မင်းပြားမြို့နယ် တိုက်ပွဲအတွင်း ကျေးရွာအုပ်ချုပ်ရေးမှူး သေဆုံးမှု ကွဲလွဲမှုတွေရှိနေ

တပ်မတော်နဲ့ ရက္ခိုင့်တပ်တော် အေအေတို့အကြား တိုက်ပွဲတွေအပြင်းအထန်ဖြစ်ပွားနေတဲ့ မင်းပြားမြို့နယ် စိတ္တရကျေးရွာမှာ ဒီဇင်ဘာ ၁၁ ရက်နေ့ ည ၁၁ နရီခွဲကျော်အချိန်မှာ ပစ်ခတ်မှုတစ်ခုဖြစ်ပွားခဲ့ပြီး ကျေးရွာအုပ်ချုပ်ရေးမှူးနဲ့ အမျိုးသမီးတစ်ဦးသေဆုံးသွားခဲ့ပါတယ်။

ဒီဇင်ဘာ ၁၁ ရက်နေ့ ည ပိုင်း တပ်မတော်စစ်ကြောင်း စိတ္တရကျေးရွာအတွင်း ဝင်ရောက်လာစဉ်မှာ အသက် ၄၂ နှစ်အရွယ် ကျေးရွာအုပ်ချုပ်ရေးမှူး ဦးညာဏ်သိန်းနေအိမ်အနောက်ဘက်မှာ ဖုန်းပြောနေစဉ် အုပ်ချုပ်ရေးမှူးကို အပစ်ခံရ တယ်လို့မျက်မြင်ကျေးရွာသားတစ်ဦးက ပြောပါတယ်။

ဒီဇင်ဘာလ ၁၃ ရက်နေ့ ရာမောင်းတံတားအနီး နယ်မြေလုံခြုံရေး ဆောင်ရွက်နေတဲ့ တပ်မတော်စစ်ကြောင်း စိတ္တရကျေးရွာအနီး အရောက်မှာ ကျေးရွာအတွင်းနေအိမ်တစ်လုံးပေါ်က အေအေ က လက်နက်ငယ်နဲ့စတင်ပစ်ခတ် တိုက်ခိုက်လို့ ပြန်လည်ပစ်ခတ် တိုက်ခိုက်ခဲ့ရာတာရှိတယ်လို့ တပ်မတော် က ထုတ်ပြန်ထားပါတယ်။

တပ်မတော်က အရာရှိတစ်ဦး လက်နက်ငယ်ကျည် ထိမှန်ဒဏ်ရာရရှိခဲ့သလို တပ်မတော်စစ်ကြောင်းကို စတင်ပစ်ခတ်ခဲ့ တဲ့နေအိမ်ကို ဝင်ရောက်စစ်ဆေးရာမှာ ဖုံသာကျေးရွာမှဦးဉာဏ်သိန်း နဲ့ ကျောက်မော်ကျေးရွာမှ ဦးကျော်အေးမောင်တို့ နှစ်ဦးအား လက်နက်ငယ်ကျည် ထိမှန်သေဆုံးလျက် တွေ့ရှိရ ပြီး မသင်္ကာဖွယ်ရာ စုဝေးရောက်ရှိနေ တဲ့ မောင်မောင်သန်း (ဘ) ဦးထွန်းအေးကြိုင် အပါအဝင် အမျိုးသား ခုနစ်ဦး ကိုဖမ်းဆီး ထိန်းသိမ်းခဲ့ကြောင်း၊ လုပ်ထုံးလုပ်နည်းနှင့် အညီ စစ်ဆေးနိုင်ဖို့ မင်းပြားမြို့မ ရဲစခန်းသို့ လွှဲပြောင်း အပ်နှံသွားမယ်လို့လည်းသတင်းထုတ်ပြန်ထားပါတယ်။

သေဆုံးသွားတဲ့အုပ်ချုပ်ရေးမှူးနေအိမ်အနီးကအသက်၃၉နှစ်အရွယ်ဒေါ်ဖြူဖြူဝင်းလည်းသေနတ်ထိမှန်သေဆုံးခဲ့တယ်လို့ရွှာသားတွေကပြောပေမယ့် တပ်မတော်ထုတ်ပြန်ချက်မှာ တော့ ဒေါ်ဖြူဖြူဝင်း သေဆုံးတယ်လို့ဖော်ပြထားတာ မတွေ့ရပါဘူး။

အသက် ၃၉ နှစ်အရွယ် ဒေါ်ဖြူဖြူဝင်းက မိသားစုတွေဘယ်ရောက်နေလဲ ပစ်သံကြားတယ်ဆိုပြီး အော်ခေါ်တဲ့အချိန်မှာ အဲ့ဒီအိမ်ကို ထပ်မံပစ်ခတ်လိုက်တဲ့အတွက် ဒေါ်ဖြူဖြူဝင်းရဲ့ ညာဘက် နို့အုံကို ကျည်ဖောက်ဝင်ပြီး ပွဲချင်းပြီး သေဆုံးသွားခဲ့တာ ဖြစ်တယ်လို့ ဆွေမျိုးတော်စပ်သူတစ်ဦးက ပြောပါတယ်။

"သူတို့က ရွာကိုဘယ်ဘက်ကနေ ဘယ်လိုဝင်လာကြလဲမသိဘူး။ အုပ်ချုပ်ရေးမှူးအိမ်ကို တံခါးဖွင့်ပြီးတော့ ဝင်လာတယ်။ အဲ့ဒီအချိန်မှာ အုပ်ချုပ်ရေးမှူးက ချောင်းကမ်းနားမှာ ဖုန်းပြောနေတယ်။ အုပ်ချုပ်ရေးမှူးကိုမေးတယ်။ ဒီမှာရှိတယ်လို့ပြော တော့ အဲ့ဒီမှာ တစ်ခါတည်းသေနတ်နဲ့ပစ်တာလို့ပြောတယ်။"လို့ ကျေးရွာသားတစ်ဦးက ပြန်လည်ပြောပြပါ တယ်။

အဲ့ဒီစစ်ကြောင်းဟာ မင်းပြားမြို့အခြေစိုက် ခလရ ၃၈၀ တပ်မတော်စစ်ကြောင်းဖြစ်ပြီး အင်အား ၁၀၀ ဝန်းကျင်ခန့် ပါရှိတယ်လို့ ရွာသားတွေရဲ့ ပြောပြချက်အရသိရပါတယ်။

လက်ရှိမှာတော့ အဲ့ဒီသေဆုံးသွားသူတွေကို မင်းပြားဆေးရုံကိုပို့ဆောင်ဖို့အတွက် မြို့က သက်ဆိုင်ရာအဖွဲ့အစည်းတွေကို အကြောင်းကြားထားပေမယ့် လာရောက်ယူဆောင်ဖို့ အခက်အခဲရှိနေတာကြောင့် မပို့ဆောင်ရသေးဘူးလို့ ရွာသားတွေကပြောပါတယ်။

စစ်ကြောင်းဟာ စိတ္တရကျေးရွာကနေ သယွေချောင်းတစ်ဖက်ကမ်းကို ညတွင်းချင်းထွက်သွားခဲ့ကြတာဖြစ်ပြီး အနည်းဆုံး ကျေးရွာသား ၈ ဦးခန့်ကို ဖမ်းဆီးသွားပြီး ဆိုပါတယ်။

တပ်မတော်ဘက်ကတော့ ညအချိန် မသင်္ကာဖွယ်ရာစုဝေးနေလို့ စစ်ဆေးဖို့ ရဲစခန်းကို လွဲမယ် လို့လည်းထုတ်ပြန်ထားပါတယ်။

စိတ္တရကျေးရွာဟာ ဖုန်သာချောင်းအထက်ပိုင်း သယွေချောင်းအတွင်းကကျေးရွာတစ်ရွာဖြစ်ပြီး အိမ်ခြေ ၁၉၀ ကျော်ရှိပါတယ် ။

အဲ့ဒီကျေးရွာနဲ့ နှစ်မိုင်ခန့်အကွာမှာရှိတဲ့ မင်းပုန်းတောင်တန်းပေါ်မှာ မနက်ပိုင်းကစတင်ပြီးတော့ တိုက်ပွဲတွေဖြစ်ပွားနေပြီး လက်နက်ကြီးပစ်ခတ်သံတွေကိုလည်း ကြားနေရတယ်လို့ အဲ့ဒီကျေးရွာသားက ပြောပါတယ်။

ဒီဇင်ဘာ ၁၁ ရက်နေ့မနက်ပိုင်း ၆ နာရီလောက်ကစတင်ပြီး ၉ နာရီခွဲအထိ မင်းပြားမြို့ရဲ့အရှေ့မြောက်ဘက် ငါးမိုင်ခန့်အကွာ ရန်ကုန်-စစ်တွေအဝေးပြေးလမ်းမ ရာမောင်းတံတားအရှေ့ဘက် ဖားပျော်ကျေးရွာအနီးတောင်တန်းမှာ ရှိတဲ့ တပ်မတော်တပ်စခန်းတစ်ခုကို အေအေဘက်က ဝင်ရောက်တိုက်ခိုက်မှုတွေဖြစ်ပွားခဲ့တယ်လို့ အေအေရဲ့ပြောခွင့်ရသူ ခိုင်သုခက ဘီဘီစီကို အတည်ပြုပြောဆိုပါတယ်။

တိုက်ပွဲဖြစ်ပွားပြီး လက်နက်ကြီးတွေနဲ့ပစ်ခတ်မှုတွေရှိနေတာကြောင့် အဲ့ဒီအနီးဝန်းကျင်က ဖုန်သာချောင်းနဲ့ သယွေချောင်းအတွင်းက ကျေးရွာအများစုတို့ဟာ ဘေးလွတ်ရာကိုထွက်ပြေးနေကြရတယ်လို့ဆိုပါတယ်။