရုံးက အတည်ပြုပြီးတဲ့နောက် ၁၉၄၉ခုနှစ် နိုဝင်ဘာလမှာ သူ့ကို ကွပ်မျက်ခဲ့ပါ တယ်။
(ပြီးတော့ လုပ်ကြံမှုကြံရာပါ တစ်ဦးဖြစ်တဲ့ နာရာယန်အက်ပ်တီ ကိုပါ သေဒဏ်ချမှတ်ခဲ့ပြီး အခြားခြောက်ဦးကိုတော့ ထောင်ဒဏ်တစ်သက် ချမှတ်ခဲ့ပါတယ်။)
ဂိုဒီစ်ဟာ ဟိန္ဒူမဟာစဗ္ဗပါတီမဝင်ခင်က အိန္ဒိယ အာဏာရပါတီ ဘီဂျေပီပါတီရဲ့ အတွေးအခေါ် မြစ်ဖျားခံတဲ့ Rashtriya Swayamsevak Sangh (အမျိုးသား စေတနာ့ဝန်ထမ်းအဖွဲ့အစည်း) RSSအဖွဲ့ဝင်တစ်ယေက်ပါ။
လက်ရှိဝန်ကြီးချုပ် နာရန်ဒါမိုဒီ ကိုယ်တိုင်ကလည်း သက်တမ်း၉၅ နှစ်ရှိပြီဖြစ်တဲ့ ဟိန္ဒူ အမျိုးသားရေးဝါဒမြစ်ဖျားခံတဲ့ အဖွဲ့ရဲ့ သက်တမ်းရှည် အဖွဲ့ဝင်တစ်ဦးဖြစ်ပါတယ်။
RSS အဖွဲ့ဟာ သူ့အစိုးရအဖွဲ့အတွင်းနဲ့ ပြင်ပမှာပါ နက်နက်ရှိုင်းရှိုင်း သြဇာညောင်းနေတဲ့ အဖွဲ့တစ်ခု ဖြစ်ပါတယ်။
သူတို့ရဲ့ အကြီးမြတ်ဆုံး စံပြခေါင်းဆောင်ကြီးကို သတ်ဖြတ်ခဲ့တဲ့ ဂိုဒီစ်နဲ့ ပတ်သက်ခဲ့တဲ့ RSS အဖွဲ့ကိုလည်း အိန္ဒိယနိုင်ငံသားတွေ ရှောင်ဖယ်ခဲ့ကြတာက ဆယ်စုနှစ်များစွာကြာခဲ့ပြီဖြစ်ပါတယ်။ ဒါပေမဲ့ မကြာခင်နှစ်တွေအတွင်းက ဟိန္ဒူလက်ယာယိမ်းအဖွဲ့တစ်ဖွဲ့ဟာ ဂိုဒီစ်ကို ကေသရာဇာခြင်္သေ့မင်းလို့ အမည်တပ်ပြီး ဂန္ဒီကို လုပ်ကြံသတ်ဖြတ်ခဲ့တဲ့သူကို ပေါ်ပေါ်တင်တင် ဂုဏ်ပြုတာတွေ လုပ်လာတာကို တွေ့ရပါတယ်။
ပြီးခဲ့တဲ့နှစ်ကလည်း ဘီဂျေပီပါတီ အမတ်တစ်ဦးက ဂန္ဒီကို လုပ်ကြံသတ်ဖြတ်ခဲ့တဲ့သူဂိုဒီစ် ကို" မျိုးချစ်ပုဂ္ဂိုလ် "လို့ ခေါ်ဆိုခဲ့ပါတယ်။။
အဲ့ဒီကိစ္စတွေက အိန္ဒိယလူမျိုးအများစုကို ဒေါသဖြစ်စေခဲ့ပေမယ့် RSS အဖွဲ့ကတော့ သူ့အနေအထားကို ဆက်လက်ဆုပ်ကိုင်ပြီး တည်ရှိနေဆဲဖြစ်ပါတယ်။ ဂိုဒီစ်ဟာ ဂန္ဒီကိုမသတ်ခင် ကာလအတန်ကြာကတည်း RSS အဖွဲ့ကနေ နှုတ်ထွက်ခဲ့သူလို့ ဆိုပါတယ်။ ဒါပေမဲ့ စာအုပ်အသစ်တစ်အုပ်ထဲမှာတော့ အဲ့ဒီအချက်က လုံးဝ မမှန်ဘူးလို့ ရေးထားပါတယ်။
အထက်တန်းကျောင်းကနေ ကျောင်းထွက်ခဲ့တဲ့ ဂိုဒီစ်ဟာ မဟာစဗ္ဗ သတင်းစာကို တည်းဖြတ်တဲ့ အလုပ်ဝင်မလုပ်ခင် အထည်ချုပ်လုပ်ငန်း နဲ့ သစ်သီးရောင်းတဲ့ အလုပ်ကို လုပ်ကိုင်ခဲ့တဲ့ သူပါ။
သူ့ကိုစီရင်ချက်ချမယ့် တရားခွင်အတွင်းမှာလည်း အပိုဒ် ၁၅၀ ပါတဲ့ ထုတ်ပြန်ချက်ကို ငါးနာရီကျော် အချိန်ယူဖတ်ခဲ့ပါတယ်။
အဲ့ဒီထဲမှာ ဂန္ဒီကိုသတ်ဖို့အတွက် အခြားလူတွေနဲ့ ပူးပေါင်းကြံစည်မှုမရှိဘူးလို့ ထွက်ဆိုပြီး သူ့ ကြံရာပါတွေ လွတ်ငြိမ်းခွင့်ရဖို့ ကြိုးစားခဲ့ပါတယ်။
သူ့လုပ်ကြံမှုဟာ ဟိန္ဒူအမျိုးသားရေးဝါဒ အယူအဆကို မွေးဖွားပေးခဲ့တဲ့ သူ့ခေါင်းဆောင် ဗီနာယက်ဒီမိုဒါဆာဗာကာ ရဲ့ အမိန့်ပေးမှုအောက်က လုပ်ခဲ့တယ်ဆိုတဲ့ စွပ်စွဲချက်ကိုလည်း ငြင်းဆိုခဲ့ပါတယ်။
(စွဲချက်တွေအားလုံးကနေ ဆာဗာကာ လွတ်မြောက်ခဲ့ပေမယ့် ဂန္ဒီကိုမုန်းတီးတဲ့ လက်ယာအစွန်းရောက်သမားဟာ လုပ်ကြံသတ်ဖြတ်မှုနဲ့ ဆက်စပ်နေတယ်လို့ စောင့်ကြည့် ဝေဖန်သူတွေက ယုံကြည်နေကြပါတယ်)
ဂန္ဓီကို မသတ်ခင် ကာလအတန်ကြာကတည်းက သူနဲ့ RSS အဖွဲ့ လမ်းခွဲခဲ့တယ်လို့လည်း ဂိုဒီစ်က တရားရုံးမှာ ထွက်ဆိုခဲ့ပါတယ်။
စာတိုက်ဝန်ထမ်းဖခင်နဲ့ အိမ်မှု့ကိစ္စ တာဝန်တွေ လုပ်တဲ့ မိခင်ကမွေးလာတဲ့ ဂိုဒီစ်ဟာ RSS အဖွဲ့မှာ "လူသိများတဲ့သူ " တစ်ယောက်လို့ ဂန္ဓီလုပ်ကြံမှုစာအုပ်ကို ရေးတဲ့စာရေးဆရာ ဒီရန်ဒရာဂျာက ရေးထားပါတယ်။
ပြီးတော့ သူ့ RSS အဖွဲ့က ထုတ်ပယ်လိုက်တယ်ဆိုတဲ့ “အထောက်အထား” တွေလည်း မရှိဘူးလို့လည်း ဆိုပါတယ်။
တရားရုံး မရောက်ခင် ဂိုဒီစ်ရဲ့ ထွက်ဆိုချက်ထဲမှာ"သူ ဟိန္ဒူမဟာစဗ္ဗ အဖွဲ့ဝင် ဖြစ်လာပြီး နောက်ပိုင်း ကိုသာဖော်ပြခဲ့ပြီး RSS အဖွဲ့က ထွက်ခွာခဲ့တဲ့အပိုင်းကိုတော့ လုံးဝ မဖော်ပြခဲ့ပါဘူး"။
ဒါပေမဲ့ တရားရုံးထွက်ဆိုချက်ထဲမှာတော့ RSS ကနေ ထွက်လာပြီး ဟိန္ဒူမဟာစဗ္ဗပါတီကို ဝင်ခဲ့တဲ့အကြောင်းကို ထွက်ဆိုခဲ့ပေမယ့် သူဘာတွေ အတိအကျ လုပ်ဆောင်ခဲ့ တာတွေကို ထုတ်မပြောဘဲ နှုတ်ဆိတ်နေခဲ့တယ်လို့ တရားရုံးထွက်ဆိုချက်ထဲမှာ ဖော်ပြထားပါတယ်။
"ဒါဟာ ဂိုဒီစ်ရဲ့ဘဝနဲ့ပတ်သက်ပြီး အချေအတင် အငြင်းပွားရဆုံးကိစ္စ တစ်ခုအဖြစ် ကျန်ရှိနေဆဲပဲ"လို့ စာရေးဆရာ မစ္စတာဂျာက ပြောနေပါတယ်။
"RSS အဖွဲ့ကို ထောက်ခံတဲ့စာရေးဆရာတွေဟာ ဒီအချက်ကို အသုံးချပြီး မဟတ္တမဂန္ဒီကိုသူ မသတ်ခင်ဆယ်နှစ်နီးပါးကတည်းက ဂိုဒီစ်ဟာ RSSအဖွဲ့ကနေ ဟိန္ဒူမဟာစဗ္ဗပါတီကို ရောက် နေပြီဆိုတာကို ရေးနေကြတာလို့ သူက လက်ခံထားပါတယ်။
အမေရိကန်သုတေသီ ဂျေအေကာရန်ဂျုနီယာ ကလည်း ဂိုဒီစ်ဟာ ၁၉၃၀ခုနှစ်မှာ RSS အဖွဲ့ကို ဝင်ခဲ့ပြီး လေးနှစ်အကြာမှာ အလုပ်ကထွက်ခဲ့တယ်ဆိုတဲ့ သက်သေအထောက်အထားမျိုး မတွေ့ရ ဘူးလို့ စောဒကတက်ထားပါတယ်။
တရားရုံးမတက်ခင် ထွက်ဆိုချက်ထဲမှာ ဂိုဒီစ်က အဖွဲ့အစည်းနှစ်ခုလုံးအတွက် တပြိုက်နက် အလုပ်လုပ်ပေးနေတယ်လို့ ဝန်ခံခဲ့တယ်ဆိုတဲ့ အချက်ကိုလည်း မစ္စတာဂျာရဲ့ စာအုပ်ထဲမှာ ထည့်ရေးထားပါတယ်။
ဂိုဒီစ်ရဲ့ မိသားစုဝင်တွေကလည်း ဒီအငြင်းပွားမှုထဲမှာ ဝင်ပါခဲ့ကြပါတယ်။
၂၀၀၅ ခုနှစ်မှာ သေဆုံးသွားတဲ့ဂိုဒီစ်ရဲ့ညီ ဂိုပယ်က သူ့အစ်ကို "RSSအဖွဲ့က မထွက်ခဲ့ဘူး" လို့ ပြောခဲ့ပါတယ်။
သီးခြားအထောက်အထားအနေနဲ့ ဂိုဒီစ်ဟာ ၁၉၃၂ခုနှစ်မှာ RSS အဖွဲ့ကို ဝင်ခဲ့ပြီး " RSS အဖွဲ့ကနေ ထုတ်ခံရတာ ထွက်သွားတာတွေ လုပ်ခဲ့တာမရှိဘူး " လို့ ဂိုဒီစ်ရဲ့ မြေးတစ်ဦးကလည်း ၂၀၁၅ခုနှစ်မှာ သတင်းထောက်တစ်ဦးကို ပြောခဲ့တာ ရှိနေပါတယ်။
မစ္စတာဂျာဟာ အချက်အလက်တွေ သိုမှီးထားတဲ့ မော်ကွန်းတိုက်တွေကို မွှေနှောက်ခဲ့သလို ဟိန္ဒူအဖွဲ့အစည်းနှစ်ခုကြားက ချိတ်ဆက်မှုတွေကိုလည်း ရှာဖွေလေ့လာခဲ့ပါတယ်။
ဟိန္ဒူမဟာစဗ္ဗပါတီနဲ့ နှင့် RSSအဖွဲ့ဟာ "ထပ်တူကျနေပြီး ပြေပြစ်တဲ့ ဆက်ဆံရေး" နဲ့ အယူအဆ သဘောတရားတွေ ကလည်းတူနေတယ်လို့ သူက ရေးထားပါတယ်။
ဂန္ဒီ လုပ်ကြံခံရချိန်အထိ အဖွဲ့နှစ်ဖွဲ့ကြားမှာ "အမြဲတမ်းလိုလို ရင်းနှီးတဲ့ အဆက်အသွယ်တွေရှိပြီး တစ်ခါတရံ နှစ်ဖွဲ့လုံးမှာပါနေတဲ့ အဖွဲ့ဝင်တွေတောင်ရှိနေတယ်" လို့ သူက ထောက်ပြပါတယ်။ (ဂန္ဒီ လုပ်ကြံသတ်ဖြတ်ခံရပြီးနောက်ပိုင်း RSSအဖွဲ့ကို တစ်နှစ်ကျော် ပိတ်ပင်ခဲ့ပါတယ်)
RSS အဖွဲ့ဟာ တရားရုံးမှာ ဂိုဒီစ် ထွက်ဆိုခဲ့တဲ့ ထွက်ဆိုချက်တွေနောက်ကို လိုက်ပြီး အမြဲလိုလို ပဲ့တင်ထပ်ပြောခဲ့သလို ဂိုဒီစ်က ၁၉၃၀ခုနှစ် အလယ်ပိုင်းမှာ သူတို့ အဖွဲ့အစည်းကနေ စွန့်ခွာသွားတယ်ဆိုတာနဲ့ သူတို့အဖွဲ့ဟာ ဒီလူသတ်မှုနဲ့ ဘာမှမသက်ဆိုင်ဘူးဆိုတာကိုလည်း သက်သေပြခဲ့ပါတယ်။
"သူဟာ RSS အဖွဲ့ဝင် တစ်ယောက်လို့ ပြောတာဟာ နိုင်ငံရေး တင်းမာမှုတွေဖြစ်လာဖို့ နဲ့ သက်သက်လိမ်ညာပြောခဲ့တာ" လို့ RSS ဝါရင့် ခေါင်းဆောင် ရမ်မက်ဒ်ဟာ့က ပြော ထားပါတယ်။
RSS အဖွဲ့ရဲ့ သြဇာအရှိဆုံး ခေါင်းဆောင်တွေထဲက တစ်ဦးဖြစ်တဲ့ အမ်အက်စ် ဂိုလ်ဝေါကာ ကလည်း ဂန္ဒီ လုပ်ကြံသတ်ဖြတ်ခံရတာဟာ "အလွန်ကြီးကျယ်တဲ့ ကြေကွဲစရာ ဖြစ်ရပ်ဆိုး တစ်ခုလို့ ပြောခဲ့ပြီး လုပ်ကြံတဲ့ မကောင်းဆိုးဝါးဥာဏ်ကြီးရှင်က တစ်နိုင်ငံတည်းသား ဟိန္ဒူ ဘာသာဝင် ဖြစ်နေတဲ့အချက်ကလည်း ပို ဆိုးတယ်" လို့ ဆိုပါတယ်။
မကြာသေးခင်ကလည်း သြဇာရှိတဲ့ RSS ခေါင်းဆောင် အမ်ဂျီမီဒါယာက ဂိုဒီစ်ဟာ အိန္ဒိယနိုင်ငံရဲ့ လေးစားဖွယ်ကောင်းတဲ့ ပုဂ္ဂိုလ်ကိုသတ်ဖြတ်ပြီး ဟိန္ဒူဘာသာကို စော်ကားတဲ့လူသတ်သမားလို့ ပြောခဲ့ပါတယ်။
ဗီကရမ်ဆမ်ပါ့သ်လို စာရေးဆရာတွေကလည်း RSS အဖွဲ့နဲ့ ဟိန္ဒူ မဟာစဗ္ဗပါတီကြားမှာ ခိုင်မာအားကောင်းတဲ့ ဆက်ရေးရှိနေတယ်လို့ ယုံကြည်နေပါတယ်။
ဆာဗာကာ ရဲ့ အတ္ထုပ္ပတ္တိ စာအုပ် နှစ်အုပ်တွဲကိုရေးထားတဲ့ စာရေးဆရာ မစ္စတာဆမ်းပါ့သ် က ဟိန္ဒူဘာသာဝင်တွေရဲ့ အကျိုးစီးပွားကို ကာကွယ်ဖို့ရည်ရွယ်ချက်နဲ့ "တော်လှန်တဲ့ လျှို့ဝှက် အဖွဲ့အစည်း" လို RSS အဖွဲ့လို စေတနာ့ဝန်ထမ်းအဖွဲ့တစ်ဖွဲ့ကို ထူထောင်ဖို့ လုပ်တဲ့ ဟိန္ဒူ မဟာစဗ္ဗပါတီရဲ့ ဆုံးဖြတ်ချက်ဟာ ဟိန္ဒူတွေအတွက် ခါးသီးမှု ပိုဖြစ်စေတယ်လို့ ရေးထား ပါတယ်။
အခြားစာအုပ်တစ်အုပ်ဖြစ်တဲ့ RSSအဖွဲ့ ရဲ့ အတွင်းသဘောကို ရေးထားတဲ့ ဝေါလ်တာကေအန်ဒါဆင်နဲ့ ရှရီဒါဒီဒမေလ်ရဲ့ စာအုပ်ထဲမှာ ဂန္ဒီကိုသတ်ဖြတ်ရာမှာ သူတို့ အဖွဲ့ဝင်ဟောင်း ဂိုဒီစ် ပါဝင်ပတ်သက်မှုဟာ RSSအဖွဲ့ ကို အနှောင့်အယှက်ဖြစ်စေခဲ့ပုံရတဲ့ အကြောင်း၊ဖက်ဆစ်၊ အာဏာရှင်နဲ့ မိုက်မဲသူတွေ အဖြစ် လူသတ်သမားကို တရားဝင် ကျောထောက်နောက်ခံ ပေးသူတွေအဖြစ်သတ်မှတ်ခံခဲ့ရတယ်လို့ ရေးထားပါတယ်။
ဒါပေမဲ့ ဂိုဒီစ်ဟာ RSS အဖွဲ့ ရဲ့ တစ်စိတ်တစ်ပိုင်းဖြစ်ခဲ့တယ်ဆိုတဲ့ အချက်ကတော့ ဘယ်သောအခါမှ မပျောက်ကွယ်သွားဘဲ သံသယရှိဖွယ် အချက်အဖြစ် ဆက်ရှိနေဆဲပါ။
၁၉၄၉ခုနှစ် နိုဝင်ဘာ ၁၅ရက်နေ့ ဂိုဒီစ် ကြိုးစင်မတက်ခင်မှာလည်း RSSအဖွဲ့ ဆုတောင်းရဲ့ ပထမဝါကျလေးကြောင်းကို ရွတ်ဆိုခဲ့ပါတယ်။ “ဒါက သူဟာ အဲ့ဒီ အဖွဲ့အစည်းရဲ့ တက်ကြွတဲ့အဖွဲ့ဝင်တစ်ဦးဖြစ်တယ်ဆိုတာ ထပ်မံဖော်ပြလိုက်တာပါ” လို့ မစ္စတာဂျာက ပြောပါတယ်။ "ဂန္ဒီ လုပ်ကြံခံရတဲ့ကိစ္စမှာ RSSအဖွဲ့ မပါဘူးလို့ ခွဲထုတ်ဖို့လုပ်တာဟာ သမိုင်း ဖန်တီးမှုလုပ်ကြံမှုတစ်ခုပါ"
