ဘီလ်ရစ်ချတ်ဆန်နဲ့ မြန်မာ့အရေး

အမေရိကန်ပြည်ထောင်စု နယူးမက္ကဆီကိုပြည်နယ်အုပ်ချုပ်ရေးမှူးဟောင်းလည်းဖြစ်ပြီး ဝါရင့်သံတမန်တယောက်လည်း ဖြစ်တဲ့ ဘီလ်ရစ်ချတ်ဆန်ဟာ နိုဝင်ဘာလ ၂ ရက် အင်္ဂါနေ့မှာ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နဲ့ တွေ့ဆုံခဲ့ပါတယ်။

နေပြည်တော် နိုင်ငံတော်စီမံအုပ်ချုပ်ရေးကောင်စီရုံး သံတမန်ဆောင် ဧည့်ခန်းမမှာ တွေ့ဆုံခဲ့တာဖြစ်ပြီး ဗိုလ်ချုပ်မှူးကြီးမင်းအောင်လှိုင်နဲ့အတူ နိုင်ငံခြားရေးဝန်ကြီးဦးဝဏ္ဏမောင်လွင်၊ အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီး ဦးကိုကိုလှိုင်၊ ကျန်းမာရေးနဲ့အားကစားဝန်ကြီး ဒေါက်တာသက်ခိုင်ဝင်းတို့လည်း တက်ရောက်ခဲ့ကြပါတယ်။

အဲဒီဆွေးနွေးပွဲမှာ အမေရိကန်ပြည်ထောင်စုက မြန်မာနိုင်ငံအတွက် ကိုဗစ် ၁၉ ကာကွယ်ဆေး အကူအညီပေးမဲ့ အကြောင်းကို ဆွေးနွေးခဲ့တယ်လို့ စစ်ကောင်စီ မီဒီယာ မြန်မာ့ရုပ်မြင်သံကြားက သတင်းထုတ်ပြန်ပြောဆိုသွားပါတယ်။

မစ္စတာဘီလ်ရစ်ချတ်ဆန်ဟာ အမေရိကန်ပြည်ထောင်စု နယူးမက္ကဆီကိုပြည်နယ်ရဲ့ ၃၀ ဦးမြောက် အုပ်ချုပ်ရေးမှူးဟောင်း ဖြစ်သလို ကုလသမဂ္ဂရဲ့ အမေရိကန်သံအမတ်ကြီးအဖြစ်လည်း တာဝန်ထမ်းဆောင်ခဲ့ဖူးပါတယ်။ ကလင်တန်အစိုးရလက်ထက်မှာ သူဟာ စွမ်းအင်ဝန်ကြီးတာဝန်ယူခဲ့ဖူးပါတယ်။ သူဟာ ဒီမိုကရက်ပါတီဝင် ကွန်ဂရက်စ်လွှတ်တော်အမတ်ဟောင်းတယောက်လည်း ဖြစ်ပါတယ်။ သူဟာ ၂၀၀၈ ခုနှစ်မှာ ဒီမိုကရက်ပါတီသမ္မတလောင်းအဖြစ် အမည်စာရင်းတင်သွင်းခဲ့ပြီး နောက်ပိုင်းမှ ပြန်လည်ရုပ်သိမ်းသွားတာ ဖြစ်ပါတယ်။

ဘီလ်ရစ်ချတ်ဆန်ဟာ သူ့ရဲ့ခရီးစဉ်ကို အမေရိကန်အစိုးရနဲ့ ကုလသမဂ္ဂအတွင်းရေးမှူးချုပ်တို့ကို အသိပေးခဲ့တယ်လို့ ဆိုပေမဲ့ ဒီခရီးစဉ်ဟာ သူ့ရဲ့ ပုဂ္ဂလိကအစီအစဉ်နဲ့ဆောင်ရွက်တဲ့ ခရီးစဉ်သာဖြစ်တယ်လို့ ဆိုပါတယ်။

သူ့ခရီးစဉ်ဟာ မြန်မာနိုင်ငံအတွက် လူသားချင်းစာနာထောက်ထားတဲ့ အကူအညီတွေပေးခွင့်ရရေး လမ်းကြောင်းပွင့်သွားအောင် ဆွေးနွေးမဲ့ခရီးစဉ်လို့ သူ့ရဲ့ရစ်ချတ်ဆန်စင်တာက တနင်္ဂနွေနေ့မှာ တရားဝင်ထုတ်ပြန်ကြေညာခဲ့ပါတယ်။ ကိုဗစ်၁၉ ကာကွယ်ဆေးနဲ့ ဆေးဝါးပစ္စည်းတွေ၊ ပြည်သူ့ကျန်းမာရေးဆိုင်ရာ လိုအပ်ချက်ကို ဖြည့်ဆည်းမဲ့ အကူအညီတွေ ပေးနိုင်လိမ့်မယ်လို့ မျှော်လင့်ထားကြောင်း ပြောပါတယ်။

မစ္စတာရစ်ချတ်ဆန်ဟာ လူသားချင်းစာနာထောက်ထားမှုဆိုင်ရာကိစ္စတွေမှာ ဆောင်ရွက်ခဲ့ဖူးတဲ့ အတွေ့အကြုံအများအပြားရှိတယ်လို့ ရစ်ချတ်ဆန်စင်တာက ထုတ်ဖော်ပြောဆိုပါတယ်။

မြန်မာနိုင်ငံဟာ လူသားချင်းစာနာမှုဆိုင်ရာနဲ့ ကျန်းမာရေးဆိုင်ရာ ကူညီပံ့ပိုးမှုတွေကို မကြုံစဖူး ထူးကဲစွာ လိုအပ်နေကြောင်း မြန်မာစစ်ကောင်စီအနေနဲ့ အကြမ်းဖက်လုပ်ရပ်တွေကို အဆုံးသတ်ဖို့၊ မတရားဖမ်းဆီးထားသူတွေကို လွှတ်ပေးဖို့၊ လူသားချင်းစာနာထောက်ထားတဲ့ အကူအညီပေးသူတွေကို ဝင်ရောက်ခွင့်ပြုဖို့၊ အဲသလိုအကူအညီပေးမဲ့ ကျန်းမာရေးလုပ်သား၊ လူသားအရေးကူညီသူတွေရဲ့ လုံခြုံရေးကို အာမခံဖို့ကိစ္စတွေကို တောင်းဆိုသွားမယ်လို့လည်း ရစ်ချတ်ဆန်စင်တာက ထုတ်ဖော်ကြေညာခဲ့ပါတယ်။

မြန်မာနိုင်ငံအရေးနဲ့ ပတ်သက်ပြီး ရစ်ချတ်ဆန်စင်တာဟာ အများကြီးပါဝင်ဆောင်ရွက်ခဲ့ဖူးတယ်လို့ ဆိုထားပေမဲ့ စစ်တပ်အာဏာသိမ်းမှုနဲ့ ပတ်သက်ပြီး ရည်ညွှန်းပြောဆိုတာမျိုးတော့မရှိဘူးလို့ မစ္စတာရစ်ချတ်ဆန်ရဲ့ ပြောရေးဆိုခွင့်ရှိသူ မက်ဒလင်း မဟော်နီက ဆိုပါတယ်။

အမေရိကန်နိုင်ငံသား သတင်းစာဆရာ ဒန်နီဖန်းစတားလွတ်မြောက်ရေးအတွက် မစ္စတာရစ်ချတ်ဆန် ဆောင်ရွက်မှာလားဆိုတဲ့မေးခွန်းကိုတော့ မက်ဒလင်းမဟော်နီက ဖြေဆိုဖို့ငြင်းဆန်ပါတယ်။ မစ္စတာရစ်ချတ်ဆန်ဟာ သတင်းစာဆရာဒန်နီဖန်းစတား လွတ်မြောက်ရေးအတွက် ဆောင်ရွက်နိုင်လိမ့်မယ်လို့ မျှော်လင့်သူအများအပြားရှိပါတယ်။ ဘာလို့လဲဆိုတော့ အဲသလိုအဖမ်းဆီးခံရသူတွေရဲ့ လွတ်မြောက်ရေးအတွက် ညှိနှိုင်းဆောင်ရွက်ရာမှာ မစ္စတာ ရစ်ချတ်ဆန်ဟာ နာမည်ကျော်ကြားသူတယောက်ဖြစ်လို့ပါ။ အထူးသဖြင့်သူဟာ အမေရိကန် အစိုးရနဲ့ ဆက်ဆံရေးမကောင်းမွန်သူတွေကို ညှိနှိုင်းစေ့စပ်ရာမှာ အောင်အောင်မြင်မြင် လုပ်ဆောင်နိုင်သူတယောက် ဖြစ်ပါတယ်။ သူဟာမြောက်ကိုရီးယား၊ ကျူးဘား၊ အီရတ်၊ ဆူဒန်နိုင်ငံတွေနဲ့ စေ့စပ်ဆောင်ရွက်ခဲ့ဖူးတယ်လို့ သူ့ရဲ့ရစ်ချတ်ဆန်စင်တာမှာ ဖော်ပြရေးသားထားပါတယ်။ သူဟာ မြောက်ကိုရီးယားက ဖမ်းဆီးထားတဲ့ အမေရိကန်နိုင်ငံသားတွေ လွတ်မြောက်ရေး ဆောင်ရွက်ခဲ့ဖူးပါတယ်။ မကြာခင်ကကာလတုန်းကလည်း ဗင်နီဇွဲလားနိုင်ငံက ထိန်းသိမ်းထားတဲ့ အမေရိကန်နိုင်ငံသားတွေရဲ့ လွတ်မြောက်ရေးဆောင်ရွက်မှုမှာ ပါဝင်ဆောင်ရွက်ခဲ့ပါတယ်။

အမေရိကန်နိုင်ငံသား သတင်းစာဆရာ ဒန်နီဖန်းစတားဟာ Frontier Myanmar ရဲ့ အုပ်ချုပ်မှုအယ်ဒီတာဖြစ်ပြီး မေလ ၂၄ ရက်နေ့ကတည်းက ဖမ်းဆီးထိန်းသိမ်းခံထားခဲ့ရတာ ဖြစ်ပါတယ်။ သူဟာ ဆူပူအောင် လှုံ့ဆော်ရေးသားတယ်ဆိုပြီး တပ်မတော်ကို အကြည်ညိုပျက်စေမှု ပုဒ်မ ၅၀၅-က နဲ့ အမှုဖွင့်ဖမ်းဆီးခံခဲ့ရပါတယ်။ ဒါ့အပြင် သူ့ကို မတရားအသင်းဆက်သွယ်မှုပုဒ်မ၁၇ (၁) နဲ့ပါ အောက်တိုဘာလဆန်းပိုင်းတုန်းက ထပ်မံစွဲဆိုခဲ့ပါတယ်။

အမေရိကန်အစိုးရ နိုင်ငံခြားရေးဝန်ကြီးဌာနကတော့ ရစ်ချတ်ဆန်ရဲ့ ခရီးစဉ်ဟာ အမေရိကန်အစိုးရက တာဝန်ပေးတာ မဟုတ်ပေမဲ့ ကိုရိုနာဗိုင်းရပ်စ်ကပ်ဘေးဆိုင်ရာ အကူအညီတွေနဲ့ တခြားလူသားအရေးဆိုင်ရာ ကူညီထောက်ပံ့မှုတွေ ပို့ဆောင်ခွင့်ပြုရေးအတွက် မြန်မာစစ်တပ်ခေါင်းဆောင်တွေ နားလည်သဘောပေါက်အောင်ဆောင်ရွက်နိုင်လိမ့်မယ်လို့ မျှော်လင့်ချက်ထားကြောင်း ထုတ်ဖော်ပြောဆိုပါတယ်။ သူ့ခရီးစဉ်မှာ သတင်းစာဆရာဒန်နီဖန်းစတား လွတ်မြောက်ရေး လုပ်ငန်းစဉ်ပါမပါဆိုတာကိုတော့ နိုင်ငံခြားရေးဝန်ကြီးဌာနကလည်း ရည်ညွှန်းပြောဆိုတာမျိုး မရှိပါဘူး။

အစိုးရက တာဝန်ပေးတဲ့ခရီးစဥ်မဟုတ်သလို အစိုးရကို ကိုယ်စားပြုသွားရောက်တာလည်း မဟုတ်ပေမဲ့ လူသားရေးဆိုင်ရာ အကူအညီများဝင်ခွင့်ပြုရေးနဲ့ပတ်သက်ပြီး တိုးတက်မှုရလိမ့်မယ်လို့ မျှော်လင့်ကြောင်း တနင်္လာနေက ထုတ်ပြန်တဲ့ နိုင်ငံခြားရေးဝန်ကြီးဌာနရဲ့ ကြေညာချက်မှာ ဖော်ပြထားပါတယ်။

အမေရိကန်ပြည်ထောင်စုဟာ မြန်မာနိုင်ငံအပေါ် တရားဝင်အစိုးရကိုယ်စားလှယ် စေလွှတ်ရေးနဲ့ ပတ်သက်ပြီး တခြားသော အနောက်နိုင်ငံများနည်းတူ အထူးသတိထားဆောင်ရွက်ပါတယ်။ ဘာ့ကြောင့်လဲဆိုတော့ တရားဝင်အစိုးရကိုယ်စားလှယ်စေလွှတ်လိုက်ရင် ဗိုလ်ချုပ်မှူးကြီးမင်းအောင်လှိုင်တို့ ကြေညာထားတဲ့ အိမ်စောင့်အစိုးရကို တရားဝင်အစိုးရအဖြစ် အသိမှတ်ပြုရာရောက်သွားမှာစိုးလို့ ဖြစ်ပါတယ်။ စစ်ကောင်စီက ဖွဲ့စည်းထားတဲ့ အိမ်စောင့်အစိုးရဟာ တရားဝင်အစိုးရဟုတ်မဟုတ်၊ အမျိုးသားဒီမိုကရေစီအဖွဲ့ချုပ်ဝင် လွှတ်တော်အမတ်တွေ ဦးဆောင်ဖွဲ့စည်းထားတဲ့ အမျိုးသားညီညွတ်ရေးအစိုးရ NUG ကို တရားဝင်အစိုးရအဖြစ် အသိအမှတ်ပြုမပြုဆိုတဲ့ ပြဿနာဟာ မြန်မာ့နိုင်ငံရေးနဲ့ပတ်သက်ပြီး အရေးလည်းကြီးသလို အကဲလည်းဆတ်လှတဲ့ ပြဿနာတခု ဖြစ်ပါတယ်။

မြန်မာနိုင်ငံမှာ စစ်တပ်က အာဏာသိမ်းပြီးနောက် ကိုဗစ် ၁၉ တတိယလှိုင်းမှာ လူအများအပြားသေဆုံးခဲ့ပါတယ်။ အောက်ဆီဂျင်ဘူးရရှိရေးအတွက် တန်းစီတိုးကြရတဲ့အဖြစ်အပျက်၊ လူနာတွေကို ဆေးရုံတင်ခွင့်မရတဲ့ အဖြစ်အပျက်၊ လူနာကို ဆေးကုသပေးမဲ့ ဆရာဝန်ရှာမရတဲ့ အဖြစ်အပျက်၊ သေဆုံးသူတွေကို ဂုဏ်သိက္ခာရှိရှိ သင်္ဂြိုဟ်ခွင့်မရဘဲ ဖျာနဲ့ပတ်ပြီး တန်းစီသင်္ဂြိုဟ်ရတဲ့ အဖြစ်အပျက်တွေကို ကသောင်းကနင်းဖြစ်စဥ်ကြီးတခုအဖြစ် ကြုံခဲ့ကြရပါတယ်။

အခုအချိန်အထိ ကိုဗစ် ၁၉ ကာကွယ်ဆေးလုံးဝမထိုးရသေးတဲ့သူ အမြောက်အမြားရှိနေဆဲဖြစ်ပါတယ်။ ဒါ့အပြင် ပြင်းထန်လှတဲ့ ပြည်တွင်းစစ်ပဋိပက္ခကြောင့် စစ်ဘေးရှောင်ဒုက္ခသည်တွေ အများအပြားရှိနေပြီး အဲဒီစစ်ဘေးရှောင် ဒုက္ခသည်တွေအတွက် စားနပ်ရိက္ခာနဲ့ ဆေးဝါးပစ္စည်းတွေလည်း အလုံအလောက်မရှိဘဲ ချို့တဲ့လိုအပ်နေပါတယ်။ ဆောင်းရာသီဝင်ရောက်တဲ့အခါ အဲဒီဒုက္ခတွေဟာ ပိုမိုဆိုးဝါးလာလိမ့်မယ်လို့ ကျွမ်းကျင်သူတွေက ခန့်မှန်းထားကြပါတယ်။

သတ်ဖြတ်မှု၊ ညှဉ်းပန်းနှိပ်စက်မှုနဲ့ အရပ်သားနေအိမ်တွေကို မီးရှို့ဖျက်ဆီးမှုတွေလည်း အများအပြားဖြစ်ပေါ်နေပါတယ်။

စစ်ကောင်စီက အာဏာသိမ်းပြီးနောက် အာဏာသိမ်းမှုကို အဓိက ဆန့်ကျင်ကန့်ကွက်ကြသူတွေထဲမှာ ဆရာဝန်၊ သူနာပြု အစရှိတဲ့ ကျန်းမာရေးဝန်ထမ်းတွေက ရှေ့ဆုံးကပါဝင်ကြပါတယ်။ ကျန်းမာရေးဝန်ထမ်းတွေရဲ့ သပိတ်မှောက်မှု၊ ကျန်းမာရေးဝန်ထမ်းတွေကို ဖမ်းဆီးမှုတွေကြောင့် မြန်မာနိုင်ငံရဲ့ ပြည်သူ့ကျန်းမာရေးဝန်ဆောင်မှုဟာ ပိုပြီး ကစဉ့်ကလျား၊ ဖရိုဖရဲ ဖြစ်နေပါတယ်။ စစ်ရဲ့နောက်ဆက်တွဲဖြစ်တဲ့ စီးပွားရေးပျက်စီးယိုယွင်းမှုတွေက ကပ်လိုက်လာတဲ့အခါ ဒီ့ထက်ပိုပြီး ဆိုးဝါးတဲ့ အခြေအနေကိုရင်ဆိုင်ရလိမ့်မယ်လို့လည်း နိုင်ငံရေးပညာရှင်အများအပြားက တညီတညွတ်တည်း ယူဆနေကြပါတယ်။

ဒီလိုကပ်ဆိုက်နေတဲ့အခိုက်အတန့်၊ နိုင်ငံရေးတည်ငြိမ်မှုမရှိတဲ့အခိုက်အတန့်မျိုးမှာ လူသားအရေးစာနာထောက်ထားတဲ့ အကူအညီတွေ ဖြန့်ဖြူးခွင့်ရရေးအတွက် အာမခံချက်ရှိဖို့ သိပ်အရေးကြီးတယ်လို့ ပြည်နယ်အုပ်ချုပ်ရေးမှူး ရစ်ချတ်ဆန်က ယုံကြည်ထားပါတယ်လို့ ရစ်ချတ်ဆန်စင်တာရဲ့ ကြေညာချက်မှာ ဖော်ပြထားပါတယ်။

မစ္စတာရစ်ချတ်ဆန်ဟာ မြန်မာ့နိုင်ငံရေးနဲ့ စိမ်းသူတယောက်မဟုတ်ပါဘူး။ ဒေါ်အောင်ဆန်းစုကြည် ပထမအကြိမ် အိမ်အကျယ်ချုပ်ကျခံနေရဆဲဖြစ်တဲ့ ၁၉၉၄ ခုနှစ်မှာ သူဟာ အမေရိကန်ကွန်ဂရက်အမတ်တယောက်အနေနဲ့ ရန်ကုန်က နေအိမ်မှာ လာရောက်တွေ့ဆုံခဲ့ဖူးပါတယ်။

၂၀၁၇ ခုနှစ်မှာတော့ မြန်မာ့ခေတ်သစ်နိုင်ငံရေးမှာ အရေးပါတဲ့ အဖြစ်အပျက်ကြီးတရပ် ဖြစ်ပွားခဲ့ပါတယ်။ စစ်တပ်ရဲ့ နယ်မြေရှင်းလင်းစစ်ဆင်ရေးကြောင့် ရိုဟင်ဂျာ ၇ သိန်းကျော် အိုးအိမ်စွန့်ခွာထွက်ပြေးသွားကြရတဲ့ အဖြစ်အပျက်ပါ။ အဲဒီကာလမှာ အစိုးရအဖွဲ့ကိုတာဝန်ခံဦးဆောင်နေတဲ့ ဒေါ်အောင်ဆန်းစုကြည်က နိုင်ငံတကာပုဂ္ဂိုလ်များပါဝင်တဲ့ ရခိုင်မြောက်ပိုင်းအရေး အကြံပေးအဖွဲ့ ဖွဲ့စည်းရာမှာ ဘီလ်ရစ်ချတ်ဆန်ကို ဖိတ်ခေါ်ခဲ့ပါတယ်။ ဒါပေမဲ့ ဘီလ် ရစ်ချတ်ဆန်ဟာ ၂၀၁၈ ခုနှစ်မှာ ဒေါ်အောင်ဆန်းစုကြည်နဲ့ ကတောက်ကဆတ်ဖြစ်ပြီး အဲဒီအကြံပေးအဖွဲ့ကနေ ရုတ်တရက် နုတ်ထွက်သွားခဲ့ပါတယ်။

ရခိုင်အရေးအကြံပေးအဖွဲ့ဟာ ဖုံးဖိဖာထေးလုပ်ရပ်တွေကိုသာ လုပ်နေတဲ့ အဖွဲ့အစည်းဖြစ်နေလို့ သူနုတ်ထွက်ခဲ့တာလို့ မစ္စတာ ရစ်ချတ်ဆန်က ဆိုပါတယ်။ အစိုးရအကြိုက်အလိုက်ဆောင်ပြောဆိုနေတဲ့ အဖွဲ့အစည်းမှာ သူပါဝင်ပတ်သက်ချင်စိတ်မရှိတော့လို့ နုတ်ထွက်တာလို့လည်း ပြောဆိုခဲ့ပါတယ်။

အဲဒီအချိန်တုန်းက ရိုဟင်ဂျာတွေ အင်းဒင်ရွာမှာ အစုအပြုံလိုက်သတ်ဖြတ်မှုသတင်းကို ဖော်ထုတ်ရေးသားဖို့ ကြိုစားတဲ့ ရိုက်တာသတင်းထောက်နှစ်ယောက်ဖြစ်သူ ကိုဝလုံးနဲ့ ကိုကျော်စိုးဦးတို့ အဖမ်းဆီးခံထားပါတယ်။ သူတို့ကို ဖမ်းဆီးတဲ့ကိစ္စနဲ့ ပတ်သက်ပြီး မစ္စတာရစ်ချတ်ဆန်က ဒေါ်အောင်ဆန်းစုကြည်ကို ပြောဆိုရာမှာ ဒေါ်အောင်ဆန်းစုကြည်ဟာ ဒေါသပေါက်ကွဲပြီး ပြင်းပြင်းထန်ထန်တုံ့ပြန်ခဲ့တယ်လို့ မစ္စတာရစ်ချတ်ဆန်က ပြန်ပြောပြခဲ့ပါတယ်။

ဘီလ်ရစ်ချတ်ဆန်ဟာ သူ့လုပ်ငန်းနဲ့မဆိုင်တဲ့ကိစ္စတွေကို ဘောင်ကျော်ပြောဆိုခဲ့ပြီး အဖွဲ့ကနေ နုတ်ထွက်သွားတာဖြစ်တယ်လို့ အဲဒီတုန်းက ဒေါ်အောင်ဆန်းစုကြည်အစိုးရရဲ့ ပြောရေးဆိုခွင့်တာဝန်ယူထားတဲ့ ဦးဇော်ဌေးက ဆိုပါတယ်။

၂၀၁၈ ခုနှစ်မှာ မြန်မာနိုင်ငံကို နောက်ဆုံးရောက်သွားတဲ့ ဘီလ်ရစ်ချတ်ဆန်ဟာ အခုတခါ မြန်မာနိုင်ငံကို အသွင်တမျိုးနဲ့ ထပ်မံရောက်ရှိလာတာ ဖြစ်ပါတယ်။

နိုဝင်ဘာလ ၃ ရက် ဗုဒ္ဓဟူးနေ့မနက်ခင်းမှာ သူဟာ သူ့ခရီးစဉ်အကြောင်း ရန်ကုန်မြို့ရှိ မြန်မာနိုင်ငံဆိုင်ရာ အမေရိကန်သံအမတ်ကြီးကို ရှင်းလင်းတင်ပြပြီး နိုဝင်ဘာလ ၄ ရက်ကြာသပတေးနေ့မှာ မြန်မာနိုင်ငံက ထွက်ခွာလိမ့်မယ်လို့ မြန်မာနောင်းသတင်းဌာနက ရေးသားဖော်ပြထားပါတယ်။