မြန်မာနိုင်ငံမှာ ကိုဗစ် ၁၉ အတည်ပြု လူနာသစ်တွေ့ရှိမှု နည်းလာတာဘာကြောင့်လဲ

မြန်မာနိုင်ငံမှာ ကိုဗစ် ၁၉ အတည်ပြုလူနာ လူနာသစ်တွေ့ရှိရမှု အခုရက်ပိုင်း လျော့နည်းလာတဲ့ အကြောင်းအရင်းတွေနဲ့ပတ်သက်လို့ ကျန်းမာရေးနဲ့ အားကစားဝန်ကြီး က သူ့ရဲ့ တွေ့ရှိချက်တွေကို မေလ ၃ရက်နေ့က ထုတ်ပြန်လိုက်ပါတယ် ။

အဲဒီအထဲမှာ မြန်မာနိုင်ငံမှာ ဓာတ်ခွဲအတည်ပြုလူနာတွေနဲ့ အနီးကပ်ထိတွေ့သူ တွေကို စောစီးစွာရှာဖွေ ဖော်ထုတ် အသွားအလာကန့်သတ်ထားကာ ဓာတ်ခွဲနမူနာတွေ ရယူစစ်ဆေး နိုင်ခဲ့တာတွေနဲ့ သံသယရောဂါလက္ခဏာရှိသူတွေကို စောင့်ကြည့်လူနာတွေအဖြစ် သတ်မှတ် ဓာတ်ခွဲ နမူနာ ရယူစစ်ဆေးနိုင်ခဲ့တာတွေ ဟာ လူနာသစ်တွေ့ရှိရမှု အခုရက်ပိုင်း လျော့နည်းလာတဲ့ အကြောင်းရင်းမှာပါဝင်တယ်လို့လည်း သူကပြောပါတယ်။

ဒါ့အပြင် ပြည်ပနိုင်ငံတွေက ခရီးသည်ဝင်ထွက်ကို လျှော့ချကန့်သတ်နိုင်တာ ၊လူစုလူဝေးတွေလုပ်တာကို တားမြစ်ထားတာ ၊ ပြည်သူ တွေ မိမိအိမ်အတွင် (stay at home)နေထိုင်တာ ၊ တစ်ဦး နဲ့ တစ်ဦး(social distancing)နဲ့ ထိတွေ့မှုနည်းပါးအောင် နေထိုင်တာ ၊ လက်ကို မကြာခဏစနစ်တကျဆေး တာ ၊ပြင်ပကိုသွားလာရာမှာ ပါးစပ်နှင့်နှာခေါင်းစည်း တပ်ဆင်မှု များပြားလာတာတွေကြောင့်ဖြစ်တယ်လို့လည်း သူကပြောပါတယ်။

မြန်မာနိုင်ငံ ကျန်းမာရေးနဲ့ အားကစားဝန်ကြီးဌာန ပြည်သူ့ကျန်းမာရေးဦးစီးဌာန က မေလ ၂ရက်နေ့အထိတရားဝင် ထုတ်ပြန်တဲ့ စာရင်းတွေအရ မြန်မာတစ်နိုင်ငံလုံး လူပေါင်း၈၂၄၀ ကို ကိုဗစ် ၁၉ ရောဂါ ရှိမရှိ စစ်ဆေးခဲ့ပြီးတော့ ၁၅၁ ဦးမှာ ရောဂါပိုးတွေ့ရှိထားတယ်လို့ထုတ်ပြန်ထားပြီး မေလ ၃ ရက်နေ့ ညမှာတော့ ၄ ဦးထပ်တွေ့လို့ ပိုးတွေ့သူစုစုပေါင်း ၁၅၅ ဦးရှိလာပြီဖြစ်ပါတယ်။

ကျန်းမာရေးဝန်ကြီးဌာန ပြည်သူ့ကျန်းမာရေးဦးစီးဌာန ကတော့ ၊အသွားအလာ ကန့်သတ့်တဲ့ နေရာပေါင်း ၈၄၀၀ကျော်မှာ လူပေါင်း လေးသောင်းနှစ်ထောင်ကျော်ကို အသွားအလာ ကန့်သတ်ထားတယ် လို့လည်း ထုတ်ပြန်ထားပါတယ် ။

ဒါပေမယ့် ရောဂါပိုးမရှိသူတွေ ရက်ဆက်ဖြစ်လာတဲ့ နောက်ပိုင်းမှာ တော့ ရန်ကုန်အပါအဝင် နယ်မြို့တွေမှာ လူတွေ အပြင်ထွက် သွားလာမှုတွေပိုများလာတာကိုတွေ့ရတယ်လို့ ဒေသခံတွေဆီက နေ သတင်းရပါတယ်။

"ဈေးတွေမှာ လူတွေက နှာခေါင်းစည်းတွေ ကို မေးစေ့နဲ့ခေါင်း ပေါ်မှာ တပ်ကြတယ်" နှာခေါင်းနဲ့ ပါးစပ်ကို မကာကြဘူးလို့လည်း ရွှေပြည်သာမြို့နယ် ကဒေသခံတစ်ဦးကပြောပါတယ်။

ရောဂါပိုးတွေ့သူတွေရှိတဲ့ ရွှေပြည်သာမြို့နယ်မှာလည်း ဧပြီလ ကုန်ကစလို့ လဘက်ရည်ဆိုင်တွေ ဖွင့်တဲ့အပြင်ညပိုင်းမှာ ဘီယာဆိုင်တွေ လည်း ဖွင့်ကြတဲ့ အကြောင်း ဒေသခံတစ်ဦး ကပြောပါတယ်။

တောင်ငူမှာ လည်း နေ့စဉ်ဖွင့်တဲ့ပျံကျဈေးတွေမှာ လူတွေဟာ ခပ်ခွာခွာမနေကြ ဘဲ စုပြုံတိုးဈေးဝယ်နေကြတယ်လို့လည်းဒေသခံတစ်ဦး ကပြောပါတယ်။

ကိုရိုနာဗိုင်းရပ်စ် နဲပတ်သက်ပြီး နိုင်ငံတွေအလိုက်ဆေးစစ်ထားတဲ့သူတွေအရေအတွက်ကိုထုတ်ပြန်တဲ့ worldmeter မှာတော့ မြန်မာနိုင်ငံ လူဦးရေနဲ့ နိုင်းယှာဉ်ရင် ဆေးစစ်ထားတဲ့ လူအရေအတွက် မေလ ၃ရက်နေ့အထိ ဟာ လူတစ်သန်းမှာ ၁၅၅ ဦးပဲရှိတာကိုတွေ့ရပါတယ်။

ဘရူနိုင်း က လူတစ်သန်းမှာ ၃၁,၈၂၈ ယောက်၊ကမ္ဘောဒီးယားက လူတစ်သန်းမှာ ၇၃၆ ယောက်

လာအိုက လူတစ်သန်းမှာ ၃၀၀ ၊ဖိလစ်ပိုင်က လူတစ်သန်းမှာ ၁,၀၅၂ ၊စင်္ကာပူက လူတစ်သန်းမှာ ၂၄,၆၀၀ ယောက် ထိုင်းက လူတစ်သန်းမှာ ၂,၅၅၁ ယောက် ၊ဗီယက်နမ်က လူတစ်သန်းမှာ ၂,၆၈၁ ယောက်မလေးရှား က လူတစ်သန်းမှာ ၆,၀၅၁ ယောက်အင်ဒိုနီးရှားက လူတစ်သန်းမှာ ၄၁၃ ယောက် ရှိကြပါတယ်။

မေလ ၃ရက်နေ့၊ ည ၈ နာရီအထိ မြန်မာနိုင်ငံမှာ ကိုဗစ်-၁၉ ရောဂါ ဓာတ်ခွဲ အတည်ပြုလူနာ ၄ဦးထပ်တွေ့ပြီး တစ်နိုင်ငံလုံးဓာတ်ခွဲစစ်ဆေးမှု ၈၀၀၀ ကျော် မှာ ဓာတ်ခွဲ အတည်ပြုလူနာ(၁၅၅) ဦး အထိ ရှိလာပြီဖြစ်ပါ တယ်။

အိမ်နီးချင်း နိုင်ငံတွေနဲ့ ယှဉ်ကြည့် ရင်တော့ မြန်မာနိုင်ငံ ကကိုဗစ်-၁၉ ရောဂါ ဓာတ်ခွဲ စစ်ထားတာအရေအတွက်က ကျန်တဲ့ နိုင်ငံတွေ အားလုံးထက် နည်းတာကိုလည်း တွေ့ရပါ တယ်။ပြည်သူလူထုအတွင်းမှာ ရောဂါပိုးကူးစက်ခံထားရပေမယ့်လည်း ရောဂါလက္ခဏာမပြသူတွ သို့မဟုတ် သာမာန်ရောဂါလက္ခဏာများသာရှိသူတွေဟာ ဆေးရုံ၊ဆေးခန်း၊ ကျန်းမာရေးဌာန တွေကို လာရောက်ပြသမှုမရှိတာတွေလည်းရှိနေနိုင် တယ်လို့လည်း ကျန်းမာရေးနဲ့ အားကစားဝန်ကြီး ကပြောပါတယ်။

အဲဒီလို လာရောက်ပြသမှုမရှိတဲ့ လူနာတွေကို စောင့်ကြည့်လူနာနဲ့ သံသယလူနာတွေအဖြစ် သတ်မှတ်ပြီး၊ ဓာတ်ခွဲစစ်ဆေးမှု မပြုလုပ်နိုင် တာနဲ့၊ ဓာတ်ခွဲစစ်ဆေးမှုအရေအတွက် နည်းပါးနေသေးတာတွေဟာ ကိုဗစိ- ၁၉ ဓာတ်ခွဲအတည်ပြုလူနာသစ်တွေ့ရှိရမှု လတ်တလောနည်းပါးနေခြင်းလည်း ဖြစ်နိုင် တယ်လို့သူကပြောပါတယ်။

ဒါအပြင်မြန်မာနိုင်ငံက ကိုဗစ်-၁၉ အတည်ပြုလူနာတွေအနက် ၅၈ ရာခိုင်နှုန်းဟာ ရောဂါလက္ခဏာမပြသူတွေဖြစ်တယ်လို့ ကျန်းမာရေးနဲ့အားကစားဝန်ကြီး ကထုတ်ပြန်ချက်မှာပြောခဲ့ပါတယ်။

ဒါကြောင့် အသွားအလာ ကန့်သတ်စောင့်ကြည့်ခံရသူတွေ၊ ပြည်သူတွေအနေနဲ့ ဆောင်ရန်ရှောင်ရန်တွေကို သေချာလိုက်နာ မှသာ ရောဂါကူးစက်ပျံ့ပွားမှုကို ထိန်းချုပ်နိုင်မယ်လို့ လည်းဆိုပါတယ်။

မြန်မာနိုင်ငံက ကိုဗစ်၁၉ အတည်ပြုလူနာ ၁၅၀ ကျော်ရဲ့ ရောဂါလက္ခဏာတွေကိုခွဲခြမ်းစိတ်ဖြာမှုအရ အန်တာ၊ ဝမ်းလျှောတာနဲ့ ဗိုက်အောင့်တာ၊ အနံအရသာမရတော့တာ ဆိုတဲ့ အချက်တွေကို ရောဂါလက္ခဏာအဖြစ် ထပ်ထည့်ထားတာကို ဧပြီ ၂၅ ရက် အစီရင်ခံစာက စတင်ပြီး ဖော်ပြထားတာတွေ့ရပါတယ်။

ချောင်းဆိုး၊နှာချေ၊ လည်ချောင်းနာ အသက်ရှူကြပ်၊ ကိုယ်ပူ စတဲ့ ကိုဗစ်ရဲ့ ကနဦး လက္ခဏာတွေ တခြားလက္ခဏာတွေခံစားရတဲ့ ကိုဗစ်ကူးစက်လူနာသစ်တွေထပ်တွေ့လာရတယ်လို့ အပူပိုင်းနဲ့ ကူးစက်ရောဂါဌာန ပါမောက္ခဒေါက်တာမိုးမိုးစမ်းက နိုင်ငံတော်အတိုင်ပင်ခံပုဂ္ဂိုလ်နဲ့ အွန်လိုင်းဆွေးနွေးခန်းမှာ ပြောကြားခဲ့ပါတယ်။

ရန်ကုန်တိုင်း အချို့မြို့နယ် တွေကို "stay at home" မိမိအိမ် မှာ မိမိနေကြ ဖို့အမိန့် ကိုထုတ်ပြန် ခဲ့တာ (၂)ပတ်ရှိသွားပါပြီ။

ဒီကြားထဲမှာ နောက်ထပ် stay at home သတ်မှတ်ရတဲ့ မြို့နယ်တွေလည်း ပေါ်လာ ခဲ့ပါတယ်။

"ဒီ တစ်ရက်၊ နှစ်ရက်အတွင်း ကိုဗစ် ၁၉ ငြိမ်နေလို့ မပေါ့ ပါနဲ့။ လုံးဝ စိတ်ချရတဲ့အခြေအနေကဝေးပါသေးတယ်"လို့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် က သတိပေးခဲ့ပါတယ်။

ဒါအပြင် အခုရက်ပိုင်း ရောဂါဖြစ်ပွားမှုများပြားတဲ့ နိုင်ငံတွေဖြစ်တဲ့ စင်ကာပူ၊ ဂျပန်နှင့် ကိုရီးယား သမ္မတနိုင်ငံစတဲ့ နိုင်ငတွေက မြန်မာနိုင်ငံသား တွေဟာ ပြည်တွင်းသို့ ပြန်လည်ဝင်ရောက် လာနေကြပြီလည်းဖြစ်ပါတယ်။

ထိုင်းနိုင်ငံ မှာ အလုပ်လုပ်ကိုင်နေ တဲ့ မြန်မာနိုင်ငံသား တွေဆို ရင် တစ်သိန်းလောက်အထိပြန်ဝင်လာမယ်လို့လည်း ဒေါ်အောင်ဆန်းစုကြည်က ပြောထားခဲ့ပါတယ်။

ပြီးခဲ့တဲ့ရက်ပိုင်း ပိတ်ထားတဲ့ စက်ရုံ၊ အလုပ်ရုံတွေ ပြန်လည်ဖွင့်လှစ်တာလည်းရှိနေတာကြောင့် ရောဂါကူးစက်ပြန့်ပွားမှုများ များပြားလာနိုင်တယ်လို့လည်းဝန်ကြီးက သတိပေးထားပါတယ်။ဒါကြောင့် ရောဂါကူးစက်သူအရေအတွက် လျော့နည်းလာပေမယ့်လည်း တတ်နိုင်သမျှ မိမိတို့နေအိမ်အတွင်း၌သာ နေထိုင် ဖို့၊ တစ်ဦး နဲ့ တစ်ဦး ခပ်ခွာခွာ နေထိုင်ကြဖို့ နှင့် လက်ကို မကြာခဏ စနစ်တကျဆေး ဖို့ ဖျားနာခြင်း၊ ချောင်းဆိုးခြင်းစ တဲ့ရောဂါလက္ခဏာတွေတွေ့ရှိပါက အနီးဆုံးကျန်းမာရေးဌာနတွင်ပြသ ဖို့စတာတွေကို ကျန်းမာရေးနှင့်အားကစားဝန်ကြီး ကတိုက်တွန်းခဲ့ပါတယ်။