ပူတင်ကိုထောက်ခံမလား၊ တားဆီးပိတ်ပင်ခံရတာတွေနဲ့ ရင်ဆိုင်မလား

ယီတလေ ရှက်ချန်ကို

BBC Monitoring

ယူကရိန်းစစ်ပွဲဟာ ရုရှားက အနုပညာအသိုင်းအဝန်းကြား ကွဲပြားမှုတွေ ဖြစ်လာစေပါတယ်။

ရုရှားအစိုးရကို ထောက်ခံတဲ့ အနုပညာရှင်တွေအတွက် အစိုးရရဲ့ထောက်ပံ့ပေးမှုတွေကြောင့် ရပ်တည်ဖို့ မခက်ပေမဲ့ အစိုးရဆန့်ကျင်သူ အနုပညာရှင်တွေအတွက်ကတော့ ဖိအားတွေအောက်မှာ ဆက်လက်ရပ်တည်နိုင်ဖို့ အခက်အခဲတွေနဲ့ ရင်ဆိုင်နေရပါတယ်။

ရုရှားမှာ အစိုးရနဲ့ ဆန့်ကျင်ဘက် အမြင်သဘောထားတွေ ထုတ်ပြောတာက တန်ဖိုးကြီးကြီး ပေးဆပ်ရလေ့ရှိပါတယ်။

အသတ်ခံရတာ၊ ထောင်ချခံရတာ ဒါမှမဟုတ် ပြည်နှင်ဒဏ်ပေးတာတွေ ကြုံလာရနိုင်ပြီး အနုပညာအသိုင်းအဝန်းက လူတစ်ယောက်ယောက်ဖြစ်မယ်ဆိုရင်လည်း အဓိကကျတဲ့ အနုပညာစင်မြင့်တွေနဲ့ အနုပညာဖော်ပြမယ့်နေရာပါ မရှိတော့အောင် တားဆီး ပိတ်ပင်ခံရနိုင်ပါတယ်။

အင်ဒရီ မာကာရီဗစ်ဟာ ဗလာဒီမာပူတင်လုပ်ဆောင်နေတဲ့ ရုရှားအစိုးရမူဝါဒတွေကို ဝေဖန်ပြီး နောက် ကန့်သတ်မှုတွေလုပ်ခံနေရတဲ့ ထင်ရှားကျော်ကြားတဲ့ အနုပညာရှင်တစ်ဦးပါ။

သူဟာ ဆိုဗီယက်ခေတ်မှာ ကျော်ကြားခဲ့တဲ့ Mashina Vremeni (Time Machine) လို့ လူသိများတဲ့ ရော့ခ်ဂီတအဖွဲ့ရဲ့ တီးဝိုင်းခေါင်းဆောင်တစ်ဦး ဖြစ်ပါတယ်။

ဆိုဗီယက်ခေါင်းဆောင် မစ်ခေးလ် ဂေါ်ဘာချော့ဗ်ရဲ့ ကျယ်ပြန့်တဲ့ ပြုပြင်ပြောင်းလဲရေး အစီအစဉ်ကို ရည်ညွှန်းပြီး သူ့ကို “ပယ်ရီစတွိုက်ကာ ဘီးတဲလ်”လို့တောင် တစ်ချိန်က ရုရှားအစိုးရတီဗီမှာ သူ့ကို နာမည်တပ် ခေါ်ဆိုခဲ့ကြဖူးပါတယ်။

ဒါပေမယ့် နောက်ပိုင်းမှာတော့ မာကာရီဗစ် သမ္မတပူတင်ကို ဝေဖန်မှုတွေ တိုးလုပ်လာခဲ့တဲ့အချိန်မှာ တော့ အခြေအနေတွေက ပြောင်းလာပါတယ်။

၂၀၁၄ ခုနှစ် ရုရှားက ယူကရိန်းကို ကနဦးကျူးကျော်မှုဖြစ်ပြီးနောက်ပိုင်း မာကာရီဗစ်က My Country Has Gone Mad ဆိုတဲ့ သီချင်းကို ရေးသားခဲ့ပြီး စစ်ဆန့်ကျင်ရေး ချီတက်ပွဲတွေမှာပါ ပူးပေါင်း ပါဝင်ခဲ့ပါတယ်။

အဲ့ဒီနောက်ပိုင်း သူ့ရဲ့ ရုရှားနိုင်ငံတစ်ဝန်း နယ်လှည့်တေးဂီဖျော်ဖြေပွဲတွေ ဖျက်သိမ်းခံခဲ့ရပြီး ရုရှားအစိုးရ ရုံးစိုက်ရာ ကရင်မလင်နန်းတော်ကို ဆန့်ကျင်တဲ့လှုပ်ရှားမှုတွေ ကြိုးကိုင်နေတဲ့လူလို့ စွပ်စွဲခံခဲ့ရပါတယ်။

၂၀၂၂ ခုနှစ် ဖေဖော်ဝါရီလ ရုရှားက ယူကရိန်းကို အပြည့်အဝ ကျူးကျော်တိုက်ခိုက်မှု စတင်ခဲ့တဲ့ အချိန်မှာတော့ မာကာရီဗစ် စိတ်ပျက်လက်ပျက်နဲ့ ရုရှားကို စွန့်ခွာခဲ့ရပါတယ်။

"လူတွေကို ကြိုးကိုင်ခြယ်လှယ်ဖို့ ပိုလွယ်လာတယ်။ ပိုပညာမဲ့ စဥ်စားဉာဏ်မဲ့ လာကြသလို ပိုလည်း ရန်လိုလာကြတယ်" လို့ တွေ့ဆုံ မေးမြန်းခန်းတစ်ခုမှာ သူက ပြောခဲ့ပါတယ်။

သူနဲ့ဆန့်ကျင်ဘက် အခြမ်းမှာရပ်တည်နေတဲ့ ရုရှားအစိုးရ ထောက်ခံသူ နီကိုလိုင် ရက်စတာဂူရက်တို့လို လူတွေကတော့ အပြည့်အဝပံ့ပိုးမှုတွေ ရနေပါတယ်။

သူဟာ "ပူတင် အကြိုက်ဆုံးတီးဝိုင်း" အဖြစ်မကြာခဏဖော်ပြခံရတဲ့ Lyube တီးဝိုင်း ခေါင်းဆောင် အဆိုတော်တစ်ဦးဖြစ်သလို ယူကရိန်းကို ကျူးကျော်တိုက်ခိုက်တဲ့ "အထူးစစ်ဆင်ရေး" အပါအဝင် ရုရှားအစိုးရဲ့ မူဝါဒတွေကို ထောက်ခံနေသူတစ်ယောက် ဖြစ်ပါတယ်။

ရုရှားအစိုးရမူဝါဒတွေကို သူ့ရဲ့ ထောက်ခံအားပေးမှုကြောင့် ရက်စတာဂူရက်ဟာ မာကာရီဗစ်လို ချောင်ထိုးမခံရဘဲ ရုရှားနိုင်ငံက အကောင်းဆုံးနေရာတွေမှာ နှစ်ပေါင်းများစွာ အလွယ်တကူ ဖျော်ဖြေခွင့် ရနေပါတယ်။

မော်စကိုမြို့ ငြိမ်းချမ်းရေးချီတက်ပွဲအပြီး ယူကရိန်းဆန့်ကျင်ရေး တက်ကြွလှုပ်ရှားသူတွေရဲ့ ကိုယ် ထိလက်ရောက် တိုက်ခိုက်မှုခံရမှုနဲ့ မာကာရီဗစ်ကြုံခဲ့ရတဲ့ ၂၀၁၄ ခုနှစ် မတ်လ ၁၅ရက်နေ့မှာ ရက်စတာဂူရက်ရဲ့ Lyube တီးဝိုင်းဟာ မြို့တော်မော်စကိုက အိုလံပစ် အားကစားကွင်းထဲမှာ သူတို့တီးဝိုင်း ၂၅ နှစ်မြောက် နှစ်ပတ်လည်နေ့ အောင်ပွဲခံ ကျင်းပခွင့်ရခဲ့ပါတယ်။

နောက်တစ်နေ့မှာလည်း သူ့ရဲ့တီးဝိုင်းက ခရိုင်းမီးယားမှာ နိုင်ငံတကာက အသိအမှတ်မပြုတဲ့ ရုရှား ရဲ့သိမ်းပိုက်မှုကိုထောက်ခံတဲ့ ဂီတဖျော်ဖြပွဲတစ်ခုကို ရုရှားအစိုးရအတွက် ပြုလုပ်ပေးခဲ့ပါတယ်။

ရက်စတာဂူရက်နဲ့ သူ့တီးဝိုင်းက သမ္မတပူတင်တက်ရောက်ခဲ့တဲ့ ရုရှားနိုင်ငံရဲ့ အကြီးဆုံး အားက စားကွင်း Luzhnikiမှာကျင်းပတဲ့ ရုရှားအစိုးရကစီစဥ်တဲ့ လူထုစုဝေးပွဲမှာလည်း တီးမှုတ် ဖျော်ဖြေ ပေးခဲ့ပါတယ်။

ပြီးတော့ ရုရှားက အင်အားသုံးသိမ်းပိုက်ထားတဲ့ ခရိုင်းမီးယားနဲ့ ရုရှားနယ်မြေကို ချိတ်ဆက်ထားတဲ့ တံတားတစ်ခုကို ဂုဏ်ပြုသီဆိုတဲ့ သီချင်းတစ်ပုဒ်ကိုလည်း သူက ရေးသားပေးခဲ့ပါတယ်။

သူတို့တီးဝိုင်းက ရုရှားမှာ ဘယ်လောက်တောင် သြဇာလွှမ်းမိုးမှုရှိလဲဆိုရင် ရဲက သူတို့နဲ့ နိုင်ငံရေး ဆန့်ကျင်ဘက်လူတွေကို မော်စကိုမြို့ ဘားတစ်ခုမှာ ဝင်ရောက်ရှာဖွေတဲ့အချိန် ရုရှားအစိုးရ ထောက်ခံတဲ့သူဟုတ်မဟုတ် သိနိုင်ဖို့ Lyubeတီးဝိုင်းအဖွဲ့ရဲ့ သီချင်းတစ်ပုဒ်ကို ဆိုခိုင်းခဲ့ပါတယ်။

နီကိုလိုင် ရက်စတာဂူရက်ကို ရုရှားအစိုးရရဲ့ မဟုတ်မမှန်သတင်းတွေနဲ့ သတင်းအချက် အလက် မှားတွေ ဖြန့်ချိမှုနဲ့ ဥရောပသမဂ္ဂက ဒဏ်ခတ်ပိတ်ဆို့ အရေးယူထားပါတယ်။

ရုရှားမှာ မာကာရီဗစ်တို့လို ရုရှားအစိုးရကို ဝေဖန်တဲ့ အနုပညာရှင်အများစုဟာ "ပြည်ပအားကိုး ပုဆိန်ရိုးတွေ"အဖြစ် တရားဝင်သတ်မှတ် တံဆိပ်ကပ်ခံနေရပါတယ်။

ရုပ်ရှင်နဲ့ ပြဇာတ်

ရုပ်ရှင်နှင့် ပြဇာတ် ကြယ်ပွင့်တွေကြားမှာလည်း ကွဲပြားမှုတွေ နက်နက်ရှိုင်းရှိုင်း ရှိနေပါတယ်။

နီကီတာ မစ်ခေးလ်ကော့ဗ်ဟာ ရုရှားနိုင်ငံထဲက အကျော်ကြားဆုံး သရုပ်ဆောင်တွေနဲ့ ရုပ်ရှင်ဒါရိုက်တာတွေထဲကတစ်ဦး ဖြစ်ပါတယ်။

သူရဲ့ အနုပညာ သက်တမ်းတစ်လျှောက် အောင်မြင်မှုအများဆုံးရခဲ့တဲ့ ရုပ်ရှင်က ၁၉၉၄ ခုနှစ်မှာ ထုတ်လွှင့်ပြသခဲ့တဲ့ အော်စကာဆုရ ဒရာမာဇာတ်ကား Burnt By The Sun ဖြစ်ပါတယ်။ အဲ့ဒီရုပ် ရှင်မှာ သူကိုယ်တိုင် ဒါရိုက်တာလုပ်ပြီး သရုပ်ဆောင်အနေနဲ့ပါ ပါဝင် သရုပ်ဆောင်ထားပါတယ်။

အဲ့ဒီရုပ်ရှင်က ဆိုဗီယက်ခေါင်းဆောင် စတာလင်လက်ထက် ဆိုဗီယက်ပြည်ထောင်စုခေတ်မှာ ကြောက်လန့်တကြားနေခဲ့ရတဲ့ လူတွေရဲ့ ဘဝတွေကို သရုပ်ဖော်ရိုက်ကူးထားတာပါ။

မစ်ခေးလ်ကော့ဗ်ရဲ့ နိုင်ငံရေးအမြင်တွေက ရုရှားအစိုးရရုံးစိုက်ရာ ကရင်မလင်နန်းတော်က တရားဝင် နိုင်ငံရေးအယူဝါဒနဲ့ အလွန်နီးနီးစပ် သွားတူနေပါတယ်။ သူဟာ ဘာသာရေးမှာလည်း ရှေးရိုးစွဲဝါဒီတစ်ဦးဖြစ်သလို အနောက်တိုင်းဆန့်ကျင်ရေး အမြင်တွေလည်း လွန်လွန်ကဲကဲ လက်ခံထားသူ ဖြစ်ပါတယ်။

ရုရှားအစိုးရပိုင် ရုပ်မြင်သံကြားက ထုတ်လွှင့်တဲ့ Besogon (Exorcist) ဗီဒီယိုထဲမှာဆို အနောက်တိုင်းရဲ့ ပူးပေါင်းကြံစည်မှု သီအိုရီတွေ ထည့်သွင်းရိုက်ကူးထားပြီး အဲဒီဗီဒီယိုကို အားပေးကြည့်ရှုတဲ့ အမာခံပရိတ်သတ်တွေထဲမှာ သမ္မတပူတင်လည်း ထိပ်ဆုံးက ပါဝင်ပါတယ်။

မစ်ခေးလ်ကော့ဗ်ဟာ ရုရှားသမ္မတ ဗလာဒီမာပူတင်ကို ထောက်ခံအားပေးသူပါ။

၂၀၀၇ ခုနှစ်တုန်းကလည်း ဖွဲ့စည်းပုံအခြေခံဥပဒေကို ချိုးဖောက်ပြီး တတိယသမ္မတသက်တမ်းကို ရယူဖို့ ရုရှားသမ္မတပူတင်ကို တောင်းဆိုတဲ့ အိတ်ဖွင့်ပေးစာတစ်စောင်ကို ပူးတွဲရေးသားခဲ့ပါတယ်။

အဲ့ဒီတစ်နှစ်ထဲမှာပဲ မစ်ခေးလ်ကော့ဗ်ရိုက်ကူးခဲ့တဲ့ ပူတင်ရဲ့ ၅၅ နှစ်မြောက် မွေးနေ့ ဂုဏ်ပြု ရုပ်ရှင် တစ်ကားကို ရုရှားနိုင်ငံပိုင် တီဗီမှာ ပြသခဲ့ပါတယ်။

ရုပ်ရှင်ဒါရိုက်တာ မစ်ခေးလ်ကော့ဗ်ဟာ ရုရှားနိုင်ငံ ရုပ်ရှင်ထုတ်လုပ်သူများသမဂ္ဂကို ၁၉၉၇ ခုနှစ် ကတည်းက ဦးဆောင်ခဲ့ပြီး "အမိမြေ ယဉ်ကျေးမှုနဲ့ အနုပညာကို ဖော်ဆောင်ခြင်း" အတွက် ကာ ကွယ်ရေးဝန်ကြီးဌာနပေးအပ်တဲ့ဆုကို ရရှိခဲ့တဲ့အပြင် ရုရှားအစိုးရရဲ့ ငွေကြေး ထောက်ပံ့ မှုတွေပါ ရရှိခဲ့ပါတယ်။ Burnt By The Sunရုပ်ရှင်အတွက် ရုရှားအစိုးရက သူ့ကို အမေရိကန်ဒေါ်လာ ၂သန်း ထောက်ပံ့ခဲ့ပါတယ်။

ရုရှားက ယူကရိန်းကို အပြည့်အဝ ကျူးကျော်တိုက်ခိုက်ခဲ့တဲ့ ၂၀၂၂ခုနှစ် စစ်ပွဲကိုလည်း သူက ထောက်ခံခဲ့ပြီး ယူကရိန်းမှာ နာဇီအစိုးရအုပ်ချုပ်နေတယ်လို့ ပူတင်ကပြောတဲ့ စကားကိုလည်း နောက်ယောင်လိုက်ပြောခဲ့သူပါ။ ပြီးတော့ ယူကရိန်းဘာသာစကားက ရုရှားအပေါ် မုန်းတီးမှုရဲ့ သရုပ်သဏ္ဍာန်တစ်ခုဖြစ်တယ်လို့လည်း သူက ဆိုပါတယ်။

ယူကရိန်း ကျူးကျော်စစ်ပွဲ စတင်ပြီးလပိုင်းအကြာမှာ ဗလာဒီမီယာပူတင်က ကရင်မလင်နန်း တော်ထဲမှာ အခမ်းအနားတစ်ခုနဲ့ မစ်ခေးလ်ကော့ဗ်ကို တိုင်းပြည်စီးပွားရေးနဲ့ ယဥ်ကျေးမှု နယ်ပယ်မှာ စွမ်းစွမ်းတမံလုပ်ဆောင်ခဲ့သူတွေကိုချီးမြှင့်တဲ့ "အလုပ် သမားသူရဲကောင်း" ဘွဲ့ချီးမြှင့်ခဲ့ပါတယ်။

အဲ့ဒီဆုပေးပွဲမှာ မစ်ခေးလ်ကော့ဗ်က ယူကရိန်းစစ်ပွဲနဲ့ ရုရှားနိုင်ငံတော်သစ်တည်ဆောက်နေတာကို ရည်ညွှန်းပြီး သမ္မတပူတင်ကို ကျေးဇူးတင်စကားဆိုခဲ့ပါတယ်၊။

ရုရှားအစိုးရရဲ့ မူဝါဒတွေ ဖြန့်ချိရာမှာ အဓိက အခန်းကဏ္ဍက ပါဝင်နေတဲ့ မစ်ခေးလ်ကော့ဗ်ကို ဥရောပသမဂ္ဂက ပိတ်ဆိုးအရေးယူမှုတွေချမှတ်ခဲ့ပါတယ်။

မတူကွဲပြားတဲ့ နိုင်ငံရေးအမြင်တွေရှိတဲ့ မင်းသမီး လီယာ အာခက်ဇာကိုဗာရဲ့ အနုပညာ အသက်မွေး ဝမ်းကျောင်းမှုကတော့ ရုရှားအစိုးရရဲ့ ဆန့်ကျင်မှုတွေနဲ့ ကြုံနေရပါတယ်။

သူဟာ The Irony of Fate နဲ့ Office Romance ဆိုတဲ့ ဆိုဗီဒီယက်ခေတ် ရုပ်ရှင်တွေမှာ ပါဝင် သရုပ်ဆောင်ပြီး ၁၉၇၀ နှစ်တွေမှာ နာမည်ကျော်ကြားလာခဲ့သလို မော်စကိုမြို့ရဲ့ အကောင်း ဆုံး ပြဇာတ်ရုံတစ်ခုဖြစ်တဲ့ Sovremennikက သူရဲ့ တင်ဆက်မှုတွေကြောင့်လည်း လူသိ များလာခဲ့ပါတယ်။

ဆိုဗီယက်ပြည်ထောင်စု ပြိုကွဲပြီးကတည်းက မင်းသမီးလီယာဟာ သူ့ရဲ့ နိုင်ငံရေးအမြင်တွေကို လူသိရှင်ကြား ထုတ်ပြောခဲ့သလို ရုရှားအစိုးရရဲ့ မူဝါဒတွေကိုလည်း မကြာခဏ ပြင်းပြင်းထန်ထန် ဝေဖန်လေ့ရှိပါတယ်။

ရုရှားက ယူကရိန်းကို ကျူးကျော်တိုက်ခိုက်တာကို ထောက်ခံခဲ့တဲ့ ရုရှားလိုလားသူ ယူကရိန်းသမ္မတ ဗစ်တာယာနူကိုဗစ် ပြုတ်ကျသွားတဲ့အထိအောင် ဖြစ်ခဲ့တဲ့ Euromaidanလို့ ခေါ်တဲ့ ဆန္ဒပြပွဲ တွေကိုလည်း ၂၀၁၄ ခုနှစ် မော်စကိုမြို့ လူထုချီတက်ပွဲတစ်ခုမှာ လီယာက ချီးကျူး စကားပြော ခဲ့ပါတယ်။

ယူကရိန်းမြို့တော်မှာ အသတ်ခံခဲ့ရတဲ့ ဒီမိုကရေစီလိုလားတဲ့ ဆန္ဒပြသူတွေကို ဂုဏ်ပြုတဲ့အနေနဲ့ လက်ခုပ်သြဘာတွေပေးဖို့၊ ကြွေးကြော်သံတွေတိုင်ဖို့ ဆန္ဒပြလူအုပ်ကြီးကို လီယာ အာခက်ဇာကိုဗာ က တိုက်တွန်းခဲ့ ပါတယ်။

အဲ့ဒီအချိန်ကနေ ရှစ်နှစ်ကြာပြီးနောက် သမ္မတပူတင်က ယူကရိန်းကို အပြည့်အ၀ ကျူးကျော် တိုက်ခိုက်တဲ့အချိန်ရောက်လာတော့ ရုရှားနိုင်ငံထဲမှာ အဲဒီလိုဆန္ဒပြပွဲတွေ ထပ်လုပ်ဖို့ စိတ်ကူးယဉ်လို့မရအောင်အထိ အခြေအနေက ဖြစ်သွားပါတယ်။

ရုရှားက ယူကရိန်းကို ကျူးကျော်တိုက်ခိုက်တဲ့နေ့မှာ လွတ်လပ်တဲ့ သတင်းဌာနတစ်ခုဖြစ်တဲ့ Dozhd တီဗီကနေ အဲဒီလုပ်ရပ်ကို ဆန့်ကျင်ကြဖို့ နာမည်ကြီး အနုပညာရှင်တွေနဲ့ သူ့မိတ်ဆွေ ဖျော်ဖြေတင်ဆက်တဲ့သူတွေကို လီယာ အာခက်ဇာကိုဗာက တိုက်တွန်းခဲ့ပါတယ်။

"ဒီအချိန်ဟာ ထွက်ပြောကြဖို့ အချိန်တန်ပြီလို့ အနုပညာနယ်ပယ်က လူတွေအားလုံးကို ကျွန်မ တောင်းဆိုတိုက်တွန်းချင်ပါတယ်။ အခုထွက်မပြောရင် နောက်ထပ်ထွက်ပြောဖို့ အခွင့်အရေးရတော့မှာ မဟုတ်ဘူး။ စစ်ဖြစ်နေပြီ၊လိမ်လည်မုသား ပြောတာတွေ အများကြီး ပြောတာတွေနဲ့ ကြုံနေရတယ်။ မုသားတွေက ပင်လယ်ကြီးတစ်ခုလိုတောင် ဖြစ်နေပြီ” လို့ သူက ပြောခဲ့ပါတယ်။

အဲ့ဒီလိုပြောပြီး ရက်သတ္တပတ်မပြည့်ချင်အချိန်မှာပဲ Dozhdသတင်းဌာန ဆင်ဆာ တင်းကျပ်မှု တွေနဲ့ရင်ဆိုင်ရသလို သူတို့သတင်းဌာနက ဝန်ထမ်းတွေရဲ့ လုံခြုံရေးကို စိုးရိမ်ပြီး နိုင်ငံရပ်ခြားကို ပြောင်းရွှေ့ အခြေချခဲ့ရပါတယ်။

တစ်နှစ်ကြာလာတဲ့အချိန်မှာတော့ Sovremennik ပြဇတ်ရုံမှာ ၄၅ နှစ်ကြာ သူ တင်ဆက်ခဲ့တဲ့ လီယာရဲ့ အနုပညာတင်ဆက်မှုတွေပါ ပိတ်ပင်ခံခဲ့ရပါတယ်။

သူ့ရဲ့ပြဇာတ်ဟာ ဆိုဗီယက်ခေတ်နိုင်ငံတော်က ကြိုးကိုင်တဲ့ နှိပ်စက်မှုတွေကို အောက်မေ့သတိရအောင် လုပ်တဲ့ ကန်ပိန်းတစ်ခုလိုဖြစ်နေပြီး သူ့ကိုဝေဖန်တိုက်ခိုက်တဲ့ တိုင်စာတွေလည်း အများကြီး သူတို့လက်ခံရရှိထားတယ်လို့ ပြဇာတ်ရုံမှာ အသစ်ခန့်အပ်လိုက်တဲ့ ဒါရိုက်တာက အကြောင်းပြပြီး သူ့ကိုခေါ် ပြောတယ်လို့ မင်းသမီး လီယာ အပြောအရ သိရပါတယ်။

စတာလင်ဝါဒရဲ့ အခြားပဲ့တင်သံတစ်ခုအနေနဲ့ ရုရှားအစိုးရလိုလားတဲ့ တက်ကြွလှုပ်ရှားသူ တစ် ဦးကလည်း လီယာဟာ နိုင်ငံတော်သစ္စာဖောက်မှုကိုကျူးလွန်ပြီး အပြစ်ရှိတဲ့အတွက် ရုံးတင် စစ်ဆေးအရေးယူပေးဖို့ အစိုးရရှေ့နေတွေကို မကြာမီကပဲ တောင်းဆိုထားပါတယ်။