နိုဝင်ဘာ ၂၂ ရက် နိုင်ငံတဝန်းသတင်းများ အနှစ်ချုပ် - တက္ကသိုလ်ကျောင်းသား ၂၈,၀၀၀ ကျော် ကြိုတင်မဲပေးခဲ့တယ်လို့ UEC ထုတ်ပြန်
ဓာတ်ပုံ ရင်းမြစ်, MOI
နိုင်ငံတဝန်းက တက္ကသိုလ်ကျောင်းသား ၂၈၃၃၉ ဦး ကြိုတင်မဲပေးခဲ့ကြတယ်လို့ ပြည်ထောင်စုရွေးကောက်ပွဲကော်မရှင်က နိုဝင်ဘာ ၂၁ ရက်မှာ ထုတ်ပြန်ပါတယ်။
လာမယ့် တက္ကသိုလ်၊ ကောလိပ်ကျောင်းဖွင့်ကာလမတိုင်ခင် နိုဝင်ဘာ ၁၇ ရက်နေ့ကနေ ၂၁ ရက် အတွင်း ကြိုတင်မဲ ပေးဖို့ ရွေးကောက်ပွဲကော်မရှင်က ကာလသတ်မှတ်ခဲ့တာပါ။
မွန်ပြည်နယ်က တက္ကသိုလ်တစ်ခုကတော့ ကျောင်းသားတွေ ကျောင်းအပ်ရင် ကြိုတင်မဲပေးထားတဲ့ အထောက်အထားပြသရမယ်လို့ ကျောင်းတွင်းစာဖြန့်ဝေခဲ့လို့ ဝေဖန်မှုတွေရှိခဲ့ပါတယ်။
တက္ကသိုလ်ကျောင်းသားတွေဟာ အသက် ၁၈ နှစ်ပြည့်ပြီးခါစဖြစ်တာကြောင့် ပထမဆုံးမဲပေးခွင့် ရကြသူတွေလည်း ဖြစ်ပါတယ်။
"ဒါက ဖိအားတစ်မျိုးလို့ပဲ ယူဆတယ်။ ကျောင်းသားတွေကို ဒီလိုမလုပ်သင့်ဘူး။ အသက်လည်းပြည့်ပြီးချိန်မှာ ကိုယ်ပိုင်ဆုံးဖြတ်ခွင့်ရှိသင့်တယ်"လို့ ရန်ကုန်က တက္ကသိုလ်ကျောင်းသူတစ်ဦးက ဘီဘီစီကို ပြောပါတယ်။
တရားလွှတ်တော်ရှေ့နေတစ်ဦးကတော့ မဲမပေးလို့ အရေးယူလို့မရသလို မဲပေးဖို့ ဖိအားပေးလို့ မရဘူးလို့ ဆိုပါတယ်။
ရွေးကောက်ပွဲကော်မရှင်ကတော့ ကျောင်းသားတွေရဲ့ မဲပေးခွင့်မဆုံးရှုံးအောင် မြို့နယ်ပြင်ပထွက် ကျောင်းမတက်ခင် ကြိုတင်မဲပေးနိုင်အောင် စီစဥ်တာလို့ ပြန်ဖြေရှင်းခဲ့ပါတယ်။
နိုင်ဂျီးရီးယားမှာ ကျောင်းသားကျောင်းသူ ၂၀၀ ကျော်ကို လက်နက်ကိုင်တွေ ပြန်ပေးဆွဲ
ဓာတ်ပုံ ရင်းမြစ်, Getty Images
နိုင်ဂျီးရီးယားနိုင်ငံ အလယ်ပိုင်း နိုင်ဂျာပြည်နယ်က ကက်သလစ်စာသင်ကျောင်းတစ်ကျောင်းကို သောကြာနေ့မှာ သေနတ်သမားတွေ ဝင်ရောက်စီးနင်းပြီး ကျောင်းသားကျောင်းသူ ၂၀၀ ကျော်ကို ပြန်ပေးဆွဲသွားခဲ့ပါတယ်။
နောက်ဆုံးရ သတင်းနဲ့ မျက်မှောက်ရေးရာအစီအစဉ်များ
ပေါ့ဒ်ကတ်စ်အစီအစဉ်များ
End of podcast promotion
ဒါဟာ တစ်ပတ်အတွင်း စာသင်ကျောင်းနှစ်ကျောင်းက ကျောင်းသားကျောင်းသူအစုလိုက်အပြုံလိုက် ပြန်ပေးဆွဲခံရမှု ဖြစ်ပါတယ်။
လုံခြုံရေးဆိုင်ရာခြိမ်းခြောက်မှုတွေရှိနေလို့ ဘော်ဒါဆောင်ပါတဲ့ ကျောင်းတွေကို ယာယီပိတ်သိမ်းထားဖို့ အာဏာပိုင်တွေက ညွှန်ကြားထားတဲ့ နိုင်ဂျာပြည်နယ် ပါပီရီက စိန့်မေရီစာသင်ကျောင်းမှာ သောကြာနေ့က ပြန်ပေးမှုဖြစ်ခဲ့တာပဲဖြစ်ပါတယ်။
ကျောင်းသား ၂၁၅ ဦးနဲ့ ဝန်ထမ်း ၁၂ ဦးတို့ သောကြာနေ့အစောပိုင်းမှာ စီးနင်းဖမ်းဆီးခံခဲ့ရတာဖြစ်တယ်လို့ နိုင်ဂျီးရီးယားခရစ်ယာန်အသင်းက ထုတ်ပြန်ထားပါတယ်။
တနင်္လာနေ့တုန်းကကျောင်းသူ ၂၀ ကျော် ပြန်ပေးဆွဲခံရမှုအပါအဝင် နိုင်ဂျီးရီးယားမှာ မကြာသေးမီရက်တွေမှာ လက်နက်ကိုင်တပ်ဖွဲ့တွေရဲ့ တိုက်ခိုက်မှုသစ်တွေရှိလာခဲ့ပါတယ်။
တနင်္လာနေ့ဖြစ်ရပ်ဟာ နိုင်ဂျာပြည်နယ်နဲ့ကပ်လျက်မှာရှိတဲ့ ကက်ဘီပြည်နယ်က ဘော်ဒါဆောင်ပါစာသင်ကျောင်းက မွတ်စလင်ကျောင်းသူတွေဖြစ်တယ်လို့ ဘီဘီစီက သိထားပါတယ်။
တောင်ပိုင်းက ခွာရာပြည်နယ်မှာလည်း ခရစ်ယာန်အသင်းတော်တစ်ခုမှာ ဝတ်ပြုဆုတောင်းမှုဖြစ်နေတုန်း တိုက်ခိုက်မှုကြောင့် လူနှစ်ဦးသေဆုံးပြီး ၃၈ ဦး ပြန်ပေးဆွဲခံခဲ့ရပါတယ်။
သမ္မတ ဘိုလာ တီနူဘူဟာ လုံခြုံရေးကိစ္စတွေကိုင်တွယ်ဖို့ တောင်အာဖရိကမှာပြုလုပ်မယ့် ဂျီ ၂၀ ထိပ်သီးအစည်းအဝေးအပါအဝင် နိုင်ငံခြားခရီးစဉ်တွေကို ဖျက်သိမ်းခဲ့ပါတယ်။
ဒေသတွင်းမှာ ဓားပြတွေလို့ သိကြတဲ့ လက်နက်ကိုင်အမျိုးသားတွေဟာ ဒေသဆိုင်ရာစံတော်ချိန် မွန်းလွဲ နှစ်နာရီမှာ စိန့်မေရီစာသင်ကျောင်းကို ဝင်ရောက်စီးနင်းပြီး အဆောင်ကကျောင်းသားကျောင်းသူတွေကို ပြန်ပေးဆွဲသွားခဲ့တာဖြစ်တယ်လို့ ရဲတပ်ဖွဲ့ကပြောပါတယ်။
အကြမ်းဖက်တိုက်ခိုက်နိုင်ခြေ အင်မတန်များတယ်လို့ ထောက်လှမ်းရေးသတင်းပေးမှုတွေရှိပြီးနောက် ဘော်ဒါဆောင်ပါတဲ့ စာသင်ကျောင်းတွေကို ပိတ်သိမ်းထားဖို့ ညွှန်ကြားချက်ကို စာသင်ကျောင်းက အလေးအနက်မထားခဲ့ဘူးလို့ နိုင်ဂျာပြည်နယ်က အာဏာပိုင်တွေကပြောပါတယ်။
မိုင်းရယ်-ဟိုယ လမ်းကြောကနေ စစ်ရေးအခြေအနေဘယ်လိုဖြစ်နေလဲ
ဓာတ်ပုံ ရင်းမြစ်, The Kokang
ရှမ်းပြည်နယ်မြောက်ပိုင်း၊ မိုင်းရယ်မြို့နယ်ထဲက မိုင်းရယ်မြို့နဲ့ ဟိုယရွာ လမ်းကြောမှာရှိတဲ့ ကိုးကန့်တပ်ဖွဲ့ တချို့ ဆုတ်ခွာနေပြီလို့ ဒေသတွင်းသတင်းဌာန၊ ဝလူငယ့်အသံက နိုဝင်ဘာ ၂၂ ရက်မှာ ဖော်ပြလာပါတယ်။
နမ့်ပေါင်-ဟိုယ-မိုင်းရယ်လမ်းကြောကနေ ကိုးကန့်တပ်တွေ ဒီနှစ်ကုန်အပြီး ဆုတ်ခွာပေးရမှာဖြစ်တယ်လို့လည်း ဝလူငယ့်အသံက ကိုးကန့်တပ်တွင်းသတင်းအရင်းအမြစ်ကို ကိုးကား ပြီးသတင်းထုတ်လာတာပါ။
MNDAA နဲ့ နီးစပ်တဲ့ ဘီဘီစီရဲ့ သတင်းအရင်းအမြစ်ကတော့" မဟုတ်ပါဘူးဗျ၊ လမ်းကတော့ အရင်အတိုင်း ပိတ်ထားတယ်" လို့ ဆိုပါတယ်။
တရုတ်အကူအညီနဲ့ သေနတ်မဖောက်ဘဲ လားရှိုးမြို့ကို ကိုးကန့်လက်ထဲကနေပြန်ယူထားတဲ့ စစ်တပ်က လားရှိုး-မန္တလေး ပြည်ထောင်စုလမ်းမကြီးပေါ်က သီပေါ-လားရှိုးလမ်းပိုင်းနဲ့ နမ့်ပေါင်-ဟိုယ-မိုင်းရယ် လမ်းကနေ ဆုတ်ခိုင်းလာတာပါ။
ဒါကြောင့် နှစ်ဖက်စစ်ရေးတင်းမာနေပြီး မိုင်းရယ်-ဟိုယကြားမှာတစ်နေရာ၊ သီပေါတံတားမှာ တစ်နေရာ နဲ့ နမ့်လန်ဘက်မှာ တစ်နေရာ အပြန်အလှန်လမ်းပိတ်ဆို့တာတွေ နိုဝင်ဘာလလယ်ပိုင်းမှာ လုပ်ဆောင်လာကြ ပါတယ်။
နိုဝင်ဘာ ၁၁ ရက်ကစလို့ လားရှိုးမြို့က ဆင်နှစ်ကောင်ဟိုတယ်မှာ အရှေ့မြောက်တိုင်းစစ်ဌာနချုပ်က တိုင်းစစ်ဦးစီးချုပ် ဦးဆောင်တဲ့အဖွဲ့နဲ့ ကိုးကန့်တပ်တို့အကြား ငါးရက်အကြာ ဆွေးနွေးပွဲ ပြုလုပ်ခဲ့ပါတယ်။
ဒီဆွေးနွေးပွဲမှာ အခုလိုတပ်ဆုတ်ခိုင်းတာတွေရှိခဲ့ပြီး ကိုးကန့်ဘက်က မလိုက်လျောတာကြောင့် နှစ်ဘက်တပ်တွေအကြား တင်းမာမှုတွေရှိလာတာဖြစ်ပါတယ်။
လားရှိုးမြို့ပေါ် ၁၂ ရပ်ကွက်မှာတော့ စစ်တပ်ဘက်ကပဲ အုပ်ချုပ်ရေးလုပ်ဆောင်နေတာ ဖြစ်ပါတယ်။
ဂျပန်နဲ့ တရုတ် ထိုင်ဝမ်အရေးတင်းမာမှု တရုတ်ဘက်က စစ်ကော်မရှင်ရပ်တည်
ဓာတ်ပုံ ရင်းမြစ်, Getty Images,MOI,MN
မြန်မာနိုင်ငံအနေနဲ့ တရုတ်တစ်နိုင်ငံတည်းမူဝါဒအပေါ် ခိုင်မာစွာထောက်ခံရပ်တည်တယ်လို့ စစ်ကော်မရှင်ပြောခွင့်ရ ဗိုလ်ချုပ်ဇော်မင်းထွန်းက ပြောလာပါတယ်။
ဂျပန်ဝန်ကြီးချုပ်ရဲ့ ထိုင်ဝမ်နဲ့ပတ်သက်တဲ့ ပြောဆိုချက်အပေါ် မြန်မာစစ်တပ်ရဲ့ သဘောထားကိုပြောလာတာပါ။
"တရုတ်နိုင်ငံရဲ့ တရုတ်တစ်နိုင်ငံတည်းမူဝါဒကို ခိုင်မာစွာထောက်ခံရပ်တည်တယ်ဆိုတဲ့အကြောင်းကို မြန်မာနိုင်ငံယာယီသမ္မတ ဗိုလ်ချုပ်မှူးကြီးမင်းအောင်လှိုင်က တရုတ်သမ္မတနဲ့ တွေ့ ဆုံချိန်မှာ ထပ်လောင်းအတည်ပြုပြောကြားခဲ့ပါတယ်" လို့ စစ်ကော်မရှင်ပြောခွင့်ရက ဆိုပါတယ်။
ဒါအပြင် တရုတ်မြန်မာနှစ်နိုင်ငံဟာ အိမ်နီးချင်းမိတ်ဆွေကောင်းဖြစ်တယ်ဆိုတဲ့အချက်ကို အလေးထားတယ်ဆိုတာနဲ့ တရုတ် နိုင်ငံရဲ့ နယ်မြေတည်တံ့ခိုင်မြဲမှုနဲ့ အချုပ်အခြာအာဏာပိုင်ဆိုင်မှုအပေါ်မှာ မြန်မာကလေးစားပြီး ဒီအချက်ကိုကာကွယ်တာကို မြန်မာကအမြဲထောက်ခံတယ်လို့ ပြောထားပါသေးတယ်။
ဂျပန်ဝန်ကြီးချုပ် ဆာနာအဲ တာကာအိချိက တရုတ်က ထိုင်ဝမ်ကို ကျူးကျော်တိုက်ခိုက်ရင် ဂျပန်ရဲ့ကာကွယ်ရေးတပ်ဖွဲ့စေလွှတ်တုံ့ပြန်သွားမယ်လို့ နိုဝင်ဘာ ၇ ရက်မှာ ပြောအပြီးမှာ နှစ်နိုင်ငံတင်းမာမှုတွေ စတင်ခဲ့တာပါ။
ဒီအပေါ်ကို ဂျပန်နိုင်ငံ၊ အိုဆာကာက တရုတ်ကောင်စစ်ဝန်က ဂျပန်ဝန်ကြီးချုပ်ခေါင်းကို ဖြတ်သင့်တယ်လို့ အဓိပ္ပါယ်ပြန်ဆိုနိုင်တဲ့ စာသားနဲ့ ဂျပန်ဝန်ကြီးချုပ်ရဲ့ လွှတ်တော်ကပြောဆိုချက်ဆောင်းပါးကို X လူမှုကွန်ရက်မှာ ပြန်လည်ဝေမျှချက်မှာ မှတ်ချက်ရေးခဲ့ပါတယ်။
အဲဒီကတဆင့် စကားစစ်ပွဲတွေက ပြင်းထန်လာပြီး နှစ်နိုင်ငံ နိုင်ငံခြားရေးဌာနတွေက ပြင်းပြင်းထန်ထန် အပြန်အလှန် ကန့်ကွက် ဆန္ဒပြတာတွေလုပ်ဆောင်နေကြပါတယ်။
ဂျပန်က တရုတ်ရောက်နေတဲ့ သူ့နိုင်ငံသားတွေ သတိထားကြဖို့ အသိပေးထားသလို တရုတ်ကလည်း သူ့နိုင်ငံသားတွေ ဂျပန်ကိုလည်ပတ်တာမလုပ်ဖို့ တိုက်တွန်းထားပါတယ်။
တရုတ်လေကြောင်းလိုင်းတွေက ဂျပန်ခရီးစဥ်တွေအတွက် ငွေပြန်အမ်းနေသလို နာမည်ကြီး ဂျပန်ရုပ်ရှင် ကား ၂ ကားကို တရုတ်မှာ မပြသတော့ဘူးလို့ ဖျက်သိမ်းလာပါတယ်။
အခုပြဿနာကြောင့် ဒုတိယကမ္ဘာစစ်အတွင်း အခြေတည်ခဲ့တဲ့ အမုန်းတရားတွေပါ နှစ်နိုင်ငံကြား ထုတ်ပြောလာကြတာ ဖြစ်ပါတယ်။
တရုတ်က မြန်မာစစ်တပ်ဘက်ကို ဒီနှစ်ပိုင်းထဲမှာ ထောက်ခံကူညီမှုတွေ ပိုပေးလာပြီး ဂျပန်ကတော့ စစ်တပ်အာဏာသိမ်းထားတာကြောင့် မြန်မာအပေါ် သံတမန်ဆက်ဆံရေးအရပါ တစ်ဆင့်နှိမ့်ထားတာဖြစ်ပါတယ်။
ခါလိုရဲ့ ပန်ချီကား ဒေါ်လာ ၅၅ သန်းနဲ့ရောင်းထွက်
ဓာတ်ပုံ ရင်းမြစ်, Getty Images
ပန်းချီအနုပညာရှင် ဖရီဒါ ခါလို ၁၉၄၀ ပြည့်နှစ်ကျော်ကာလတွေမှာ ရေးဆွဲခဲ့တဲ့ ပန်းချီကားဟာ ဒေါ်လာ ၅၄ ဒသမ ၇ သန်းနဲ့ရောင်းထွက်ခဲ့တာမို့ အမျိုးသမီးအနုပညာရှင်တစ်ဦးရဲ့ လက်ရာတစ်ခုကို လေလံဈေးနဲ့ရောင်းချရာမှာ စံချိန်ချိုးခဲ့တာဖြစ်ပါတယ်။
အမျိုးသမီးအနုပညာရှင်တစ်ဦးရဲ့ လက်ရာတစ်ခုကို လေလံတင်ရာမှာ အများဆုံးရခဲ့တဲ့ ဈေးနှုန်းက ဒေါ်လာ ၄၄ သန်းဖြစ်ပြီး ဂျော်ဂျီယာ အိုကီဖဲရဲ့ Jimson Weed / White Flower No.1 ဖြစ်ကာ ၂၀၁၄ ခုနှစ်မှာ Sotheby က လေလံတင်ခဲ့တာဖြစ်ပါတယ်။
၁၉၅၄ ခုနှစ်မှာ ကွယ်လွန်ခဲ့တဲ့ ခါလိုဟာ လွန်ခဲ့တဲ့ ရာစုနှစ်မှာ အကြီးအကျယ်ဆုံးပန်းချီဆရာတွေအနက် တစ်ဦးအပါအဝင်ဖြစ်တယ်လို့ သတ်မှတ်ခံခဲ့ရပြီး ကိုယ်တိုင်ရေးပုံတူတွေကြောင့် လူသိများခဲ့ပါတယ်။
၁၉၈၀ ပြည့်နှစ်မှာရရှိခဲ့တဲ့ ကနဦးလေလံဈေးထက် အဆ ၁၀၀၀ ကျော်ရရှိခဲ့တာပဲဖြစ်ပါတယ်။ ပန်းချီစုဆောင်းသူနှစ်ဦးကြား ဈေးအပြိုင်အဆိုင်ပေးခဲ့ပြီးနောက်မှာ ရောင်းထွက်ခဲ့တာဖြစ်တယ်လို့ Sotheby လေလံကုမ္ပဏီက ထုတ်ပြန်ခဲ့ပါတယ်။
အခုရရှိခဲ့တဲ့ လေလံဈေးဟာ ၂၀၂၁ ခုနှစ်မှာ ဒေါ်လာ ၃၄ ဒသမ ၉ သန်းနဲ့ရောင်းထွက်ခဲ့တဲ့ ခါလိုပုံတူပန်းချီကားတစ်ကားရဲ့ စံချိန်ကို ချိုးနိုင်ခဲ့တာပဲဖြစ်ပါတယ်။
စပိန်လို El sueño (la cama) -အိပ်မက်(အိပ်ရာ) လို့နာမည်ပေးထားတဲ့ ပန်းချီလက်ရာမှာ ခါလိုဟာ ဒိုင်းနမိုက်တွေနဲ့ ချည်နှောင်ထားတဲ့ အရိုးစုရဲ့အောက်မှာရှိတဲ့ အိပ်ရာမှာ အိပ်စက်နေတဲ့ ခါလိုကို မြင်တွေ့ရမှာဖြစ်ပါတယ်။
ဒီပန်းချီကို Sotheby မှာပဲ ၁၉၈၀ ပြည့်နှစ်မှာ လေလံတင်ရောင်းချတဲ့အခါ ဒေါ်လာ ၅၁၀၀၀ သာရရှိခဲ့တာမို့ လက်ရှိပေါက်ဈေးနဲ့ရောင်းထွက်မယ်လို့ ဘယ်သူက ထင်ထားမှာမဟုတ်ဘူးလို့ လေလံကုမ္ပဏီရဲ့ လက်တင်အမေရိကအနုပညာဆိုင်ရာအကြီးအကဲ အန်နာ ဒီ စတာစီက ပြောခဲ့ပါတယ်။
ဒီပန်းချီကားဟာ မက္ကဆီကိုပန်းချီဆရာမရဲ့ စိတ်ပိုင်းဆိုင်ရာတင်းမာမှုတွေ အများဆုံးပါတဲ့ ပုံတူပန်းချီတွေအနက် တစ်ခုဖြစ်တယ်လို့ လေလံကုမ္ပဏီက ထုတ်ပြန်ခဲ့ပါတယ်။ ခါလို အိမ်ထောင်ကွာရှင်းပြတ်စဲ၊ ပြန်လည်လက်ထပ်ပြီးလို့ မကြာမီ ခါလိုရဲ့ချစ်သူဟောင်း လုပ်ကြံခံရတဲ့နှစ်ဖြစ်လို့ ပန်းချီဆရာမအတွက် အင်မတန်ကို မုန်တိုင်းထန်တဲ့ကာလမှာ ရေးဆွဲခဲ့တဲ့ပန်းချီကားလည်းဖြစ်ပါတယ်။
သူ့ရဲ့လက်ရာတွေဟာ ကလေးဘဝမှာ ပိုလီယိုရောဂါကြောင့် မသန်စွမ်းဖြစ်မှု၊ ဘတ်စ်ကားမတော်တဆမှုပြီးနောက် ဒဏ်ရာအကြီးအကျယ်ရမှုတို့နဲ့ပတ်သက်တဲ့ သူ့ရဲ့ခန္ဓာကိုယ်နဲ့ နာကျင်စရာဆက်ဆံရေးအကြောင်းကို ပုံဖော်ထားတတ်ပါတယ်။
စံချိန်ချိုးနိုင်ခဲ့တဲ့ရလဒ်က ဖရီဒါ ခါလိုရဲ့ ဉာဏ်ကြီးမှုကို အသိအမှတ်ပြုမှု၊ ဈေးကွက်ရဲ့အမြင့်ဆုံးအဆင့်မှာ အမျိုးသမီးအနုပညာရှင်တွေရဲ့လက်ရာတွေကို အသိအမှတ်ပြုမှုနဲ့ပတ်သက်လို့ ဘယ်လောက်တောင် အချိန်ယူခဲ့ရတယ်၊ အားထုတ်ခဲ့ရတယ်ဆိုတာကို ပြသနေပါတယ် လို့ အန်နာ က ပြောခဲ့ပါတယ်။
၁၉၈၀ ပြည့်နှစ်ကျော်ကာလတွေမှဦ မက္ကဆီကိုအာဏာပိုင်တွေက ခါလိုရဲ့လက်ရာတွေဟာ အနုပညာဆိုင်ရာမော်ကွန်းမှတ်တမ်းတွေဖြစ်တယ်လို့ ကြေညာပြီး ခွင့်ပြုချက်မရဘဲ ပြည်ပကိုတင်ပို့ခွင့်မပြုခဲ့တာကြောင့် El sueño (la cama) ဟာ အများဆိုင်ရာဈေးကွက်မှာ ရှိနေတဲ့ ရှားရှားပါးပါး ခါလိုပန်းချီကားတစ်ချပ်လည်းဖြစ်ခဲ့ပါတယ်။
ခါလိုရဲ့ ဖြစ်ရပ်ကို ၂၀၀၂ ခုနှစ်မှာ အတ္ထုပတ္တိရုပ်ရှင်အဖြစ် ဖြန့်ချိခဲ့ပြီး ဆယ်လ်မာ ဟေးယက်က ခါလိုနေရာက သရုပ်ဆောင်ခဲ့ကာ သူ့ခင်ပွန်း ဒီဂို ရီဗာရာနဲ့ မုန်တိုင်းထန်တဲ့ဆက်ဆံရေး၊ သူ့ဒဏ်ရာတွေနဲ့ပတ်သက်လို့ ပုံဖော်ထားပါတယ်။
မြန်မာရွှေ့ပြောင်းအလုပ်သမား အများအပြားရှိတဲ့ ဟတ်ယိုင်မှာ ရေကြီး
ဓာတ်ပုံ ရင်းမြစ်, Hat Yai Municipal
ထိုင်းနိုင်ငံတောင်ပိုင်း ဆုန်ခလာခရိုင်ထဲက ဟတ်ယိုင်မြို့ပေါ်အပါအဝင် ဟတ်ယိုင်ခရိုင်ခွဲထဲမှာရေကြီးနေတာကြောင့် မြန်မာရွှေ့ပြောင်းအလုပ်သမားတွေအပေါ် သက်ရောက်မှုရှိတယ်လို့ ဒီခရိုင်ထဲမှာ နေထိုင်သူ တစ်ဦးက ဘီဘီစီကို ပြောပါတယ်။
လွန်ခဲ့တဲ့ ၃ ရက်လောက်ကစပြီး မိုးအဆက်မပြတ် ရွာကာ နိုဝင်ဘာ ၂၁ ရက်ညမှာ ဟတ်ယိုင်မြို့ရဲ့ စိုးရိမ်ရေအမှတ်ကို ရောက်လာခဲ့ပြီး လမ်းတွေမှာ ရေကြီးနစ်မြုပ်နေတယ်လို့ ထိုင်းသတင်းတွေကလည်း ဖော်ပြနေပါတယ်။
"ကျွန်တော်တို့စက်ရုံကနေ ဆေးရုံပြမယ့်သူတွေလည်း မြို့ပေါ်မှာ ရေကြီးနေလို့ သွားလို့မရတော့ဘူး။ကားလမ်းဘေးနီးတဲ့ စက်ရုံတွေကတော့ ဒီနေ့စပိတ်ပြီ"လို့ ဟတ်ယိုင်ခရိုင်ထဲနေသူတစ်ဦးက ပြောပါတယ်။
ဟတ်ယိုင်ခရိုင်ထဲက စက်ရုံအလုပ်ရုံ၊ ဆောက်လုပ်ရေး၊ ရော်ဘာခြံနဲ့ ဆီအုန်းခြံတွေမှာ မြန်မာရွှေ့ ပြောင်း အလုပ်သမားအများစု အလုပ်လုပ်ကိုင်နေကြတာဖြစ်ပါတယ်။
ဟတ်ယိုင်မြို့ပေါ်က ဆေးရုံမှာတက်နေတဲ့ မြန်မာရွှေ့ပြောင်းတစ်ဦးကလည်း ရေကြီးနေလို့ ဆေးရုံက ဆင်းမရဘဲ ဆက်နေနေရတယ်လို့ လူမှုကွန်ရက်မှာပြောထားပါတယ်။
ဟတ်ယိုင်မြို့ရဲ့ နေရာ ၁၀၃ ခုမှာ နေထိုင်သူတွေကိုတော့ သူတို့ရဲ့ ပိုင်ဆိုင်တဲ့အရေးကြီးပစ္စည်းတွေ ရွှေ့ပြောင်းထားဖို့နဲ့ ရေတက်လာရင်အရေးပေါ်ရွှေ့ပြောင်းနိုင်အောင် အဆင်သင့်ပြင်ထားဖို့ ထိုင်းအာဏာပိုင်တွေက သတိပေးချက်ထုတ်ပြန်ထားပါတယ်။
ထိုင်းသဘာဝဘေးအန္တရာယ်ကာကွယ်ရေးနဲ့ လျော့ပါးရေးဌာနကတော့ ဟတ်ယိုင်ခရိုင်ခွဲရှိရာ ဆုန်ခလာခရိုင်၊ နခွန်စီသမာရက်၊ဖက်ထလွန်၊ ပတ္တနီ၊ရာလ၊ထရန်နဲ့ စတွန်ခရိုင်တွေမှာ ရေကြီး၊မြေပြိုသတိပေးချက်တွေ ထုတ်ပြန်ထားပါတယ်။
အခုရေကြီးမှုကြောင့် အိမ်ခြေ တစ်သိန်းခွဲကျော် လူဦးရေ လေးသိန်းကျော်အပေါ် သက်ရောက်မှုရှိပေမဲ့ လူသေဆုံးတာနဲ့ ထိခိုက်ဒဏ်ရာရတာတော့မရှိသေးဘူးလို့ ထိုင်းအာဏာပိုင်တွေက နိုဝင်ဘာ ၂၂ ရက်မှာ ထုတ်ပြန်ပါတယ်။
ကဗျာဆရာကြီး ကိုလေး(အင်းဝဂုဏ်ရည်)ကွယ်လွန်
ဓာတ်ပုံ ရင်းမြစ်, NPE
ကဗျာဆရာကြီး ကိုလေး(အင်းဝဂုဏ်ရည်) နိုဝင်ဘာ ၂၂ ရက်မနက်ပိုင်းမှာ ကွယ်လွန်သွားပြီလို့ မိသားစုထံက သိရပါတယ်။
ကွယ်လွန်ချိန်မှာ အသက် ၉၁ နှစ်ရှိပြီဖြစ်တဲ့ ဆရာကြီး ကိုလေး(အင်းဝဂုဏ်ရည်)ဟာ အမျိုးသားစာပေဆု၊တစ်သက်တာစာပေဆု၊ တော်ဘုရားလေးစာပေဆုနဲ့ အလင်္ကာကျော်စွာဆုရ စာပေပညာရှင်တစ်ဦး ဖြစ်ပါတယ်။
၁၉၆၅ခုနှစ် အသက် ၂၉ နှစ်အရွယ်မှာ လမ်းသစ်ကဗျာများ စာအုပ်နဲ့ အမျိုးသားစာပေဆုရခဲ့တာဖြစ်ပြီး မွန်းတည့်အမီ ကဗျာစာအုပ်နဲ့ တော်ဘုရားလေး ကဗျာဆုကို ၂၀၁၂ခုနှစ်မှာရခဲ့တာပါ။
"ငြိမ်းချမ်းရေးဖြစ်စဉ်မှာ အားလုံးပါဝင်ဖို့၊ ငြိမ်းချမ်းရေးဖြစ်စဉ်ကြီး ပေါ်လာအောင် စာပေက စွမ်းဆောင်နိုင် တယ်။ ကဗျာက စွမ်းဆောင်နိုင်တယ်" လို့ ဆရာကြီး ကိုလေး(အင်းဝဂုဏ်ရည်) က ၂၀၁၅ ခုနှစ်က ပြုလုပ်ခဲ့တဲ့ ၂၀၁၄ ခုနှစ်အတွက် အမျိုးသားစာပေတစ်သက်တာဆု ရချိန်မှာ ပြောခဲ့ပါတယ်။
ဆရာကြီးဟာ ၆ တန်းကျောင်းသားအရွယ်မှာ ကဗျာတွေစရေးခဲ့တယ်လို့ သူကိုယ်တိုင်ထုတ်ပြောဖူးပါတယ်။
သူ့ရဲ့ အင်းဝဂုဏ်ရည် ပုံနှိပ်တိုက်လုပ်ငန်းကလည်း စာပေနယ်ပယ်မှာ ထင်ရှားပါတယ်။ ဆရာကြီးဟာ ကွယ်လွန်ချိန်အထိ တံတားဦးမြို့မှာ နေထိုင်ခဲ့တာပါ။
ဆရာကြီးရဲ့နောက်ဆုံးခရီးကို မနက်ဖြန် နေ့လယ် ၁ နာရီမှာ မန္တလေးတိုင်း၊ တံတားဦးသုသာန်မှာ ပို့ဆောင်မီးသင်္ဂြိုဟ်မယ်လို့ မိသားစုက အသိပေးထားပါတယ်။
ထရမ့်နဲ့ ဇိုဟ်ရန်း မမ်ဒါနီ အိမ်ဖြူတော်တွေ့ဆုံမှု ဘယ်လိုထူးခြားလဲ
ဓာတ်ပုံ ရင်းမြစ်, Getty Images
စကားလုံးစစ်ပွဲတွေအပြန်အလှန်ဆင်နွှဲခဲ့ကြဖူးတဲ့ သမ္မတထရမ့်နဲ့ နယူးယောက်မြို့တော်ဝန် ဇိုဟ်ရန်း မမ်ဒါနီတို့ အိမ်ဖြူတော်မှာ ဒီနေ့တွေ့နေကြပါတယ်။
မြို့တော်ဝန် ရွေးကောက်ပွဲကြို မဲဆွယ်ကာလမှာ မစ္စတာ မမ်ဒါနီကို ကွန်မြူနစ် ဆိုပြီး သမ္မတ ထရမ့်က တံဆိပ်ကပ်ခဲ့သလို မမ်ဒါနီကလည်း ထရမ့်ကို ဖက်ဆစ် လို့ ပြောခဲ့ဖူးတာပါ။
ဒါပေမဲ့ အိမ်ဖြူတော်မှာတော့ သူတို့ နှစ်ဦးက မဟာမိတ်တွေပုံစံ ရုတ်တရက် ပြောင်းလဲသွားကြပြီး ဆက်ဆံရေးအဆင်ပြေချောမွေ့နေကြပါတယ်။
သတင်းထောက်တစ်ဦးက "သမ္မတထရမ့်ကို ဖက်ဆစ်လို့ သဘောထားတုန်းပဲလား" လို့ မေးခဲ့တာကို ထရမ့်က မမ်ဒါနီဘက်က ကာကွယ်ဖြေကြားခဲ့ပါတယ်။
ရှိုးတို့ရှန်းတန်းဖြစ်သွားတဲ့ မမ်ဒါနီ အဖြေပေးဖို့ကြိုးစားတာကို ထရမ့်ကကြားဝင်ပြီး "အိုကေပါတယ်၊ ဟုတ်တယ်လို့ပဲ ပြောလိုက်ပါ၊ရှင်းပြတာထက် အဲဒီလိုပြောလိုက်တာက ပိုလွယ်တယ်။ ကိစ္စမရှိပါဘူး" လို့ ရယ်မောပြောဆိုပါတယ်။
မမ်ဒါနီ နိုင်ရင် နယူးယောက်မြို့ကြီး အတွက် ဗဟို အစိုးရက ထောက်ပံ့တဲ့ ဘတ်ဂျက်ငွေတွေ မပေးဘူးလို့ ထရမ့်က ခြိမ်းခြောက်ခဲ့ဖူးပေမဲ့ နှစ်ဦးသားတွေ့ဆုံစဥ်မှာ နယူးယောက်မြို့ စီးပွားရေးပြန်ကောင်းဖို့နဲ့ ရာဇဝတ်မှုတွေလျော့ကျဖို့ ဆွေးနွေးခဲ့ကြပါတယ်။
ရီပတ်ဘလစ်ကန်ဖြစ်တဲ့ ထရမ့်နဲ့ ဆိုရှယ်ဒီမိုကရက် မမ်ဒါနီတို့တွေ့ဆုံမှုမှာ ပဋိပက္ခဖြစ်နိုင်တယ်လို့ ခန့်မှန်းမှုတွေရှိခဲ့ပေမဲ့ လက်တွေ့မှာတော့ အပြုသဘောဆောင်ခဲ့တာ တွေ့ရပါတယ်။
အသက် ၃၄ နှစ်သာ ရှိသေးတဲ့ မစ္စတာ မမ်ဒါနီဟာ နယူးယောက်ရဲ့ ပထမဆုံး မွတ်ဆလင်မ် မြို့တော်ဝန် ဖြစ်ပြီး အနှစ် ၁၀၀ ကျော်အတွင်း အသက်အငယ်ဆုံး မြို့တော်ဝန် ဖြစ်ပါတယ်။
ဘဲဥပုံရုံးခန်းမှာ သူက သူ့ရဲ့အရည်အသွေးကို ပြသနိုင်ခဲ့တာတွေ့ရပါတယ်။
ပို့ကုန်ရငွေ ဒေါ်လာသန်းချီမအပ်လို့ဆိုပြီး လုပ်ငန်းရှင်တချို့ဖမ်းဆီးခံရ
ဓာတ်ပုံ ရင်းမြစ်, MOI
ပို့ကုန်ရငွေ ဒေါ်လာသန်း ၅၀ ကျော်ပြန်မသွင်းလို့ဆိုကာ ပဲလုပ်ငန်းရှင် ၈ ဦးကို အရေးယူလိုက်တယ်လို့ စစ်ကော်မရှင်က နိုဝင်ဘာ ၂၂ ရက်မှာ ထုတ်ပြန်ပါတယ်။
လုပ်ငန်းရှင် ၈ ဦးထဲက ၄ ဦးကို စစ်တပ်က ဖမ်းဆီးထားပြီး ၄ ဦးက တိမ်းရှောင် နေတယ်လို့ ဆိုပါတယ်။
စစ်ကော်မရှင်ထုတ်ပြန်ချက်အရ Maha Nadi International Co.,Ltd. က ၂၀၂၂ ခုနှစ်ကနေ ၂၀၂၄ ခုနှစ်အတွင်း တင်ပို့ခဲ့တဲ့ မတ်ပဲ အမေရိကန်ဒေါ်လာ ၄၂ သန်းအတွက် ပြန်သွင်းရမယ့် ဒေါ်လာ သန်း ၄၀ ကျော် ပေးဖို့ကျန်နေတယ်လို့ သိရပါတယ်။
ပဲတင်ပို့တဲ့ နောက်ထပ်ကုမ္ပဏီတွေဖြစ်တဲ့ RK Shipping and Trading Co.,Ltd. က ပို့ကုန်ရငွေ ဒေါ်လာ ၂ သန်းကျော်၊ Taw Thar Gyi Co.,Ltd. က ဒေါ်လာ ၉ ဒသမ ၃ သန်းကျော် ငွေသွင်းဖို့ကျန် တယ်လို့ စစ်ကော်မရှင်က ထုတ်ပြန်ပါတယ်။
Ocean Lion King Co.,Ltd.ကတော့ တင်ပို့ခဲ့တဲ့ ပဲတန်ဖိုး ဒေါ်လာ ၁ ဒသမ ၆ သန်းအတွက် ငွေပြန်သွင်းဖို့ ကျန်တယ်ဆိုပေမဲ့ ပမာဏအတိအကျတော့ မဖော်ပြထားပါဘူး။
ဒီကုမ္ပဏီက ဒါရိုက်တာ ၈ ဦးကို ကျူးလွန်ခဲ့တဲ့ ပြစ်မှုအလိုက်အရေးယူမယ့်အပြင် ပိုင်ဆိုင်မှုတွေကိုလည်း ငွေကြေးခဝါချမှုတိုက်ဖျက်ရေးဥပဒေအရပါ အရေးယူမယ်လို့ စစ်ကော်မရှင်က ဒီနေ့ထုတ်ပြန်ပါတယ်။
Maha Nadi International Co.,Ltd. မှ ဒါရိုက်တာ ဦးရဲမင်းလွင်ဟာ သူ့ကုမ္ပဏီတွေ ပို့ကုန်/သွင်းကုန် လိုင်စင်ပိတ်သိမ်းခံရမှုအပေါ် မကျေနပ်လို့ ပဲအရောင်းအဝယ်လုပ်တဲ့ Viber Group ထဲမှာ မြန်မာနိုင်ငံပဲမျိုးစုံ၊ ပြောင်းနှင့် နှမ်းကုန်သည်များအသင်းမှ တာဝန်ရှိသူတွေကို အသက်အန္တရာယ်ခြိမ်းခြောက်တဲ့စာတွေ ရေးသားခဲ့တယ်လို့ ထုတ်ပြန်ပါတယ်။
ဒီနှစ် ဇူလိုင် ၁ ရက်နေ့မှာ ကုမ္ပဏီ ၁၉၇ ခုကို ပို့ကုန်ရငွေ ပြန်မသွင်းလို့ ဆိုပြီး ဗဟိုဘဏ်က အမည်ပျက်စာရင်း သွင်းထားပါတယ်။ ကုမ္ပဏီအပါအဝင် ဒါရိုက်တာအဖွဲ့ဝင်တွေလည်း ပါဝင်တယ်လို့ ဖော်ပြပါတယ်။
စစ်ကောင်စီရဲ့ အဲဒီစာရင်းထဲမှာ ကရင်နယ်ခြားစောင့်တပ် BGF ခေါင်းဆောင် ဗိုလ်မှူးကြီးစောချစ်သူပိုင်တဲ့ ဘားအံမြို့က ချစ်လင်းမြိုင် တိုယိုတာကုမ္ပဏီလည်းပါဝင်တာ တွေ့ရပါတယ်။
စစ်ကောင်စီက ပို့ကုန်တွေကနေ နိုင်ငံခြားငွေ အပြည့်အဝရဖို့ ဆိုပြီး ၂၀၂၃ ခုနှစ်မှာ ပို့ကုန်ရငွေ တွေ မြန်မာဘဏ်တွေထဲ မပျက်မကွက်ထည့်ရမယ့်အမိန့်ကြေညာခဲ့ပါတယ်။
အာရှနိုင်ငံတွေကို တင်ပို့ရင် ရက် ၃၀ အတွင်း၊ အာရှအပ တခြားနိုင်ငံတွေကို တင်ပို့ရင်တော့ ရက် ၆၀ အတွင်း ဘဏ်စာရင်းထဲထည့်ဖို့ နိုင်ငံခြားသုံးငွေ စီမံခန့်ခွဲမှုဥပဒေ ပုဒ်မတွေနဲ့ တင်းကျပ်ခဲ့တာဖြစ်ပါတယ်။
ဗဟိုဘဏ်က ပို့ကုန်ရငွေရဲ့ ၂၅ ရာခိုင်နှုန်းကို မြန်မာကျပ်ငွေ လဲလှယ်ရမယ်လို့ ၂၀၂၄ ခုနှစ်၊ ဩဂုတ်လ မှာ ကြေညာခဲ့ပါတယ်။
ဒါအပြင် ပို့ကုန်ရငွေမသွင်းတဲ့ လုပ်ငန်းရှင်တွေကို နိုင်ငံခြားထွက်ခွာခွင့်ကန့်သတ်ထားတယ်လို့ လုပ်ငန်းရှင်တချို့က ဘီဘီစီကို ဒီနှစ် သြဂုတ်လမှာ ပြောထားပါတယ်။
