ကျန်းမာရေးဝန်ကြီးဌာန ပြောခွင့်ရသူကြောင့် ဆရာဝန်တချို့ စိတ်ပျက်၊ ကိုဗစ်လူနာ နံပါတ် ၈ နဲ့ထိတွေ့တဲ့ ပြင်သစ် ၄ ဦးကို သီးသန့်ခွဲထားစောင့်ကြည့်အပါအဝင် မတ် ၂၉ ရက် မနက်ခင်းထိပ်တန်းသတင်းများ

(၁) ကိုဗစ်လူနာနံပါတ် ၈ နဲ့ ထိတွေ့ခဲ့တဲ့ပြင်သစ် ၄ လေးဦးကို ၁၄ ရက် သီးသန့်စောင့်ကြည့်

ကိုရိုနာဗိုင်းရပ်စ်ကူးစက်ခံရသူ လူနာ နံပါတ် ၈ ဧည့်လမ်းညွှန် ဝန်ဆောင်မှုပေးခဲ့တဲ့ ပြင်သစ်နိုင်ငံသား ၄ ဦးကို သူတို့ လက်ရှိတည်းခိုနေတဲ့ Green Hill ဟိုတယ်မှာ ၁၄ ရက်ကြာ သီးသန့်စောင့်ကြည့်နေပါတယ်။

"ဒီဧည့်သည်တွေကို ကျန်းမာရေးဝန်ကြီးဌာနက သတ်မှတ်ထားတဲ့ရက်အတိုင်း ထားမှာပါ။ လက်ရှိဟိုတယ်မှာ ရှိနေပါတယ်" လို့ Green Hill ဟိုတယ်က တာဝန်ရှိသူတစ်ဦးက ဘီဘီစီကို မတ်လ ၂၉ ရက်နံနက်မှာ ပြောပါတယ်။

ဒီပြင်သစ် ၄ ဦးဟာ မူလက ဒီကနေ့မတ်လ ၂၉ ရက်မှာ မြန်မာနိုင်ငံက ပြန်လည်ထွက်ခွာဖို့စီစဉ်ထားတာဖြစ်ပါတယ်။

ဒါ့အပြင် ဒီလူနာ ဝန်ဆောင်မှုပေးခဲ့တဲ့အထဲက ပြင်သစ်နိုင်ငံသား ခုနစ်ဦးဟာ ပြီးခဲ့တဲ့ရက်ပိုင်းက မြန်မာနိုင်ငံက ပြန်လည်ထွက်ခွာသွားတဲ့အတွက် အဲဒီခုနစ်ဦးကိုလည်း ပြင်သစ်သံရုံးကို အကြောင်းကြားထားပြီး သူတို့ ရောက်ရှိနေတဲ့နေရာမှာ သီးသန့် ကွာရန်တင်းလုပ်နိုင်ဖို့ အကြောင်းကြား ထားတယ်လို့ မြန်မာနိုင်ငံဧည့်လမ်းညွှန်များအသင်း ဥက္ကဋ္ဌ ဦးအောင်ထွန်းလင်းက ဘီဘီစီကိုပြောပါတယ်။

ကိုရိုနာဗိုင်းရပ်စ် ကူးစက်ခံရသူ လူနာနံပါတ် ၈ ဟာ မတ်လ ၁၄ ရက်ကနေ ၁၉ ရက်အထိ ပြင်သစ်နိုင်ငံသားခရီးသွားဧည့်သည်တွေကို ဧည့်လမ်းညွှန် ဝန်ဆောင်မှုပေးခဲ့တာဖြစ်ပါတယ်။

မတ်လ ၂၅ ရက်မှာ ဖျားနာလာတဲ့အတွက် ရန်ကုန်ဆေးရုံကြီးကို သွားရောက်ပြသခဲ့ပြီးနောက် ဆေးစစ်ချက်အဖြေအရ ကိုရိုနာဗိုင်းရပ်စ် ကူးစက်ခံနေ ရကြောင်း အစိုးရက ထုတ်ပြန်ခဲ့ပါတယ်။

"ကျွန်တော်တို့သိသလောက် ဒီနေ့ထိ ပြင်သစ် ၄ ဦးကတော့ နေကောင်းနေပါတယ်။ ဒါပေမဲ့ ပြင်သစ်ကိုပြန်သွားတဲ့သူတွေရဲ့အခြေအနေက ကျွန်တော်တို့ တိတိကျကျ မသိဘူးဖြစ်နေတယ်။ လူနာကလည်း ဒီကနေ့ထိ ကျန်းမာရေးကောင်းပါတယ်။ တစ်ခုပေါ့နော်။ ဟိုမှာပြန်သွားတဲ့ဧည့်သည်တွေလည်း အခြေအနေကောင်းတယ်။ ဒီကဧည့်သည်တွေလည်း အခြေအနေကောင်းတယ်ဆို တစ်ခုပဲ ကိုယ့်ပြည်တွင်းက ဖြစ်နေမှာစိုးလို့ ဆိုတဲ့ တစ်ချက်ပေါ့နော်။ ဖြစ်နိုင်ခြေများတာကတော့ ဧည့်သည်ကနေ ကူးစက်တာဖြစ်နိုင်ခြေများပါတယ်"လို့ ဦးအောင်ထွန်းလင်းက ပြောပါတယ်။

လက်ရှိမှာ လူနာနံပါတ် ၈ ဟာ ဝေဘာဂီအထူးကုဆေးရုံမှာ စောင့်ကြည့်ကုသမှုခံယူနေပါတယ်။

အသက် ၆၀ အရွယ် ဧည့်လမ်းညွှန်ဟာ ပြီးခဲ့တဲ့သတင်းပတ်အတွင်း ပြင်သစ်ခရီးသည်တွေနဲ့အတူ ရန်ကုန်၊ မန္တလေး၊ စစ်ကိုင်း၊ မုံရွာ၊ ပခုက္ကူ၊ ပုဂံ၊ ညောင်ဦး၊ ပုပ္ပါး၊ ပင်းတယ၊ အင်းလေး၊ ငပလီ စတဲ့ နေရာ ၁၀ နေရာထက်မနည်းကို သွားခဲ့တာဖြစ်တယ်လို့ မန္တလေးဇုန်ဧည့်လမ်းညွှန်အသင်းက ထုတ်ပြန်ထားပါတယ်။

(၂) ကျန်းမာရေးဝန်ကြီးဌာန ပြောခွင့်ရသူကြောင့် ဆရာဝန်တချို့ စိတ်ပျက်

ကျန်းမာရေးဝန်ကြီးဌာန ပြောခွင့်ရသူ ဗဟိုကူးစက်ရောဂါဌာနခွဲက ညွှန်ကြားရေးမှူး ဒေါက်တာခင်ခင်ကြီးရဲ့ လူမှုကွန်ရက်မှာ မနေ့က ရေးသားချက်ကြောင့် ဆရာဝန်နဲ့ ကျန်းမာရေးဝန်ထမ်းတချို့ စိတ်ပျက်ခဲ့ကြပါတယ်။

ဒေါက်တာခင်ခင်ကြီးက သူ့ရဲ့လူမှုကွန်ရက်မှာ ကျန်းမာရေးဝန်ကြီးဌာနရဲ့ ထုတ်ပြန်ချက်ဖြစ်တဲ့ တိုင်းနဲ့ပြည်နယ်အလိုက် ဆေးရုံတွေမှာ ဆေးနဲ့ဆေးပစ္စည်းဖြန့်ဝေထားမှုစာရင်းနဲ့အတူ "အဓိပ္ပာယ်မရှိ လျှောက်တင်တဲ့သူကိုလဲ အရေးယူဖို့ကိစ္စ စီစဉ်နေပါပြီနော်၊ သေသေချာချာ တိတိကျကျမရေးဘဲ ရမ်းသန်းမှန်းတမ်းရေးပြီး attention ယူတဲ့သူတွေလည်း ပြင်ဆင်ထားပါနော်"လို့ အစချီပြီးပို့စ်တစ်ခုရေးသားခဲ့တာပါ။

အဲဒီမတိုင်ခင်က ပင်းတယက မီးအိမ်ရှင်လို့ လူသိများတဲ့ လက်ရှိပုသိမ်ပြည်သူ့ဆေးရုံဆေးရုံအုပ်ကြီး ဒေါက်တာသန်းမင်းထွဋ်အပါအဝင် တိုင်းနဲ့ ပြည်နယ်အများစုကဆေးရုံတွေမှာ တာဝန်ထမ်းဆောင်နေကြတဲ့ ဆေးရုံအုပ်ကြီးတွေ၊ ဆရာဝန်ကြီးတွေအပါအဝင် ဆရာဝန်တွေဟာ ဆေးရုံတွေမှာ ရောဂါကာကွယ်ရေးဝတ်စုံတွေ၊ အသက်ရှူစက်တွေနဲ့ နှာခေါင်းစည်းတွေ စတဲ့ ကုသရေးပစ္စည်း ကိရိယာတွေလိုအပ်နေလို့ လှူဒါန်းပေးကြဖို့ ပြည်သူကိုပန်ကြားအသိပေးတာတွေရှိခဲ့ပါတယ်။

မနေ့က ဒေါက်တာခင်ခင်ကြီးရဲ့ အရေးယူမယ်ဆိုတဲ့ အသုံးအနှုန်းကြောင့် ရှေ့တန်းက ပါဝင်ကုသပေးနေတဲ့ ဆရာဝန်တွေ ဒေါသထွက်စိတ်ပျက်ပြီး လူမှုကွန်ရက်ကတစ်ဆင့်ပြန်လည်တုံ့ပြန်ရေးသားခဲ့ကြပါတယ်။

အခုလို ဝန်ကြီးဌာန ပြောခွင့်ရသူကိုယ်တိုင်က ဆေးဝန်ထမ်းတွေဆရာဝန်တွေရဲ့ရှေ့တန်းက ရောဂါကိုခုခံတိုက်နေရတဲ့အခြေအနေပေါ်နားမလည်ဘဲ အရေးယူမယ်ဆိုတဲ့အပေါ် စိတ်ပျက်မိကြောင်းနဲ့ အသက်စွန့်ဆေးကုပေးနေရတဲ့အခြေအနေကိုပြန်လည်သုံးသပ်ရတော့မယ်လို့ ဆရာဝန်တချို့က တုံ့ပြန်ခဲ့ကြပါတယ်။

ဒီပို့စ်ကြောင့်ပဲ အလှူရှင်တချို့က လှူဖို့ပြင်ဆင်ထားတာတွေ လှူရမှာလားမလှူရဘူးလားလို့ လူမှုကွန်ရက်မှာရေးသားမေးခွန်းထုတ်လာတာတွေရှိလာပြီး ဝေဖန်မှုတွေရှိလာတဲ့နောက် ဒေါက်တာခင်ခင်ကြီးက သူ့ပို့စ်ကို ပြန်လည်တည်းဖြတ်ပြင်ဆင်ခဲ့ပါတယ်။

ဒီပို့စ်က ဝန်ကြီးဌာနအပေါ် အစိုးရအပေါ် အယုံအကြည် ကင်းမဲ့အောင် ရေးသူကိုပဲ ဆိုလိုပါတယ်၊ ဆရာဝန်တွေ လိုတဲ့ပစ္စည်းကို အလှူခံနေတာနဲ့ မပတ်သက်ပါ လို့ သူက ပြန်ရေးခဲ့ပါတယ်။

(၃) ထိုင်းနယ်စပ်က ပြန်လာတဲ့ မြန်မာလုပ်သားတွေကို အောင်မင်္ဂလာအဝေးကွင်းကတစ်ဆင့် နေရပ်ကိုပို့ဆောင်ပေး

ထိုင်း-မြန်မာနယ်စပ် မြဝတီနယ်စပ်ဂိတ်ကနေတစ်ဆင့် ပြန်လည်ဝင်ရောက်လာခဲ့ကြတဲ့ မြန်မာနိုင်ငံသားတွေကို ရန်ကုန်မြို့ အောင်မင်္ဂလာ အဝေးပြေးကားဂိတ်မှာ မတ်လ ၂၇ ရက်နေ့က လက်ခံပြီး သူတို့ရဲ့မူလနေရပ်ဒေသတွေ ဆီကို ပို့ဆောင်ပေးနေတယ်လို့ ရခိုင်ပြည်နယ် ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန၊ ဦးစီးအရာရှိ ဦးရဲမင်းဦးက ဘီဘီစီကိုပြောပါတယ်။

အဲ့ဒီပြန်လည်ဝင်ရောက်လာခဲ့သူတွေအားလုံးဟာ ထိုင်းနိုင်ငံတစ်ခုတည်းက ဝင်ရောက်လာခဲ့ကြတာဖြစ်ပြီး ဧရာဝတီ၊ ရခိုင်၊ ပဲခူး၊ မကွေး စတဲ့ ပြည်နယ်နဲ့ တိုင်းဒေသကြီးတွေကဖြစ်ကြောင်းနဲ့ သူတို့တွေဟာ မတ်လ ၂၆ ရက်နေ့မှာ မြဝတီမြို့ကိုရောက်ရှိခဲ့ကြတာဖြစ်ပါတယ်။

အဲ့ဒီနောက် မြဝတီကနေတစ်ဆင့် ရန်ကုန်မြို့ကိုရောက်လာခဲ့ကြတာဖြစ်ပါတယ်။

ပြန်လည်ဝင်ရောက်လာသူအရေအတွက် ဘယ်လောက်ပါဝင်တယ်ဆိုတာကို အတိအကျမသိရပေမယ့် ရန်ကုန်မြို့ အောင်မင်္ဂလာအဝေးပြးကားဂိတ်ကို ရောက်ရှိလာသူတွေထဲမှာတော့ ဧရာဝတီတိုင်းက အများဆုံးဖြစ်ပြီး ရခိုင်ပြည်နယ် ခရိုင်ငါးခရိုင်က လူတွေလည်း ပါဝင်တယ်လို့ ဦးရဲမင်းဦးက ဆိုပါတယ်။

မြန်မာနိုင်ငံနဲ့ နယ်စပ်ချင်းထိစပ်နေတဲ့ ထိုင်းနိုင်ငံနဲ့ တရုတ်နိုင်ငံတွေကို သွားရောက် အလုပ်လုပ်ကိုင်နေတဲ့ မြန်မာရွှေ့ပြောင်းလုပ်သားတွေ တော်တော်များများရှိနေကြပြီး တရုတ်နိုင်ငံမှာ ကိုရိုနာဗိုင်းရပ်စ် စတင်ဖြစ်ပွားခဲ့တဲ့အချိန်ကနေ မြန်မာနိုင်ငံကို တဖြည်းဖြည်း ပြန်လည် ဝင်ရောက်လာခဲ့ကြတာဖြစ်ပါတယ်။

မြဝတီကထွက်လာခဲ့တဲ့ ကားတွေကို အောင်မင်္ဂလာအဝေးပြေးကားကွင်းအတွင်းမှာ ရန်ကုန်တိုင်းအစိုးရအဖွဲ့ အပါအဝင် သက်ဆိုင်ရာ ပြည်နယ်နဲ့တိုင်းဒေသကြီးတွေက တာဝန်ရှိတဲ့အဖွဲ့အစည်းတွေနဲ့ ကျန်းမာရေးဌာနတို့ စုပေါင်းပြီးတော့ ညလုံးပေါက်စစ်ဆေးမှုတွေပြုလုပ်ခဲ့တာပါ။

အဲဒီနောက် မတ်လ ၂၈ ရက်နေ့မနက်ပိုင်းမှာ ထွက်တဲ့ခရီးသည်ကားတွေနဲ့ နေရပ်ကို ထပ်မံပို့ဆောင်ပေးခဲ့တယ်လို့ သိရပါတယ်။

"တိုင်းဒေသကြီးနဲ့ပြည်နယ်အလိုက် သက်ဆိုင်ရာအလိုက် လာပြီးတော့ ခေါ်ကြတာတွေလည်းရှိတယ်။ ဧရာဝတီတိုင်းကတော့ တော်တော်များတယ်ဗျ။ ကျွန်တော်တို့ရခိုင်ကတော့ ၃၀ နီးပါးလောက်ရှိတယ်"လို့ ဦးရဲမင်းဦးက ပြောပါတယ်။

ရခိုင်ပြည်နယ်ကိုပြန်လာကြတဲ့သူတွေထဲမှာတော့ ကျောက်ဖြူခရိုင်၊ သံတွဲခရိုင်၊ မြောက်ဦးခရိုင်၊ စစ်တွေခရိုင်နဲ့ မောင်တောခရိုင်တွေက ဒေခသံတွေဖြစ်ပြီး အဲ့ဒီလူတွေကို သက်ဆိုင်ရာမြို့နယ်တွေမှာ ဒေသအာဏာပိုင်တွေကနေတစ်ဆင့် နေအိမ်တွေထိရောက်ရှိနိုင်ရေးအတွက် ဆက်လက်ဆောင်ရွက်သွားမှာဖြစ်တယ်လို့ ဆိုပါတယ်။

မိမိတို့ရဲ့နေအိမ်တွေကိုရောက်သွားတဲ့အခါမှာလည်း နေအိမ်အပြင်ကိုမထွက်ကြဖို့၊ မိသားစုတွေနဲ့ ရောနှောမနေကြဖို့၊ အစားအသောက်တွေကိုဘယ်လိုစားသုံးရမယ်ဆိုတဲ့ ကာကွယ်စောင့်ရှောက်မှုအပိုင်းတွေနဲ့ အနည်းဆုံး ၁၄ ရက်ခန့် သီးသန့်နေထိုင်ကြဖို့အတွက်ကိုလည်း ကျန်းမာရေးဌာနက ညွှန်ကြားလိုက်တယ်လို့ ပြန်ဝင်လာတဲ့အထဲမှာပါဝင်တဲ့ စစ်တွေမြို့နယ်၊ အလယ်ချောင်းကျေးရွာက ဒေါ်ခင်ခင်သန်းက ပြောပါတယ်။

ထိုင်းနိုင်ငံမှာနေထိုင်ခဲ့ပြီး မိမိကိုယ်ကို ရောဂါကူးစက်မှုမရှိဘူးလို့ယုံကြည်ပေမယ့် မိသားစုတွေနဲ့ ပြည်သူတွေအပေါ် ရောဂါကူးစက်မှုတွေမ ရှိစေရေးအတွက် သက်ဆိုင်ရာအဖွဲ့အစည်းတွေရဲ့ညွှန်ကြားချက်အတိုင်း နေအိမ်မှာ သီးခြားနေထိုင်သွားမယ်လို့ သူကဆက်ပြောပါတယ်။

အခုလိုမျိုး ကိုဗစ် ၁၉ ရောဂါဖြစ်ပွားနေတဲ့ အိမ်နီးချင်းနိုင်ငံတွေကို သွားရောက်အလုပ်လုပ်ကိုင်ပြီး နေရပ်ကိုပြန်လည်ရောက်ရှိနေသူတွေထဲမှာ ကျန်းမာရေးဌာနရဲ့ညွှန်ကြားချက်တွေအရ သီးခြားနေထိုင်တာမျိုးမလုပ်ဘဲ မြို့ထဲရွာထဲတွေမှာ သွားလာနေတာတွေရှိနေတဲ့အတွက် စိုးရိမ်နေရတာကြောင့် သက်ဆိုင်ရာ အဖွဲ့အစည်းတွေအနေနဲ့ အနီးကပ်ကြပ်မတ်မှုတွေ ပြုလုပ်ပေးဖို့လိုအပ်နေတယ်လို့ ရခိုင်ဒေသခံတွေက ပြောပါတယ်။

(၄) အီတလီမှာ ဗိုင်းရပ်စ်ကြောင့် သေသူတစ်သောင်းကျော်၊ နယူးယောက်ကို သီးသန့်ခွဲခြားစောင့်ကြည့်ဖို့ ထရမ့်စဉ်းစားနေ

အီတလီနိုင်ငံမှာ ကိုရိုနာဗိုင်းရပ်စ်ကြောင့် သေဆုံးသူပေါင်း တစ်သောင်းကျော်ရှိသွားပြီဖြစ်ပါတယ်။

မတ်လ ၂၉ ရက်မနက်အထိ ကမ္ဘာတဝန်း ကိုရိုနာကူးစက်သူပေါင်း ၆၆၀,၀၀၀ ကျော်၊ သေဆုံးသူ ၃၀,၀၀၀ ကျော်နဲ့ ပြန်လည် ကျန်းမာလာသူ ၁၄၀,၀၀၀ ကျော် ရှိနေပါတယ်။

အီတလီမှာ မနေ့က တစ်ရက်တည်းနဲ့ သေဆုံးသူ ၈၈၉ ဦးရှိခဲ့ပါတယ်။

ကူးစက်ခံရသူက ၉၂၄၇၂ ဦးနဲ့ သေဆုံးသူ ၁၀၀၀၀ ကျော်ရှိလာပြီး ဒီသေဆုံးနှုန်းက ဗိုင်းရပ်စ်ဗဟိုချက်ဖြစ်ခဲ့တဲ့ တရုတ်နိုင်ငံထက် သုံးဆရှိနေတယ်လို့ အမေရိကန်ပြည်ထောင်စု၊ ဂျွန်ဟော့ပ်စ်ကင်း တက္ကသိုလ်သုတေသန ကဆိုပါတယ်။

အီတလီမှာ သက်ကြီးရွယ်အိုတွေများပြီး ဒီဗိုင်းရပ်စ်ဒဏ်က သက်ကြီးရွယ်အိုတွေမှာ အသက်အန္တရာယ်ရှိတာကြောင့် ခုလို သေဆုံးနှုန်းများရတာ ဖြစ်တယ်လို့ ကျွမ်းကျင်သူတွေက ဆိုပါတယ်။ သေဆုံးသူအများစုရဲ့ ပျမ်းမျှအသက်ဟာ အသက် ၇၈ နှစ်နဲ့အထက်ဖြစ်တယ်လို့ အီတလီကျန်းမာရေးအင်စတီကျူ့က မတ်လ ၂၇ ရက်နေ့မှာ ပြောကြားထားပါတယ်။

အမေရိကန်က ကူးစက်သူပေါင်း ၁၀၅,၀၀၀ ကျော်နဲ့ ကမ္ဘာပေါ်မှာ ကူးစက်မှုအများဆုံးဖြစ်ပြီး သေဆုံးသူကတော့ ၁,၇၀၀ ကျော်ရှိနေပါတယ်။

ကိုရိုနာဗိုင်းရပ်စ် ကူးစက်ရာဗဟိုချက်လိုဖြစ်လာတဲ့နယူးယောက်ပြည်နယ်ကို အဝင်ထွက်တွေကန့်သတ်ပြီး သီးသန့်စောင့်ကြည့်တာတွေလုပ်ဖို့ စဉ်းစားနေတယ်လို့ ထရမ့်က ပြောပါတယ်။

နယူးယောက်မှာ ဗိုင်းရပ်စ်ကူးစက်သူပေါင်း ၅၂၀၀၀ ကျော်ရှိပြီး ဒါက ကူးစက်မှုစုစုပေါင်းရဲ့ တစ်ဝက်လောက်ရှိနေတယ်လို့ သူက ဆိုပါတယ်။

ဒါပေမဲ့ နယူးယောက်ပြည်နယ်အုပ်ချုပ်ရေးမှူးက ဒီအကြံအစည်က အဓိပ္ပာယ်မရှိဘူးလို့ ဆိုပြီး ဒီလိုလုပ်မယ်ဆိုရင် စစ်ကြေညာတာပဲလို့ တုံ့ပြန်ထားပါတယ်။

ဗြိတိန်မှာတော့ ဗိုင်းရပ်စ်ကြောင့် သေဆုံးသူ တစ်ထောင်ကျော်လာပါပြီ။ အိမ်ရှေ့စံချားလ်မင်းသား၊ ဝန်ကြီးချုပ် ဘောရစ်ဂျွန်ဆင်တို့လည်း ကိုရိုနာဗိုင်းရပ်စ် ကူးစက်ခံထားရလို့ သီးသန့်ခွဲနေထိုင်နေကြပါတယ်။

ဝန်ကြီးချုပ် ဘောရစ်ဂျွန်ဆင်က အခြေအနေတွေပြန်ကောင်းမလာခင်စပ်ကြား ဒီထက်ပိုပြီးဆိုးရွားသွားမယ့်အခြေအနေတွေ ရင်ဆိုင်ရဖို့ရှိတယ်လို့ ဗြိတိန်ပြည်သူတွေကို ပန်ကြားတဲ့စာမှာ ရေးသားထားပါတယ်။