မြန်မာပင်လယ် ပြင်မှာ မျောနေတဲ့ အိုက်စ်တွေ တွေ့

ဧရာဝတီတိုင်းဒေသကြီး၊ ဖျာပုံမြို့နယ်၊ အမာမြို့အနီး ပင်လယ်ရေမိုင် ၁၅ မိုင်အကွာ ပင်လယ်ပြင်အတွင်း မှာမျောပါနေတဲ့ ကျပ်သိန်းပေါင်း ၃ သိန်းနီးပါး တန်ဖိုးရှိ အိုက်စ် (ICE) လို့ ယူဆရတဲ့ မူးယစ်ဆေးဝါးတွေကို မျောပါနေတာကို ရေလုပ်သားတွေ တွေ့ခဲ့ပါတယ်။

အဲဒီအိတ်တွေ မှာ မြန်မာလို ငါးစာလို့ရေးထားပြီးတော့ လှိုင်သာယာ ရွှေလင်ပန်းစက်မှုဇုန်က ထုတ်တဲ့အိတ်ခွံတွေလို့ ယူဆရတယ်လို့ မျက်မြင်တွေ့ရှိခဲ့သူ ဦးဇော်ဝင်းက ပြောပါတယ်။

ရဲတပ်ဖွဲ့ ဘက်ကတော့ ပင်လယ်ထဲမှာ မျောလာတဲ့ ပီနံအိတ်ထုပ်တွေကို စစ်ဆေးကြည့် ရာမှာ အထဲမှာပါလာတဲ့ ပစ္စည်းတွေက အိုက်စ် - ICE လို့ ယူဆရပြီးအမှုကွင်းဆက်တွေကို ဆက်လက်စုံစမ်းနေတယ်လို့လည်း သတင်းထောက် တွေကို ပြောပါတယ်။

စုစုပေါင်းအိတ်၂၃ အိတ် ဖြစ်ပြီးတော့ ပီနံအိတ်တွေထဲမှာ အိုက်စ် - ICE လို့ ယူဆရတဲ့ တစ်ကီလိုဂရမ်စီ အထုပ်ပေါင်း ၃၀ ခန့်ပါတယ် လို့လည်း ဦးဇော်ဝင်းကပြောပါတယ်။

ရေလုပ်သားတွေက ပင်လယ်ပြင် ပိုက်ထောင်ရင်းတွေ့လို့ ဆယ်ယူလာတာဖြစ်ပြီး ကျောတ်ချဉ်နဲ့ ပုံစံဆင်ကာ မီးနဲ့ရှို့ကြည့်ရာမှာတော့ အငွေ့ကမူးတာကြောင့် အုပ်ချုပ်ရေးမှူးတွေကနေတစ်ဆင့် ရဲတပ်ဖွဲ့ကို အကြောင်းကြားခဲ့တာလို့လည်း ဘီဘီစီကို ပြောပြပါတယ်။

ဧရာဝတီတိုင်းအတွင်းမှာ မူးယစ်ဆေးဝါး ပမာဏအများဆုံးနဲ့ ငွေကြေးပမာဏ အများဆုံး ပင်လယ်ပြင်မှာ တွေ့တာ ဖြစ်တယ်လို့လည်း ဖျာပုံ မြို့ခံတစ်ဦးက ရဲတပ်ဖွဲ့ကိုကိုးကားပြီး ပြောပါတယ်။

ပီနံအိတ်တွေထဲက အထုပ်တွေက Refined Coffee Tea စာတန်း နဲ့ တရုတ်စာတွေပါပြီးတော့ ၁ ကီလိုဂရမ်ပါ အထုပ်ပေါင်း ၆၄၉ ထုပ်၊ တန်ဖိုးအားဖြင့် မြန်မာငွေသိန်းပေါင်း သုံးသိန်းနီးပါး တန်ဖိုးရှိ မူးယစ်ဆေးဝါးလို့ရဲတပ်ဖွဲ့ ဘက်က တန်ဖိုးဖြတ်ထုတ်ပြန်ပါတယ် ။

သိမ်းဆည်းရမိတဲ့မူးယစ်ဆေးတွေကို ဖျာပုံမြို့နယ်၊ အမာနယ်မြေရဲစခန်းမှာ မူးယစ်ဆေးဝါးနှင့် စိတ်ကိုပြောင်းလဲစေတဲ့ဆေးဝါးများဆိုင်ရာ ဥပဒေပုဒ်မ နဲ့ အမှုဖွင့် ပြီးစုံစမ်းစစ်ဆေး နေပါတယ်။

ဖျာပုံမြို့ခံတွေ ပြောတာက အရင်က ပင်လယ်ပြင်မှာ ဆီပေပါတွေ အခြားအသုံးအဆောင် တွေ မျောတာကို တွေ့ရပြီး အခုလို မူးယစ်ဆေးဝါးတွေ မျောပါနေတာကိုတွေ့တာ ပထမဆုံးဖြစ်တယ်လို့လည်းပြောပါတယ်။

ပြီးခဲ့တဲ့ မတ်လကလည်း တနင်္သာရီတိုင်း၊ ကော့သောင်းမြို့အနီး ပင်လယ်ပြင်မှာ ခန့်မှန်းတန်ဖိုးငွေ ကျပ် သိန်းပေါင်း လေးသိန်းကျော် (ဒေါ်လာ ၂၆ .၆ သန်း) တန်ဖိုးရှိတဲ့ ICE မူးယစ်ဆေးဝါး ၁ ကီလိုဂရမ်ပါ အထုပ် ၁၇၃၇ ထုပ် ဖမ်းဆီး ရမိခဲ့တယ်လို့ တပ်မတော်ကာကွယ်ရေး ဦးစီးချုပ်ရုံးက သတင်းထုတ်ပြန်ခဲ့ပါတယ်။

အခုဒီမူးယစ်ဆေးဝါးတွေ ကို ရတဲ့နေရာမှာ ကမ်းဝေးငါးဖမ်းသင်္ဘောတွေ ဝင်ထွက်နေတဲ့ ရန်ကုန် ဖျာပုံ မြို့လမ်းကြောင်းပေါ်မှာရှိနေပြီးတော့ ဒီမူးယစ်ဆေးဝါးတွေဟာ ဘင်္ဂလားဒေ့ရှ် လမ်းကြောင်းလား၊ မလေးထိုင်းပီနန် လမ်းကြောင်းလား ဆိုတာကို မှန်းရခက်ကြောင်းလည်း ဖျာပုံ ဒေသခံတွေက ပြောပါတယ်။