ကိုရီးယားတွေမပါတဲ့ ပထမဆုံး ကေပေါ့ပ်အဖွဲ့ - Blackswan

အိန္ဒိယဆာရီပုံစံအဝတ်အစားအပြင် အနုစိတ်လက်ရာတွေပြည့်နေတဲ့လက်ဝတ်ရတနာတွေဝတ်ဆင်ထားတဲ့ မိန်းကလေးငယ်လေးယောက်က ဘုရားကျောင်းတစ်ခုမှာ အားအင်အပြည့်နဲ့ကခုန်သီဆိုနေကြပါတယ်။

အိန္ဒိယကဘုရားကျောင်းတွေနဲ့ ရိုးရာပွဲတွေမှာသုံးတဲ့ ရောင်စုံပေါင်ဒါမှုန့်တွေကိုလည်း သူတို့ရဲ့ မျက်နှာပေါ်တွေအပြင် သူတို့ကကွက်တွေနောက်က ကောင်းကင်ယံအထိပျံ့နှံ့နေတာကို သူတို့ရဲ့ ဂီတဗီဒီယိုထဲမှာမြင်ရပါတယ်။

ဒါပေမဲ့ အဲဒီမြင်ကွင်းတွေက ဘောလီးဝုဒ်ရုပ်ရှင်ထဲက ဇာတ်ဝင်ခန်းတွေမဟုတ်ပါဘူး။ Blackswan လို့ခေါ်တဲ့ ကေပေါ့ပ်မိန်းကလေးအဖွဲ့ ရဲ့ နောက်ဆုံးထွက်ထားတဲ့ ဂီတဗီဒီယိုထဲက ကကွက်ဆိုကွက်တွေပါ။

Blackswan ဟာ တောင်ကိုရီးယားမှာ ပွဲဦးထွက်ပြုလုပ်လာတဲ့ ကိုရီးယားနွယ်ဖွားမပါတဲ့ တစ်ခုတည်းသော ကေပေါ့ပ် မိန်းကလေးအဖွဲ့ဖြစ်ပါတယ်။ ဒီလို ကိုရီးယားမပါတဲ့အလားတူအဖွဲ့မျိုး ၂၀၁၇ ခုနှစ်တုန်းက Exp Edition ဆိုတဲ့ အမေရိကန် ကေပေါ့ပ်ယောက်ျားလေးအဖွဲ့လည်း တောင်ကိုရီးယားမှာ ပွဲဦးထွက်ဖျော်ဖြေခဲ့ဖူးပါတယ်။ ဒါပေမဲ့ အခုတော့သူတို့အဖွဲ့ လှုပ်ရှားမှုမရှိတော့ပါဘူး။

ဒီလို ကေပေါ့ပ်အဖွဲ့မှာ ကိုရီးယားလူမျိုးမပါတာက အရင်က ရှိခဲ့ဖူးပေမဲ့ ပုံမှန်တော့ အာရှနိုင်ငံသားတွေပဲ ပါလေ့ရှိပါတယ်။ ကေပေါ့ပ်အဖွဲ့ထဲ ထင်ရှားကျော်ကြားတဲ့ အမျိုးသမီးအဖွဲ့တစ်ခုဖြစ်တဲ့ Blackpink အဖွဲ့မှာဆိုရင် ထိုင်းနွယ်ဖွားတစ်ဦးပါဝင်ပါတယ်။

Blackswan အဖွဲ့ဝင်ထဲမှာတော့ အိန္ဒိယကလာတဲ့ ဆရီယာ (Sriya) ကလွဲလို့ အခြားအဖွဲ့ဝင်တွေကတော့ အာရှကမဟုတ်ပါဘူး။ ဖာတူ (Fatou) ကဆီနီဂေါ နဲ့ ဘယ်လ်ဂျီယံမှာကြီးပြင်းခဲ့ပြီး၊ ဂါဘီ (Gabi) ကတော့ ဂျာမန်-ဘရာဇီးကပြားပါ။ အန်ီဗ (Nvee) ကတော့ အမေရိကန်က ဖြစ်ပါတယ်။

ကမ္ဘာ့အနှံ့ကို ကေပေါ့ပ်ဂီတ ပျံ့နှံ့လာမှုနဲ့အတူ ဒီ Blackswan အဖွဲ့အကြောင်းကလည်း ကေပေါ့ပ် ရဲ့ အဓိပ္ပါယ်ဖွင့်ဆိုချက်အကြောင်း ပြောတဲ့အခါ ပါဝင်လာပါတယ်။ သူတို့အဖွဲ့ကို ကေပေါ့ပ်လို့ ခေါ်သင့်မသင့် ပြောဆိုနေကြတာပါ။

“သူတို့က ကိုရီးယားဖျော်ဖြေရေးကုမ္ပဏီနဲ့လည်း ဆက်စပ်နေတယ်။ တောင်ကိုရီးယားမှာ ပွဲဦးထွက်ပြီး ကိုရီးယားဘာသာနဲ့ သီချင်းဆိုတယ်။ အဲဒီတော့ သူတို့ကို ကေပေါ့ပ်အဖြစ်သတ်မှတ်ပေးသင့်တယ် ” လို့ မှတ်ချက်ပေးတဲ့သူလည်းရှိပါတယ်။

ဒါပေမယ့် တခြားကိုရီးယားလူမျိုးတွေကတော့ သူတို့အဖွဲ့ကို တမျိုးမြင်ကြပါတယ်။

“ကိုရီးယားတွေ ပါတဲ့အဖွဲ့မဟုတ်တဲ့အတွက် သူတို့က ပေါ့ပ်အဖွဲ့တစ်ဖွဲ့ပဲဖြစ်တယ်။ ”

Blackswan အဖွဲ့ကတော့ ဒီလိုမှတ်ချက်တွေကို စိတ်မပျက်ကြပါဘူး။ သူတို့ကိုယ်သူတို့ ကိုရီးယားဘာသာနဲ့ သီချင်းဆိုကြတဲ့ K-pop အဖွဲ့အဖြစ် သတ်မှတ်ကြပါတယ်။

ကိုရီးယားမှာ အမြင်မတူတဲ့ငြင်းခုံမှုတွေကနေ သဘောထားကွဲပြားမှုတွေဆက်ရှိနေမယ့် အကြောင်းကလည်းရှိနေပါတယ်။ တောင်ကိုရီးယားအစိုးရက ကေပေါ့ပ်ယဥ်ကျေးမှုသင်တန်းမှာ သင်ယူလိုတဲ့ နိုင်ငံခြားသားတွေ အတွက် နှစ်နှစ်သက်တမ်းဗီဇာ‌ပေးဖို့ စီစဉ်နေပါတယ်။

Blackawan ဟာ ၂၀၁၁ ခုနှစ်က ပရိသတ်တွေရှေ့ရောက်ခဲ့တဲ့ “Regeneration Idol of Asia” လို့ခေါ်တဲ့ Rania အဖွဲ့ ကနေ ပြန်လည်အစားထိုးပေါက်ဖွားလာတဲ့အဖွဲ့ဖြစ်ပါတယ်။အဲဒီကစလို့ Rania အဖွဲ့မှာလည်း အဖွဲ့ဝင်တွေဟာ အများကြီး ပြောင်းလဲခဲ့ပါတယ်။ မူလအဖွဲ့မှာတော့ ကိုရီးယား ခြောက်ယောက် နဲ့ ထိုင်းလူမျိုး တစ်ယောက်ပါပါတယ်။

ဒါပေမဲ့ ကျန်တဲ့အဖွဲ့ဝင်တွေနုတ်ထွက်သွားပြီးတဲ့အချိန် ၂၀၂၀ ခုနှစ်မှာတော့ ဓာတ်ပြားကုမ္ပဏီ DR Musicက Rania ကို Blackswan အဖြစ်အမည်ပြောင်းဖို့ ဆုံးဖြတ်ခဲ့ပြီး Blackswan ရဲ့ လက်ရှိအဖွဲ့ဝင် Fatou ကပဲ မူလကတည်းကပါလာတဲ့တစ်ဦးတည်းသောအဖွဲ့ဝင်ဖြစ်ပါတယ်။

“တချို့လူတွေကပြောတယ်။ ထူးဆန်းတယ်ပေါ့။ တချို့ဆို ကိုရီးယားအဖွဲ့ဝင်မပါလို့ မကြိုက်ဘူးတောင်ပြောကြတယ် ” လို့ DR Music ရဲ့ စီမံခန့်ခွဲမှုဆိုင်ရာအရာရှိ ဖိလစ် ဝိုင်ဂျေယွန်းက ဘီဘီစီကိုပြောပါတယ်။

“ဒါပေမဲ့ ဘာပဲဖြစ်ဖြစ် ဒီကေ‌ပေါ့ပ်စျေးကွက်ကိုချဲ့ထွင်နိုင်မယ့် အခွင့်အလမ်းကိုငါတို့မြင်ခဲ့ရပြီ။”

ဒါပေမဲ့ ဒီချဲ့ထွင်ဖောက်ထွက်မှုမှာ စိန်ခေါ်ချက်တွေ မရှိတာမျိုးမဟုတ်ပါဘူး။ ကိုရီးယားမဟုတ်တဲ့ကေပေါ့ပ်အဖြစ်ကိုရီးယားလိုဖျော်ဖြေဖို့ တင်ဆက်ဖို့လုပ်ကြတဲ့အခါ ဘာသာစကားက အဓိကအခက်အခဲအတားအဆီးဖြစ်ပါတယ်။

ကိုရီးယားမှာ မတူညီတဲ့ စကားပြောဆိုပုံတွေရှိပါတယ်။ နားထောင်သူတွေရဲ့ အသက်အလိုက် ၊ သူတို့ရဲ့ လူမှုစံနှုန်း၊ ‌‌ပေါင်းသင်းဆက်ဆံရေးနဲ့ ရင်းနှီးမှုအတိုင်းအတာ နဲ့ အခြေအနေအခါအလိုက် ရှိပါတယ်။ ဒါတွေက ကိုရီးယားဘာသာစကားမှာ အဓိက ကျပါတယ်။

“ ကိုရီယားမှာဆိုရင် လူနာမည်ကို တိုက်ရိုက်မသုံးရဘူး။ ဒါမှမဟုတ် “နင် (You)” လို့ အဓိပ္ပါယ်ရတဲ့ စကားကိုလည်း ထည့်မပြောဘူး။ ဒါပေမဲ့ ပေါ်တူဂီ နဲ့ အင်္ဂလိပ် လိုပြောတာတွေမှာ “ နင် ”လို့အဓိပ္ပါယ်ရတဲ့ You ကို ဝါကျတိုင်းမှာ သုံးတာပဲလေ။ အဲဒါ‌ကြောင့် ကိုရီးယားလိုသုံးဖို့ လိုက်မှတ်ဖို့က ကိုယ့်ဦးနှောက်အတွက် အရမ်းခက်ခဲတယ် ” လို့ Blackswam အဖွဲ့ဝင် Gabi ကပြောတယ်။

တချို့ အဖွဲ့ဝင်တွေအတွက်လည်း အဲဒါက အခက်အခဲတစ်ခုအဖြစ်ရှိနေဆဲပါပဲ။ ဒါတင်မကပါဘူး။ သူတို့အတွက် ကိုရီးယားကေပေါ့ပ် ကကွက်တွေက ခက်ခဲပါတယ်။ တစ်နေကုန်သင်တန်းတက်ပြီး လေ့ကျင့်ရပါတယ်။

“ မဟုတ်ဘူး၊ မှားတယ်။ ထပ်လုပ်ပါ ” လို့ သူတို့တွေ ( သင်ကြားပေးသူတွေ) က အဆက်မပြတ်ပြောတဲ့အခါ၊ စိတ်ပျက်စရာကောင်းခဲ့တယ် ” လို့ ဂီတပြဇာတ်နဲ့ သရုပ်ဆောင်ပညာကို လေ့လာခဲ့တဲ့ Nvee က ပြောပါတယ်။

ဂါဘီဟာ သူ့နိုင်ငံ ဘရာဇီးမှာ နောက်ခံအကအဖွဲ့မှာ ကခဲ့သူဖြစ်ပါတယ်။ ဒါကြောင့်ကတာဟာလွယ်လွယ်လေးဖြစ်မယ်လို့ သူတွေးမိခဲ့တယ်။

“အို ဘုရားရေ ၊ ငါ အကပညာရပ်နဲ့ ပတ်သက်ပြီးဘာမှကို မသိသေးတာ သေချာနေပါပြီ ” လို့ Gabi ကသူ့ကိုယ်သူမှတ်ချက်ပြုပါတယ်။

အခုတော့ ကိုရီးယားမှာသူတို့အဖွဲ့သားတွေအားလုံး သင်တန်းဆောင်တစ်ခုမှာ အတူနေထိုင်ကြရပါတယ်။ အပြင်ထွက်ပြီးချိန်းတွေ့တာကို တားမြစ်ထားသလို ကိုယ်အလေးချိန်လျှော့ဖို့နဲ့ ကြည့်ကောင်းအောင်နေဖို့လည်း လိုအပ်တယ်လို့ သူတို့ကို သင်ကြားထားပါတယ်။ ကိုရီးယားရဲ့ အနုပညာရှင်တွေကိုအားပေးတဲ့ လူမှုစံနှုန်းသတ်မှတ်ချက်အရ လူမှုရေးအရှုပ်တော်ပုံတွေနဲ့ မသင့်တော်တဲ့ ဓာတ်ပုံတွေထွက်တာကိုလည်း ခွင့်မပြုပါဘူး။

ကေပေါ့ပ်အဖွဲ့တွေအတွက် ကကွက်တွေကို ဖန်တီးသူအဖြစ် ရှစ်နှစ်ကြာလုပ်ငန်းခွင်အတွေ့အကြုံရှိတဲ့ အလွတ်တန်းသရုပ်ဆောင်ဒါရိုက်တာ အင်ဂျီဝန်းကတော့ နိုင်ငံခြားသင်တန်းသားတွေက ကလပ်တက်ချင်လို့ သူတို့နေတဲ့နေရာကနေ ထွက်ပြေးပြီးသွားကြတယ်။ သူတို့ မန်နေဂျာတွေက အဲဒီကနေပြန်ခေါ်လာပြီး “ လုံးဝ အလွတ်မပေးဘဲစောင့်ကြည့်ထားတယ် ”လို့ သူ့အတွေ့အကြုံကို ပြောပြပါတယ်။

မစ္စတာယွန်းကတော့ နိုင်ငံခြားသင်တန်းသားတွေနဲ့ တွဲအလုပ်လုပ်ရတာ စိန်ခေါ်မှုတွေရှိတယ်လို့ ဝန်ခံပါတယ်။

“ သူတို့ကစည်းမျဉ်းတွေကို မကြာခဏ မေးခွန်းထုတ်ပြီး သိချင်တာကို တဲ့တိုးမေးချတာပဲ။”

တင်းကျပ်တဲ့စည်းကမ်း၊ လေ့ကျင်မှုနဲ့ ပြိုင်ဆိုင်မှု ပြင်းထန်တာကြောင့်လည်း ကေပေါ့ပ်လုပ်ငန်းခွင်ထဲမှာရှိနေတဲ့သူတွေဟာ စိတ်ပိုင်းဆိုင်ရာ ထိခိုက်ခံစားရတာတွေ ရှိကြပါတယ်။

ပြီးခဲ့တဲ့ ဧပြီလတုန်းက ကေပေါ့ပ်စတားတစ်ယောက်ဖြစ်တဲ့ မွန်ဘင်း ရုတ်တရက်သေဆုံးခဲ့တဲ့အပေါ် သူ့ပရိသတ်တွေက အလွန်အံ့သြထိတ်လန့်ခဲ့ကြပါတယ်။ သူ့ကို ဆိုးလ်မြို့ ၊ ဂန်နမ်းကသူ့ရဲ့တိုက်ခန်းမှာ အိမ်နီးချင်းတွေက တွေ့ခဲ့ကြတာပါ။ ၂၀၁၉ ခုနှစ်မှာ ကေပေါ့ပ်စတား ဆူလီ နဲ့ သူ့ရဲ့ အရင်းနှီးဆုံးသူငယ်ချင်း ဂူဟာရာတို့လည်း တစ်လတည်းမှာပဲ ကိုယ့်ကိုယ်ကိုယ်အဆုံးစီရင်ပြီး သေဆုံးခဲ့ကြပါတယ်။

Fatou ဟာ စိတ်ရောဂါအထူးကုဆရာဝန်နဲ့ ပြသနေပြီး ဖေဖော်ဝါရီလကတည်းက စိတ်ပိုင်းဆိုင်ရာကိုအထောက်အပံ့ဖြစ်စေမယ့် ဆေးဝါးတွေကိုမှီဝဲနေတာပါ။ သူ့ရဲ့ ရောဂါလက္ခဏာတွေကို အေဂျင်စီကိုပြောပြပြီး ပထမဆုံးအကြိမ် ဆေးဘက်ဆိုင်ရာအကူအညီတောင်းခံခဲ့တာပါ။ ဒါပေမယ့် ကေပေါ့ပ် က သူ့အတွက်အပျော်ရွှင်ရဆုံး ဖြစ်စေတယ်လို့ ဆိုပါတယ်။

အခုတော့ ဖျော်ဖြေရေးကုမ္ပဏီ အများအပြားက သူတို့ရဲ့ သင်တန်းသားတွေနဲ့ ပရိသတ်အခိုင်အမာရှိသူတွေကို ကိုယ်ပိုင်အချိန်တွေ ပိုပေးနေပါတယ်။ ပိုပြီးသက်တောင့်သက်သာဖြစ်လာစေမယ့် စည်းမျည်းစည်းကမ်းတွေကိုလည်း ပြင်ဆင်ပေးလာပါတယ်။

“ စိတ်ဖိစီးမှုတွေကို ကိုင်တွယ်ဖြေရှင်းရတာက ကျွန်မအတွက်အခက်ခဲဆုံးအပိုင်းပါပဲ” လို့ငယ်ရွယ်စဥ်အချိန်ကတည်းက စိတ်ကျရောဂါလက္ခဏာတွေခံစားခဲ့ရဖူးတဲ့ Fatou က ပြောပါတယ်။

Fatou က သူ့ကိုယ်သူအကြိမ်များစွာ ပြန်မေးတယ်လို့ဆိုတယ်။

“ငါ မကတတ်ဘူး၊ ရက်ပ်သီချင်းတွေ မရွတ်နိုင်ဘူး။ သီချင်းမဆိုတတ်ဘူး ဆိုရင် ငါဘာလုပ်နေတာလဲ ” လို့ သူ့ကိုယ်သူပြန်မေးတဲ့အကြောင်း Fatou ကပြောပါတယ်။

Blackswan အဖွဲ့ဝင်တွေအနေနဲ့ အနာဂတ်မှာ ကေပေါ့ပ်ကို ကိုယ်စားပြုသူတွေဖြစ်ဖို့ သူတို့ကိုယ်သူတို့ ယုံကြည်မှုတွေရှိနေပါတယ်။

“ ကေပေါ့ပ်က ကမ္ဘာအနှံ့ကို ပိုပြီး ပျံ့နှံ့လာပါလိမ့်မယ်။ ဒါကြောင့် ကမ္ဘာတစ်ဝန်းက အဖွဲ့တွေကို လေ့ကျင့်သင်ကြားပြီး ကမ္ဘာ့ဈေးကွက်မှာ ပွဲဦးထွက်လုပ်နိုင်ဖို့ ပိုဖြစ်လာမှာပါ ” လို့ Gabi ပြောပါတယ်။

Sriya ကလည်း “ လူတိုင်း ကေပေါ့ပ် လုပ်နိုင်တယ်။ အသားအရောင်က အဆုံးအဖြတ်မပေးနိုင်ပါဘူး ” လို့ ဖြည့်ပြောပါတယ်။