ပုပ်ရဟန်းမင်းသစ် ဘယ်သူဖြစ်မလဲ။ ကြိုတင်ခန့်မှန်းဖို့ခက်တဲ့ ပြိုင်ပွဲအတွင်းက အဓိက ပုပ်ရဟန်းမင်းလောင်းများ

ပုပ်ရဟန်းမင်းသစ်က ဘယ်သူဖြစ်မလဲ။ အဲဒီဆုံးဖြတ်ချက်ဟာ ကက်သလစ်အသင်းတော်နဲ့ ရိုမန်ကက်သလစ်ဘာသာဝင် ၁.၄ ဘီလီယံ (သန်းပေါင်း ၁၄၀၀) အပေါ် အလွန်လေးနက်တဲ့ အကျိုးသက်ရောက်မှု ရှိနိုင်ပါတယ်။

အတော်ကြီး ကြိုတင်ခန့်မှန်းလို့မရနိုင်အောင်နဲ့ ပွင့်လင်းတဲ့ လုပ်ငန်းစဥ် ဖြစ်အောင် သေသေချာချာ လုပ်ရတဲ့ အကြောင်းရင်းတွေလည်း ရှိနေပါတယ်။

ပုပ်ရွေးချယ်ရေး ကာဒီနယ်ရဟန်းအမတ်များအဖွဲ့က ဆစ်စတင်း ချက်ပယ်လ် ဘုရားကျောင်းထဲမှာ ကျင်းပတဲ့ ကွန်းကလေ့ဗ်လို့ခေါ်တဲ့ ပုပ်ရဟန်းမင်းရွေးချယ်ပွဲမှာ စုဝေးကာ ဆွေးနွေးကြပြီးနောက် ရဟန်းအမတ်တစ်ဦးချင်းစီက ကိုယ်နှစ်သက်သူကို မဲပေးကြရပါတယ်။ အနိုင်ရတဲ့ ပုပ်ရဟန်းမင်းလောင်း တစ်ပါးရဲ့ နာမည်ရတဲ့အထိ မဲပေးရပါတယ်။

လက်ရှိ ရှိနေတဲ့ ရဟန်းအမတ်တွေထဲက ၈၀ ရာခိုင်နှုန်းက ပုပ်ရဟန်းမင်းကြီး ဖရန်စစ် ကိုယ်တိုင် ခန့်အပ်ထားခဲ့သူတွေပါ။ သူတို့အတွက် ပထမဆုံး ပုပ်ရဟန်းမင်းတစ်ပါး ရွေးချယ်ရရုံမက သူတို့ဟာ ကမ္ဘာ့နေရာအသီးသီး၊ ကမ္ဘာ့ရှုထောင့်အဖုံဖုံကိုလည်း ကိုယ်စားပြုနေကြပါတယ်။

ဥရောပနိုင်ငံသားတွေက မဲပေးခံနိုင်တဲ့ ရဟန်းအမတ်စုစုပေါင်းရဲ့ ထက်ဝက်အောက်ကို လျော့ကျနေတာဟာ သမိုင်းမှာ ပထမဆုံးအကြိမ်ဖြစ်ပါတယ်။

ရွေးချယ်ရေးအဖွဲ့မှာ ပုပ်ရဟန်းမင်းကြီးခန့်အပ်ထားခဲ့သူတွေ အများစုဖြစ်နိုင်ပေမဲ့ သူတို့ဟာ လုံးဝ "တိုးတက်ရေးသမားတွေ" ဒါမှမဟုတ် "ရှေးရိုးအစဥ်အလာသမားတွေ" တော့ မဟုတ်ကြပါဘူး။

အဲဒီလိုအကြောင်းပြချက်တွေကြောင့် နောက်လာမယ့် ပုပ်ရဟန်းမင်းကြီးအဖြစ် ဘယ်သူ ရွေးချယ်ခံရနိုင်တယ် ဆိုတာကို ခန့်မှန်းဖို့အတွက် ပိုခက်ခဲစေပါတယ်။

အာဖရိက ဒါမှမဟုတ် အာရှတိုက်ထဲကနေ ပုပ်ရဟန်းမင်းကြီး ရွေးချယ်ခံရနိုင်မလား။ ဒါမှမဟုတ် ဗာတီကန် အုပ်ချုပ်ရေးအဖွဲ့ထဲက လက်ဟောင်းရဟန်းအမတ်တစ်ဦးကိုပဲ ထောက်ခံကြနိုင်လား။

အောက်ဖော်ပြပါနာမည်တွေကတော့ ပုပ်ဖရန်စစ်ရဲ့နေရာကို ဆက်ခံဖို့ အလားအလာရှိသူအချို့ ဖြစ်ပါတယ်။ လာမယ့်ရက်တွေအတွင်း ဒီထက်ပိုများတဲ့ နာမည်တွေလည်း ပေါ်ထွက်လာဖို့ မျှော်လင့်ရပါတယ်။

ပီယက်ထရို ပါရိုလင်

နိုင်ငံ - အီတလီ

အသက် - ၇၀

စကားကို အေးအေးညင်သာပြောတတ်တဲ့ အီတလီနိုင်ငံသား ရဟန်းအမတ် ပါရိုလင်ဟာ ပုပ်ရဟန်းမင်းကြီးဖရန်စစ်ခန့်အပ်ထားတဲ့ ဗာတီကန်ရဲ့ အတွင်းဝန်ဖြစ်သလို ပုပ်ရဟန်းမင်းကြီးရဲ့ အကြံပေးခေါင်းဆောင်အဖြစ်လည်း တာဝန်ပေးထားတာပါ။ အတွင်းဝန်ဟာ ရိုမန်ကက်သလစ် ဗဟိုအသင်းတော်အုပ်ချုပ်ရေးအဖွဲ့ဖြစ်တဲ့ ရိုမန်ခရူရီးယားရဲ့ ခေါင်းဆောင်လည်းဖြစ်ပါတယ်။

ပုပ်ရဟန်းမင်းကြီးပြီးရင် သူက ဒုတိယအကြီးဆုံးရာထူးရှိသူ ဖြစ်တဲ့အတွက် ပုပ်ရဟန်းမင်းဖြစ်ဖို့ သူ့ကို ရှေ့ပြေးတစ်ယောက်အဖြစ် ယူဆနိုင်ပါတယ်။

ကက်သလစ်အယူဝါဒရဲ့ သန့်ရှင်းစင်ကြယ်မှုကို ဦးစားပေးတာထက် သံတမန်ရေးရာနဲ့ ကမ္ဘာလုံးဆိုင်ရာသဘောထားအမြင်ဘက်ကို သူက အလေးပေးတယ်လို့ တချို့က သူ့အပေါ် မြင်ကြပါတယ်။ သူ့ကိုဝေဖန်သူတွေကတော့ အဲဒါကို ပြဿနာလို့မြင်ကြပြီး ထောက်ခံသူတွေကတော့ အားသာချက်လို့ ယူဆကြပါတယ်။

ဒါပေမဲ့လည်း ကမ္ဘာတစ်ဝန်း လိင်တူခြင်းလက်ထပ်ခွင့် ဥပဒေပြုတာကို ဝေဖန်ကန့်ကွက်ခဲ့ပြီး ၂၀၁၅ ခုနှစ် အိုင်ယာလန်နိုင်ငံမှာ ဆန္ဒခံယူပွဲလုပ်ပြီး လိင်တူလက်ထပ်ခွင့်ပြုတာနဲ့ပတ်သက်လို့ "လူသားမျိုးနွယ်အတွက် ရှုံးနိမ့်မှု" လို့ ပြောဆိုခဲ့ပါတယ်။

ကြိုတင်ခန့်မှန်းလောင်းကြေးထပ်သူတွေက သူ အရွေးခံရမယ်လို့ ထင်ကြေးပေးနိုင်ကြပေမဲ့ ပုပ်ရဟန်းမင်းရွေးပွဲလုပ်ငန်းစဥ်အတွင်းက မသေချာမှုကို အလေးပေးဖော်ပြတဲ့ အီတလီစကားပုံတစ်ခုကို ရဟန်းအမတ် ပါရိုလင်ကတော့ ကောင်းကောင်း သတိပြုမိပါလိမ့်မယ်။ အဲဒါကတော့ "ရွေးချယ်ပွဲဆီကို ပုပ်ရဟန်းမင်းအနေနဲ့ ဝင်သွားပေမဲ့ ပြန်ထွက်လာတော့ ရဟန်းအမတ်ပါပဲ။"

ဖြစ်ပြီးခဲ့တဲ့ ပုပ်ရဟန်းမင်း ၂၆၆ ပါးမှာ ၂၁၃ ပါးဟာ အီတလီကဖြစ်ခဲ့ပေမဲ့ ပြီးခဲ့တဲ့ နှစ် ၄၀ အတွင်းမှာတော့ အီတလီကနေ ပုပ်ရဟန်းမင်း ထွက်ပေါ်တာမရှိသေးပါဘူး။ အသင်းတော်ရဲ့ထိပ်ပိုင်းနေရာတွေမှာ အီတလီနဲ့ ဥရောပက လူတွေ နည်းလာတဲ့အတွက် လောလောဆယ်မှာ အီတလီကနေ ထပ်ဖြစ်လာနိုင်ခြေ ရှိချင်မှ ရှိမှာပါ။

လူဝီစ် အန်တိုနီယို ဂိုကင်းမ် တာဂလေ

နိုင်ငံ - ဖိလစ်ပိုင်

အသက် - ၆၇

အာရှက ပထမဆုံးပုပ်ရဟန်းမင်းကြီးအဖြစ် ရဟန်းအမတ် တာဂလေ ဖြစ်လာနိုင်သလား။ ပါရိုလင်နဲ့ မတူတာကတော့ သူက ဆယ်စုနှစ်ပေါင်းများစွာ သင်းအုပ်ဆရာနဲ့သက်ဆိုင်တဲ့ အတွေ့အကြုံတွေရှိထားသူပါ။ ဆိုလိုတာက ဗာတီကန်အတွက် သံတမန်တစ်ဦးလို မဟုတ်ဘဲ ဒါမှမဟုတ် အသင်းတော်ဥပ‌ဒေကို သီးသန့်လေ့လာထားတဲ့ ကျွမ်းကျင်သူလို မဟုတ်ဘဲ သူဟာ လူတွေကြားထဲက တက်ကြွတဲ့အသင်းတော်ခေါင်းဆောင်တစ်ဦး ဖြစ်ပါတယ်။

ကက်သလစ်အသင်းတော်ဟာ ဖိလစ်ပိုင်မှာ သြဇာ သိပ်ကြီးပါတယ်။ နိုင်ငံလူဦးရေရဲ့ ၈၀ ရာခိုင်နှုန်းက ကက်သလစ်ဘာသာဝင်တွေဖြစ်ပါတယ်။ ပုပ်ရွေးချယ်ရေး ရဟန်းအမတ်အဖွဲ့ဝင် ၅ ဦးအထိ စံချိန်တင် အများဆုံးရှိတဲ့နိုင်ငံ ဖြစ်ပါတယ်။ သူတို့သာ ကာဒီနယ် တာဂလေ နောက်မှာရပ်တည်မယ်ဆိုရင် စည်းရုံးမဲဆွယ်မှု ကောင်းကောင်းလုပ်နိုင်တဲ့ အခြေအနေမျိုးပါ။

ကက်သလစ်ရဲ့ အနှစ်သာရအတွင်း သဘောထားအလယ်အလတ်ရှိသူအဖြစ် သူ့ကို မြင်ကြပါတယ်။ သူဟာ လူမှုရေးရာ ကိစ္စရပ်တွေမှာ စူးစိုက်နှစ်မြှုပ်ထားပြီး ပျံလွန်သူ ပုပ်ရဟန်းမင်းကြီးလိုပဲ ရွှေ့ပြောင်းသူတွေအပေါ် ဂရုဏာထားတဲ့အတွက် သူ့ကို "အာရှရဲ့ ဖရန်စစ်" လို့ ခေါ်ဝေါ်ကြပါတယ်။

ကိုယ်ဝန်ဖျက်ချမှုကို သူက ဆန့်ကျင်ပြီး ဒါက "လူသတ်တဲ့ပုံစံတစ်မျိုး"လို့ ပြောဆိုထားပါတယ်။ ဒါက သန္ဓေကနေ ဘဝစတယ်ဆိုတဲ့ အသင်းတော်ရဲ့ ကျယ်ပြန့်တဲ့ ရပ်တည်ချက်နဲ့ ကိုက်ညီပါတယ်။ ညင်သာစွာ အဆုံးစီရင်ပေးခြင်းကိုလည်း ကန့်ကွက်ထားသူဖြစ်ပါတယ်။

မနီလာရဲ့ ကက်သလစ်ဂိုဏ်းချုပ်ဖြစ်လာခဲ့တဲ့ ၂၀၁၅ ခုနှစ်တုန်းကတော့ ရဟန်းအမတ် တာဂလေဟာ လိင်တူချစ်သူတွေ၊ ကွာရှင်းထားသူတွေနဲ့ တစ်ခုလပ် ကလေးမိခင်တွေအပေါ် အသင်းတော်ရဲ့ "ပြင်းထန်တဲ့" ရပ်တည်ချက်ကို ပြန်လည်အကဲဖြတ်ဖို့ တိုက်တွန်းခဲ့ပြီး အတိတ်ကကြမ်းတမ်းမှုတွေက ကာလရှည်ကြာ ဒုက္ခဖြစ်စေခဲ့ပြီး လူတွေအနေနဲ့ "တံဆိပ်ကပ်ခံရ" သလို ခံစားခဲ့ရတယ်၊ နောက်ပြီး လူတစ်ဦးတစ်ယောက်တိုင်းက ဂရုဏာနဲ့ လေးစားမှု ခံယူထိုက်တယ်လို့ သူက ပြောခဲ့ပါတယ်။

ပုပ်ရဟန်းမင်းကြီး ဖရန်စစ်ရွေးချယ်ခံခဲ့ရတဲ့ ၂၀၁၃ ခုနှစ် ရွေးချယ်ပွဲကတည်းက ရဟန်းအမတ် တာဂလေဟာ ပုပ်ရဟန်းမင်းလောင်းတစ်ပါးအဖြစ် ယူဆခံရပါတယ်။

အဲဒီဆယ်စုနှစ်တစ်ခုကျော်တုန်းက သူဟာ ပုပ်ရဟန်းမင်းဖြစ်လာနိုင်တဲ့ဆိုတဲ့ ပြောဆိုချက်တွေအပေါ် သူဘယ်လိုမြင်ခဲ့လဲလို့ မေးရာမှာတော့ သူက "ဒါကို ဟာသတစ်ခုလို သဘောထားပါတယ်။ ရယ်စရာပါ"လို့ ပြောပါတယ်။

ဖရီဒိုလင် အမ်ဘွန်ဂို ဘက်ဆွန်ဂူ

နိုင်ငံ - ကွန်ဂို

အသက် - ၆၅ နှစ်

အာဖရိကဘက်ကနေ ပုပ်ရဟန်းမင်းသစ် ဖြစ်လာနိုင်ခြေက အတော်များပါတယ်။ အဲဒီဒေသက ကက်သလစ်ဘာသာဝင်အသစ်တွေ သန်းပေါင်းများစွာ ဆက်လက်ပေါ်ထွက်နေတဲ့ နေရာလည်း ဖြစ်ပါတယ်။ ရဟန်းအမတ် အမ်ဘွန်ဂိုက ကွန်ဂိုဒီမိုကရက်တစ်သမ္မတနိုင်ငံကဖြစ်ပြီး အခုရွေးချယ်ပွဲမှာ ရှေ့ပြေးနေသူတစ်ဦးလည်း ဖြစ်ပါတယ်။

သူဟာ လွန်ခဲ့တဲ့ ၇ နှစ်ကစလို့ ကင်ရှာဆာမြို့တော်ရဲ့ ကက်သလစ်ဂိုဏ်းချုပ်ဖြစ်ခဲ့ပြီး အဲဒီနောက် သူ့ကို ရဟန်းအမတ်အဖြစ် ပုပ်ရဟန်းမင်းကြီးဖရန်စစ်က ခန့်အပ်ခဲ့ပါတယ်။

သူဟာ ယဥ်ကျေးမှုအစဥ်အလာအရ ရှေးရိုးစွဲဖြစ်သလို လိင်တူခြင်းလက်ထပ်တာကို ဆန့်ကျင်ပါတယ်။ ဒါက "ယဥ်ကျေးမှုစံနှုန်းတွေနဲ့ ဆန့်ကျင့်တဲ့၊ ပင်ကိုယ်သဘာဝအားဖြင့် မကောင်းမှုအဖြစ် ယူဆခံရတဲ့ လိင်တူတွေရဲ့ ပေါင်းစည်းမှု" လို့ ပြောခဲ့ပါတယ်။

ခရစ်ယာန်ဘာသာဟာ ကွန်ဂိုဒီမိုကရက်တစ်သမ္မတနိုင်ငံမှာ လူအများစုကိုးကွယ်တဲ့ ဘာသာဖြစ်ပေမဲ့ ဂျီဟတ်ဝါဒီတွေဖြစ်တဲ့ အစ္စလာမ်နိုင်ငံအဖွဲ့ IS နဲ့ သူနဲ့အပေါင်းပါသူပုန်တွေရဲ့ သတ်ဖြတ်ဖိနှိပ်မှုတွေကို ခရစ်ယာန်တွေ ရင်ဆိုင်နေရပါတယ်။ အဲဒီနောက်ခံအကြောင်းတရားတွေနဲ့အတူ ရဟန်းအမတ် အမ်ဘွန်ဂိုဟာ အသင်းတော်အတွက် ကြီးမားပြင်းထန်တဲ့ စည်းရုံးလှုံ့ဆော်အကျိုးဆောင်ပေးသူအဖြစ် ရှုမြင်ခံရပါတယ်။

၂၀၂၀ ခုနှစ်က တွေ့ဆုံမေးမြန်းမှုတစ်ခုမှာတော့ ဘာသာအများအပြားရှိခြင်းကို လက်ခံတဲ့အကြောင်း သူက ပြောကြားခဲ့ပါတယ်။ "ပရိုတက်စတင့်ဟာ ပရိုတက်စတင့်ဖြစ်ကြပါစေ။ မူဆလင်ကလည်း မူဆလင်ဖြစ်ပါစေ။ သူတို့နဲ့အတူ ကျွန်တော်တို့ အလုပ်လုပ်မှာပါ။ ဒါပေမဲ့ လူတိုင်းအနေနဲ့ သူတို့ရဲ့ ကိုယ်ပိုင် သွင်ပြင်လက္ခဏာတွေကို ထိန်းထားရပါမယ်။"

အဲဒီလို မှတ်ချက်မျိုးတွေကြောင့် အခြားရဟန်းအမတ်တွေကတော့ သူတို့ရဲ့ သာသနာပြုလုပ်ငန်းကို ရဟန်းအမတ် အမ်ဘွန်ဂို အပြည့်အဝ နားလည်လိုက်နာရဲ့လားဆိုပြီး အံ့အားသင့်စေနိုင်ပါတယ်။ အသင်းတော်ရဲ့စကားတွေကို ကမ္ဘာအနှံ့ ပျံနှံ့စေဖို့အတွက် ကက်သလစ်ဘာသာဝင်တွေက မျှော်လင့်ထားကြတာပါ။

ပီတာ ကိုဒ်ဝို အက်ပီယာ တာ့ခ်ဆင်

နိုင်ငံ - ဂါနာ

အသက် - ၇၆ နှစ်

တကယ်လို့ ရဟန်းအမတ်တွေက သူ့ကို ရွေးချယ်ကြမယ်ဆိုရင် သြဇာတိက္ကမရှိတဲ့ ရဟန်းအမတ် တာ့ခ်ဆင်ကလည်း နှစ်ပေါင်း ၁၅၀၀ အတွင်း အာဖရိကရဲ့ ပထမဦးဆုံး ပုပ်ရဟန်းမင်းကြီးအဖြစ် ဂုဏ်ထူးဝိသေသ ရှိနိုင်သူ ဖြစ်ပါတယ်။

ရဟန်းအမတ် အမ်ဘွန်ဂိုလိုပဲ သူ့အနေနဲ့ ဒီနေရာကိုမလိုချင်ဘူးလို့ ပြောဖူးပါတယ်။ "ဘယ်သူမှ ပုပ်ရဟန်းမင်းကြီးဖြစ်ဖို့ ရည်မှန်းချက်ရှိမယ်ဆိုတာ ကျွန်တော် မသေချာဘူး" လို့ ဘီဘီစီကို ၂၀၁၃ ခုနှစ်တုန်းက ပြောခဲ့ပါတယ်။

အာဖရိကမှာ အသင်းတော်ရဲ့ ကြီးထွားလာမှုအပေါ် အခြေခံပြီး နောက်တက်မယ့်ပုပ်ရဟန်းမင်းကြီးက အာဖရိကကနေ ဖြစ်သင့်တယ်ဆိုတဲ့အချက်က ကောင်းမွန်တဲ့အကြောင်းရင်းဖြစ်နိုင်လားလို့ မေးကြည့်တဲ့အခါ သူက ပုပ်ရဟန်းမင်းကြီး ကို ကိန်းဂဏန်းစာရင်းအင်းတွေအပေါ် အခြေခံပြီးရွေးချယ်တာမျိုး မဖြစ်သင့်ဘူးလို့ သူခံစားမိကြောင်း ပြောပါတယ်။ ဘာဖြစ်လို့လဲဆိုရင် "အဲဒီလိုစဥ်းစားပုံမျိုးက ရေကို နောက်ကျိသွားစေနိုင်တယ်" လို့ ပြောပါတယ်။

ရဟန်းအမတ် တာ့ခ်ဆင်ဟာ ၂၀၀၃ ခုနှစ်၊ ပုပ်ရဟန်းမင်းကြီး ဂျွန်ပေါလ် ၂ လက်ထက်မှာ ပထမဆုံး ဂါနာနိုင်ငံသား ရဟန်းအမတ် ဖြစ်ခဲ့သူပါ။

ရဟန်းအမတ် တာဂလေလိုပဲ ရဟန်းအမတ် တာခ်ဆင်ဟာလည်း ပုပ်ဖရန်စစ် ပုပ်အဖြစ် ရွေးချယ်ခံခဲ့ရတဲ့ ဆယ်စုကျော်တုန်းက ပုပ်ရဟန်းမင်းဖြစ်နိုင်ခြေရှိသူအဖြစ် ယူဆခံခဲ့ရပါတယ်။ တကယ်ဆိုရင် ကြိုတင်ခန့်မှန်းလောင်းကြေးထပ်သူတွေက သူ့ကို အနိုင်မဲရဖို့ ဖြစ်နိုင်ခြေအရှိဆုံးနေရာမှာ ထားခဲ့ကြပါတယ်။

ဖန့်ခ်ဂီတ တီးဝိုင်းမှာ ဂီတာတီးခတ်ခဲ့သူ ရဟန်းအမတ် တာ့ခ်ဆင်ကို တက်တက်ကြွကြွနေတတ်သူအဖြစ် လူသိများပါတယ်။

အာဖရိကက ရဟန်းအမတ်အများအပြားလို သူလည်း ရှေးရိုးစွဲအမြင်ရှိသူပါ။ ဒါပေမဲ့လည်း သူ့နိုင်ငံ ဂါနာအပါအဝင် အာဖရိကနိုင်ငံတွေမှာ လိင်တူဆက်ဆံရေး ရှိသူတွေအပေါ် ရာဇဝတ်ပြစ်ဒဏ်ပေးတာကို သူက ဆန့်ကျင် ပါတယ်။

လိင်တူစုံမက်ကြသူ LGBTQ+ တွေအပေါ် ပြင်းထန်တဲ့ပြစ်ဒဏ်ချမှတ်ဖို့ ဥပဒေကြမ်းတစ်ရပ်ကို ဂါနာလွှတ်တော်မှာ ဆွေးနွေးနေချိန် ၂၀၂၃ ခုနှစ် ဘီဘီစီနဲ့ တွေ့ဆုံမေးမြန်းခန်းမှာ တာ့ခ်ဆင်က လိင်တူချင်းစုံမက်မှုကို ရာဇဝတ်မှုတစ်ခုအဖြစ် မသတ်မှတ်သင့်ဘူးလို့ ပြောခဲ့ပါတယ်။

၂၀၁၂ ခုနှစ်တုန်းကလည်း ဗာတီကန် ဂိုဏ်းအုပ်တွေရဲ့ ညီလာခံအတွင်း သူဟာ ဥရောပမှာ အစ္စလာမ်ဘာသာပြန့်ပွားမှုအပေါ် ကြောက်ရွံ့ထိတ်လန့်ဖွယ်ဖြစ်အောင် ကြိုတင်ဟောကိန်းထုတ်တာတွေလုပ်ခဲ့တယ်လို့ စွပ်စွဲခံခဲ့ရပါတယ်။ အဲဒီအတွက်ကိုလည်း နောက်ပိုင်းမှာ သူက ပြန်တောင်းပန်ခဲ့ပါတယ်။