မြောက်ကိုရီးယားရဲ့ မျက်တောင်တုများ - ဖေဖေါ်ဝါရီ ၃ ရက် ထိပ်တန်း နိုင်ငံတကာ သတင်းများ

မြောက်ကိုရီးယား နိုင်ငံက လာတဲ့ ဆံတု၊ မျက်တောင်မွှေး အတုတွေကို တရုတ်ကုမ္ပဏီတွေက တဆင့် နိုင်ငံတကာကို ပြန်လည် တင်ပို့ နေတယ်လို့ တရုတ်ကုမ္ပဏီတွေ ဘက်က ဝန်ခံ ပြောကြားပါတယ်။

တရုတ်ကနေ ထွက်သမျှ အဲဒီ အလှကုန် ပစ္စည်းတွေရဲ့ ရာခိုင်နှုန်း ၆၀ လောက် အထိဟာ မူလ မြောက်ကိုရီးယားက ဖြစ်တယ်လို့ ဆိုပါတယ်။

မြောက်ကိုရီးယားဟာ သူ့ရဲ့ နျူကလီယာ ရည်မှန်းချက်၊ လက်နက် အစီအစဉ်တွေ ကြောင့် နိုင်ငံတကာရဲ့ စီးပွားရေး ပိတ်ဆို့ အရေးယူမှု ပြစ်ဒဏ်တွေ ချမှတ် ခံထား ရတာမှာ၊ အထူးသဖြင့်တော့ နိုင်ငံခြားငွေရလေ့ရှိတဲ့ ကျောက်မီးသွေး တင်ပို့တဲ့ ကဏ္ဍလို နေရာတွေမှာ ပိတ်ဆို့ ခံနေရတာ ဖြစ်ပါတယ်။

ဒါ့ကြောင့် ပြုံယမ်း အနေနဲ့ ဝင်ငွေ ရရာရကြောင်း အခုလို အလှကုန် ပစ္စည်းတွေ တစ်ဘက်လှည့်နဲ့ ထုတ်နေတဲ့ အပေါ် အာရုံစိုက် လုပ်ဆောင်လာတာလို့ နားလည် ရပါတယ်။

ပြီးခဲ့တဲ့ နှစ်ကဆိုရင် ပြုံယမ်းကနေ တရုတ်ကို တင်ပို့လိုက်တဲ့ ဆံတု၊ မုတ်ဆိတ် နှုတ်ခမ်းမွှေးအတု၊ မျက်တောင်တုပေါင်းဟာ တန်ချိန် ထောင့်ခွန်နှစ်ရာ နီးပါး ရှိပါတယ်။ တန်ဖိုး အားဖြင့်ဆိုရင် အမေရိကန် ဒေါ်လာ သန်း ၁၆၀-၁၇၀ ဝန်းကျင်ဖိုး ထိအောင် ရှိနေပါတယ်။

အီရန်နဲ့ အဆက်အစပ် ပစ်မှတ်တွေကို အမေရိကန် လေကြောင်းတိုက်

အီရတ်နိုင်ငံထဲ အီရန်နဲ့ ပတ်သက်ဆက်နွယ်နေတဲ့ နေရာတွေကို ပစ်မှတ်ထားပြီး အမေရိကန်က လေကြောင်းတိုက်ခိုက်တာတွေ ဆက်တိုက် လုပ်ဆောင်ခဲ့ပါတယ်။ အဲဒီ တိုက်ခိုက်မှုတွေကြောင့် အရပ်သားတွေ အပါအဝင် လူ ၁၆ ယောက်ထက် မနည်း သေဆုံးသွားတယ်လို့ အီရတ် အာဏာပိုင်တွေက ပြောပါတယ်။

အမေရိကန်ဟာ အီရတ်အစိုးရရဲ့ ပူးပေါင်းဆောင်ရွက်မှုကို ရယူပြီး အဲဒီလို လေကြောင်းတိုက်ခိုက်ခဲ့တာ ဆိုတဲ့ ပြောဆိုချက်တွေ အပေါ် အီရတ် ဝန်ကြီးချုပ်က အပြင်းအထန် ကန့်ကွက်ပြီး ပယ်ချပါတယ်။ အဲဒီလို ပြောဆိုချက်တွေဟာ အလိမ်အညာတွေ သက်သက် ဖြစ်တယ်လို့ အီရတ် ဝန်ကြီးချုပ်ရဲ့ ထုတ်ပြန်ချက်ထဲ ထည့်သွင်းထားပါတယ်။

အခုလို အမေရိကန် ဦးဆောင်တဲ့ မဟာမိတ် နိုင်ငံတွေဟာ အီရတ်နိုင်ငံထဲ စစ်ရေး ပြုမူဆောင်ရွက်တာဟာ အီရတ်ရဲ့ လုံခြုံတည်ငြိမ်ရေးကို ထိခိုက်စေနိုင်တယ်လို့လည်း ဆိုထားပါတယ်။

ဂျော်ဒန်နိုင်ငံထဲ အီရန်ကျောထောက် နောက်ခံပြု လက်နက်ကိုင်တွေရဲ့ လက်ချက်နဲ့ အမေရိကန် စစ်သား ၃ ယောက် သေဆုံးခဲ့ရတဲ့နောက် အမေရိကန်ဟာ အီရတ်နဲ့ ဆီးရီးယား နိုင်ငံထဲက ပစ်မှတ်ပေါင်း ၈၅ ခုထက် မနည်းကို လက်တုန့်ပြန် တိုက်ခိုက်ခဲ့တယ်လို့ အမေရိကန် စစ်ဌာနချုပ် ပင်တာဂွန်က အတည်ပြု ထားပါတယ်။ အရှေ့အလယ်ပိုင်း ဒေသတလွှား အီရန်နဲ့ ဆက်စပ်နေတဲ့ ပစ်မှတ်တွေကို ဆက်လက် တိုက်သွားမယ် ဆိုပြီး အမေရိကန် သမ္မတဘိုင်ဒင်က သတိပေးပါတယ်။

အမေရိကန်ရဲ့စစ်ရေး မိတ်ဖက် ဥရောပ နိုင်ငံတွေက နိုင်ငံခြားရေး ဝန်ကြီးတွေဟာ ဘရပ်ဆဲလ်စ် မြို့မှာ တွေ့ဆုံ နေကြပါတယ်။ အဲဒီ အစည်းအဝေးမှာ ရှိနေတဲ့ ပိုလန် နိုင်ငံခြားရေး ဝန်ကြီး ရာဒက် ဆီကိုဆကီးက အခုလို ပြောပါတယ်။

“လက်ရှိ ဘရပ်ဆဲလ်စ် အစည်းအဝေးမှာ ဆွေးနွေးကြတဲ့ အထဲ အရေးအကြီးဆုံး ဖြစ်နေတာကလည်း အရှေ့အလယ်ပိုင်းက ပစ်မှတ်တွေကို အမေရိကန်က လေကြောင်း တိုက်ခိုက်တဲ့ ကိစ္စပဲ ဖြစ်ပါတယ်။

အီရန်ရဲ့ လက်ဝေခံ ပရောက်ဇီတွေက မီးနဲ့ ဆော့ကစားနေတာ နှစ် အတန်ကြာ ရှိနေပါပြီ။ အခု အဲဒီမီး လောင်ကျွမ်းခံရတာပါ” ဆိုပြီး ပြောသွားပါတယ်။

ဒီ အချိန်မှာပဲ အမေရိကန် နိုင်ငံခြားရေး ဝန်ကြီး အန်တိုနီ ဘလင်ကင်ဟာ မနက်ဖြန် တနင်္ဂနွေ ဆိုရင် သူ့ရဲ့ နောက်တချီ အရှေ့အလယ်ပိုင်း ဒေသ ခရီး ထပ်ပြီး ပြုလုပ်ဖို့ ရှိနေပါတယ်။

ဂါဇာထဲ အစ္စရေးက လက်တုန့်ပြန် တိုက်ခိုက်တာတွေ ပြုလုပ်ခဲ့တဲ့နောက် ဝန်ကြီး ဘလင်ကင်ဟာ အရှေ့အလယ်ပိုင်း ဒေသတလွှား နိုင်ငံတွေဆီ ခရီးအလီလီ ထွက်နေခဲ့တာမှာ၊ အခုအကြိမ်ဟာ ၅ ကြိမ်မြောက် ဖြစ်ပါတယ်။ အခု ခရီးစဉ်မှာလည်း ဆော်ဒီအာရေဗျ၊ အီဂျစ်၊ ကာတာ၊ အစ္စရေးနဲ့ အသိမ်းပိုက်ခံ အနောက်ဘက်ကမ်းခြေဒေသ တို့ဆီ သွားရောက်မှာ ဖြစ်ပါတယ်။

အိုင်ယာလန် နှစ်နိုင်ငံပေါင်းစည်းရေး ဝါဒီ မြောက်အိုင်ယာလန် ဝန်ကြီးချုပ် နေရာကို ပထမဆုံး အကြိမ် ရရှိ

မြောက်အိုင်ယာလန်မှာ အိုင်းရစ်သျှ် အမျိုးသားရေး ဝါဒီဖြစ်တဲ့ မစ္စ မီရှဲအိုနေးလ်ဟာ မြောက်အိုင်ယာလန် အစိုးရရဲ့ ခေါင်းဆောင် ဖြစ်လာပါတယ်။

ဒါဟာ မြောက်အိုင်ယာလန် ဆိုပြီး စတင် ပေါ်ပေါက်လာခဲ့တဲ့ အနှစ် ၁၀၀ စွန်းစွန်း အတွင်း ပထမဆုံး အကြိမ် အဖြစ် အိုင်းရစ်သျှ် အမျိုးသားရေး ဝါဒီတစ်ယောက်ဟာ ဗြိတိသျှ နိုင်ငံရေးမှာ မြောက်အိုင်ယာလန် ဆိုင်ရာ ဝန်ကြီးချုပ် ဆိုပြီး ခေါ်ဆိုတဲ့ ရာထူးနေရာကို ရရှိတာ ဖြစ်ပါတယ်။

မီရှဲအိုနေးလ် ဒုတိယ အကြီးအကဲ အဖြစ် ဦးဆောင်တဲ့ ရှင်ဖိန်းပါတီဟာ (ဗြိတိန်ထဲ မပါဝင်တဲ့) ရီပတ်ဘလစ်အော့ဖ် အိုင်ယာလန်နဲ့ အိုင်ယာလန် နှစ်နိုင်ငံ တစ်နေ့မှာ မဖြစ်မနေ ပြန်လည် ပေါင်းစည်းရမယ် ဆိုပြီး ရည်ရွယ်ထားတာ ဖြစ်ပါတယ်။

ဗြိတိန်နဲ့ အတူ ပူးပေါင်း နေလိုတဲ့ မြောက်အိုင်ယာလန်ရဲ့ အဓိက ပြည်ထောင်စု ဝါဒီ ပါတီကြီးဟာ အီးယူကနေ ဗြိတိန်နှုတ်ထွက်တဲ့ ဘရက်ဇစ် အလွန် ကုန်သွယ်ရေး သဘောတူမှုတွေကို ကန့်ကွက်တဲ့ အနေနဲ့ မြောက်အိုင်ယာလန် အစိုးရအဖွဲ့ထဲကနေ နှုတ်ထွက်ခဲ့တဲ့နောက် မြောက်အိုင်ယာလန် အစိုးရအဖွဲ့ ပြိုကွဲခဲ့ပါတယ်။

နောက်ပိုင်းမှာတော့ ပြည်ထောင်စုဝါဒီတွေလည်း ဗြိတိန်အစိုးရနဲ့ သဘောတူမှုတွေ ရယူပြီး မြောက်အိုင်ယာလန် အစိုးရအဖွဲ့ထဲ ပြန်ပါခဲ့ပေမယ့်၊ မြောက်အိုင်ယာလန် ရွေးကောက်ပွဲတွေမှာ အိုင်ယာလန် ပေါင်းစည်းရေး အမျိုးသားရေး ဝါဒီ ရှောင်ဖိန်းက လွှမ်းမိုး လာပါတယ်။

ဂျာမနီမှာ လူမျိုးရေးခွဲခြားမှု လက်ျာစွန်းရောက် ဝါဒကို အုံကြွ ဆန့်ကျင်

ဂျာမနီနိုင်ငံမှာ လက်ျာစွန်းရောက် အမျိုးသားရေး AfD ပါတီကို ဆန့်ကျင်တဲ့ ဆန္ဒပြပွဲတွေ စနေနေ့တိုင်း သီတင်း ၃ ပတ် မြောက် အဖြစ် နိုင်ငံအနှံ့ မြို့ကြီး မြို့ငယ်တွေမှာ ပြုလုပ်နေပါတယ်။

ဂျာမန်မျိုးရိုး နောက်ခံကမှ မဟုတ်သူတွေကို ပြည်နှင်ဒဏ် ဘယ်လို ပေးကြမလဲ ဆိုတဲ့ ဆွေးနွေးပွဲကို AfD ပါတီဝင်တွေ တက်ရောက်ခဲ့တဲ့နောက် အခုလို လူတွေ အုံကြွ ဆန္ဒပြ လာကြတာ ဖြစ်ပါတယ်။ ဘာလင်မြို့တော်မှာ ဆိုရင် ဆန္ဒပြသူတွေ အရေအတွက် အများဆုံး စုဝေးခဲ့ကြပါတယ်။

အခုဆိုရင် AfD ပါတီဟာ လူကြိုက်များမှု စစ်တမ်းထဲ ရာခိုင်နှုန်း ၂၀ အောက် ကျဆင်းသွားပါတယ်။ ဒါပေမယ့်လည်း ကိန်းဂဏန်းတွေ အရ AfD ဟာ ဂျာမနီမှာ လူကြိုက်အများဆုံး နိုင်ငံရေးပါတီတွေထဲ ဒုတိယ နေရာမှာ ဆက်ရှိ နေဆဲ ဖြစ်ပါတယ်။